Amoto dem berielxa (suterot)

**Amoto dem berielxa**
	XANTO
	XANTO
Vergumvelt	The Adventure of the Beryl Coronet
Sutesik	Arthur Conan Doyle
Ava	Englava
Suterotinda	Berpotam
Evla	1892
betara	teza

Amoto dem berielxa

Amoto dem berielxa ( englavon The Adventure of the Beryl Coronet ) tir berpotam ke Arthur Conan Doyle taneon sanegayan bak 1892 koe Standard Magazine virda az direilanon koe Yona stuva ke Sherlock Holmes berpotamak.

Vildeks

Tozafa bula

Bak lan rielcek ke toleaksat, Alexander Holder tis omeltapik ke London den Sherlock Holmes keve 221B ke Baker vawila ta rupera denlanir : darevielon lane oluapikye va erba vas 50000 pound talolk bas Holder & Stevenson omelt tori vieltum al beitur, bemiaziluson va amoto foltenanafo gu 39 berielxa. Amoto icle jontolon vodasa vas beitaks tir pulayano wetce « vedeyafa kiewega »: ede co zo dubieter oke co zo bupilkatar, pune batcoba va sokafa bilita co rokitir.

Holder, djuravaldason va akoba, ba mil siel va amoto malstayar aze koe ilput ke intafa oga kobudeyer. Tici estura, va vask ke amoto kabdue Arthur nazbeye is Mary nutya divrozayar isen prilara gan Lucy kwikya rotir zo gildeyer. Holder va runkafa budenuca ke remakeem ke mona ageltayar abdida va int ilayar. Neken batcoba me tiyir favlafa. Isti mielcek Holder gan lor koe ilput zo divmodayar aze va Arthur nazbeye mucuse va amoto onseyer ; baroya aka al zo solimpayad. Nekev vimubaca, Arthur va beta divera va tegi vewayar. Baroya aka benu in voxis arlizu koe mona gan Scotland Yard ardial me zo katrasiyid. Volgunuca ke Arthur nutir ringapafa larde ostik bantan va danda ta mana dubiera giyir. Daresielon va abduga vas 200 pound talolk pu gadikye ta dimerbara va boza metcedeson al eruyur, i va liwombafa boza nekiyina koe boxo nobano do George Burnwell yasafe nikye.

Alexander Holder va volgunuca ke nazbeik divstayan gan Scotland Yard ardialik laner. Va Sherlock Holmes vajger enide in va baroya gracafa aka di katrasir numazen arti vieltum amoto ton volseituca co rodimzilitir.

Maera

Sherlock Holmes krupter da Arthur ape tir volgunaf nekev laviaca. Tire batcoba co tir divulafa da nazbeik ke omeltik nekev ombafa boza ko bazaxo ke gadikye dimnaritison va baroya aka taneatomon co piyir aze preyutatason co mallaniyir aze ta aryona aka co dimlaniyir. Ede Arthur co tir volgunaf, pune ostik ardume ape co djubazeyer lodame divulon co guamlitaweyer.

Kogrupasik dositanon gan Watson kal waba ke Holder yasa koe Streatham revava lakir. Inafa kowedira dive waba nelkon dilized. Holmes is Watson va Mary olyasten gan debala is buntura va Arthur dere kevlanid. Yikya torar da Lucy kwikya vas dubiera co tikiyir, kire daresielon al wir da in do Francis Prosper bligadolesikye skedegane pulviyir.

Holmes is Watson kal Baker vawila dimlakid. Azon battan ton kwik va int abozar, linteteson va kogrupara ant gire lanir. Ba dimlakira tici kielcek, dizveson va tila ke Holmes, Watson katcalar da in va ape kiewaskafa sleda al trasir. Gire Holmes ton weltik mallanir. Viele Watson kenibeteson mallanir, pune Holmes banlizu men tigir.

Ba direvielafa gazda, Sherlock ixam tir gadiaf viele Watson va mawa divlanir. Alexander Holder den kraba ke Baker vawila bam artlakir, dakteson da Mary nutikya va mona bak miel al bulur, anton iskeson va donesa staksama lize ruyer da pester volgunafa gu debala. Inafe nutikye krupter da bata volgunuca vas inafa jontolafa vewara va kuredara ke Arthur tikir. Holmes va anelik bam evodar, dakteson da arienta su zo maer. Va baroya berielxa dubieyena pu omeltik dimzilir ise diver da Arthur tir volgunaf voldum Mary nutik.

Kogrupasik va dilizera ke kowedira bam diver. Sleda dizvena koe nolda dive waba ke Holder al noved da in kosmar da kon korik ton lebaf nugeem kadime artan vukudakiraf bak sielcek ke dubiera al vulteyer. Sleda ke vukudiskik anton rotiyid tela ke Arthur solve tela ke vukudakirik tiyid tela ke George Burnwell. Bata golara gan dowira va sleda rabateyena koe sid gu abrotce ke vukudeem ke George Burnwell zo gruyeyer, i gu vukudeem lusteyen bas inaf kwik gan Holmes bevulas milebik. Daresielon Holmes va Burnwell denlaniyir, dineteson va dimbildera va baroya dubieyena berielxa. Dratcenon gu dierk, Burnwell welidayar da va aka pu caesik al kadoleyer ise va inafa pilkoma welidayar. Batkane Holmes va dadisik va aka rokatrasiyir aze ika itaya vas 3000 pound talolk kalusteyer. Azen Holder va Holmes dimerbayar. Holmes dere diver da Mary va George Burnwell birgon skedegayar ise va amoto al pulviyir, numen bantan volwegayeson nubokes va yikya ta dubiera va amoto mu int al lajubuiveyer. Arthur va dubiesa nakila vaskeson tcokeyer aze bak miel va Burnwell kadimvulteyer, aze va amoto soltiolteyer voxen baroya aka bak lyumara lubeyed voxaze gan tozekik zo dimnariyid. Va kidayano amoto lasuturontayar viele gan gadikye zo onseyer. Nendatason va Mary renan, Arthur guamlitaweyer, arpumason va buntura gu meraplekuyuna dubiera. Holmes va Arthur welidas va bat siatos ke askiks daresielon rodopulviyir. Kogrupara nope bat divereem tenuwer. Holmes zolter da Mary va Burnwell ape al kazokever isen bantan gu bata tegira konviele zo esteter.