Abbey Grange (suterot)

**Abbey Grange**
	XANTO
	XANTO
Vergumvelt	The Adventure of the Abbey Grange
Sutesik	Arthur Conan Doyle
Ava	Englava
Suterotinda	Berpotam
Evla	1904
betara	teza

Abbey Grange

Abbey Grange ( englavon The Adventure of the Abbey Grange ) tir berpotam ke Arthur Conan Doyle taneon sanegayan bak 1904 koe Standard Magazine virda az direilanon koe Dimpira ke Sherlock Holmes berpotamak.

Vildeks

Tozafa bula

Holmes va Watson bak gazdacek divmodar aze kan impadimak ko winka belcon mallapid, van Abbey Grange waba tigisa koe Kent gola. Banlize Holmes va sumesuteks stakseyen pu Stanley Hopkins ardialaf kogrupasik pu Watson nedir, i va staksa kucilasa va inafa pira ko waba. Drunason va cek ke sumesuteks, Holmes lajudiepiler da Eustace Brackenstall digisik va pilkot al zo adjuber. Viele sin artlapid, Brackenstall O^-ya va arintaf bifeem kareizur. Ba 23^-e bartiv, va budenuca ke dilkeem ke waba ageltayar abdida fu senyayar, voxe va tanoy fenkuyun koe estuxo trasiyir. Impason va marwida, va kontanye kakeon tigise do toloy duskik kosmayar. Me rovokizoyuyur kire kev gexata gan taneik ve zo alieyer nume ve titkeyer. Divmodeson, vofayar da al zo naroteyer ise bene rova kan soltiolteyen wazdel ke mamlesiki ke bumotaxo al zo gluyedayar. Bam kurenikye ape vanimpayane gan tubizaf lor va estuxo artlaniyir. Tan lujdik va ine ve ipeyer ise kan nornokay kev taka tizon vordavayar, awalkolon bakason. Dimduntutuson, baroy relingasik va vor bam uliyid aze dem dilgavaxa wiluon yateyed.. Brackenstall O^-ya va narot adre lajudeswayar azen inafa kizoyura va Theresa Wright mawakwikya artstiyir. Bantan artlaniyir aze va feliik ton gorestaf sok trasiyir. Karaker enide Holmes va koerura tutenar kiren nope lemistera ke relingara, wabokilikya va tildera olegackar.

Holmes su raver da Brackenstall O^-ya tisa xantafa gu geefa Australia, weti tanoya tanda is acku va Engla al artlapiyir, isen da barckenstall O^-ye gitiyir grijafe nume tove kurenya is zanisikeem mantode linulajayar.

Maera

Baroye ayikye pimtane gan Brackenstall O^-ya va namiks ke Stanley Hopkins ve kid, i va namiks va dubiesikafa yelipa dem tanoye gadikye is toloye nazbeikye, i va yelipa ixam kadimion zolonon rakleyesa koe vema. Holmes zo awuzar kire rabater da arienta zo maeter vielu dubiesikafa bara al zo katrasitir, mefaveyeson va dalintaf kogrupas fitc. In va estuxo soe kodisuker lize alto ke Eustace Brackenstall wan tigir. Kotcoba va kareizura ke wabikya gruyer, voxen Holmes va tanoya evodasa pinta tikisa vas baroya vorgalema is tirac pokeon ware pagaf katcalar voxe banviele me razdar. Tere do Watson dimmallakir larde sopera va dubiesa bara tir kobara ke Scotland Yard ardial.

Bak lapira, Holmes zavzar kobras aze laizon djukudimlanir, laneson da nega ke Brackenstall O^-ya tir rolackafa. Uum obas va konakilara tid :

Blay dem baroy dubiesik koe feleem lorapar, isen pimtara co romalsaveyer enide kogrupara van rolafa sleda zo vankabur ;
Bat blay va ara dubiera kabdion al tcedeyer nume va warzafa ape me olegayar ;
Dubiera bak sielcek gaverson voldum gilton dilizeyer ;
Aliera va Brackenstall O^-ya va inafa iera sye co kiyir ;
Eustace Brackenstall zo aytayar neke gan bara co zo rofelileyer ;
Abica dilgavaxa zo dubieyed ;
Tirac dem vor me zo tenukeyer ;
Drunara va galema obar da ant toloya galema tire zo faveyed.

Dimlanison ko waba, Holmes va wazdel gluyedayas va Brackenstall O^-ya kogrupar. Katcalar da bat naav sol uta zo nusoltioteyer voxen ban bene pij volon nunedir da kan wed zo gabeyer. Batcoba va konakilasa rieta gruyer. Sedme Holmes, ageltucaf gomilasik tir birelik ontinaf vas 1.90 m-.

Holmes erur da Brackenstall O^-ya is Theresa Wright va ageltuca di kalid. Kore toloya ayikya ruyed da va kotcoba al kalid, pune Watson va sinafa guyuca katcalar. Tere Holmes koe englaf moltap dikis va geefa Australia kogrupar lize konaka bazexa obad da gomilasik co tir birelik yoltkiraf gu Jack Croker. Nume va in djukakever.

Croker welidar da va Brackenstall O^-ya bak inafa koyara van Engla al kakever numaze korenayar. Soe viele ina va Brackenstall O^-ye kureyer, pune Croker me tiyir lickaf kire va inafa kaluca galpeyer. Kaikion konakviele ware wiyir nume givuyur da ina gan kurenye zo askipejeyer. Darevielon in va ina ko estuxo bocon auzuyur voxen Brackenstall O^-ye va sin onseyer ise va kurenya pobaxapayar. Crocker kan nornokay pu ine awalkokon ve vordavayar moida zo runzayar. Nendatason va birelik, konakilasa rieta gan Brackenstall O^-ya is mawakwikya azon zo askiyir. Holmes vangruper da Crocker me zo boker nume isker, me razdason va ageltuca pu Stanley Hopkins.