Antonio Machado
|
Antonio Machado tir tan lokotgrupaf espanaf ezlopik ke XX-eafa decemda, do Federico Garcia Lorca. Kosaf gu francoeva is dere divbliyin, inaf suteroteem va bulapa ke ayabli gronon koerur. Kobrara icde welimeem ke Ayik is Tamava is ke riguca is ugaluca : « Guyuca ik polera ik kivareem ik trobindara is pokolesuca is volkeuca, kotcoba dankana gan ezlopik, tid yona sugda ke ugal is milrekolon yon razduks va tise koe ayajiluca. » Ino vanpiyir negasik va Andalucia is Castilla kan yona larma lize yona titolesa watsa is rwaltafa koswanuca belckawed. Antonio Machado Ruiz bak 7-aksat ke 1875 koe Sevilla koe Las Dueñas kotgrupafa berma kobliyir. Pasuson va yasa dem nuyevaf is abduxoevaf gruadik, tir toleaf nazbeik ke Antonio Machado Alvarez, i ke kotgrupaf rwaltopik vanpiyis witevaf ezlopikany. Koe Sevilla taneon anyustdon ugalzeyer. Va baalpeyena setikera icdeon di suyur. Bak 1883, inafa yasa ko Madrid kosoker. Rumeugal is sardugal kle tid madridaf. Gaayanon koe Nuyaf Kizey ta Tavera, ke dan va inafa tazukawesuca eniltiskafa swava en tcalayar, ino va krenuganyuca is grewapasuca mu tavesikeem di videyer. Koe inafa blira bat kizey di tiyir rigotafa yorda, kofison va lidaf vodaceem : fenkuwesuca van divef arayeem, is albapara va tuwava, is gustuca va yamba ( lexa is zovdara is wenya ), is gindesuca, is kobaratarkara, is soyutanyafa blirinda, is fabdurevafa is gugafamafa rietava, is ilmimara va kot puk, is fenkuwesuca van walkalira, is olegara va ageltuca is miltuca wal ayikeem, is seltafa is gaderopafa araya djutuwarzasa va swavaceem ta tukuvara va warzenipa koe Espana. Koe inaf grabomeem isu blira bat taveks zo rodimtrasir. Bak 1893, tison sanperdafo, Antonio va gadikye abdievlon drasur, acum nekev krenuguca is obrapara ke gadikya is ziavikye di zo tcalapar. Va jaftolvultereem is wenya is wenyusikeem dulaper. Ikayolton ko La Caricatura virdama va yon klecaf ok braf teliz, tison antaf ok do Manuel berikye, sanegar. Bak 1898 va yono sakiafo is suterotafo ulidebaxo nobar ise va yona taneafa ezlaxa suter. Bata tanda jontolon tir sugdalasa. Taneon, tir inafa kofira va ezlura kan leceva is witeva. Toleon, megrupeson, bata tanda va warzafa lidafa is yona listafa voda di divatoar ; Machado vaon artion di yoter. Bak 1899 do Manuel koe Paris konakaksaton tiskir. Tir rekola ke Dreyfus arienta koe gaderopa, is ke leceva koe ezlopa, is ke liteva koe lingeropa, is ke glabafa etrakfamuca koe suterotluzdaropa. Ino va Oscar Wilde is Jean Moréas miv gruper. Anatole France banugale tiyir tel suterotikany. Bak 1899, toleafa tiskira koe Paris. Antonio va Rubén Dario rungruper. Dimpiyison ko Madrid, do Juan Ramón Jiménez tunawer aze teni tanda va Soledades ( Antiaceem ) taneafa larma di sanegar. « Banugale, Rubén Dario situndason kevalien gan cavaluzdaropikeem, tiyir diersik ke abictan. Dere jin, mafelayá va sutesik va Tirbaf Vedeem, va merodolunyen feliik va tazuk is pestaba dan, koe "Dankeem ke Blira is Pokolera" va intafa gloganya pu cin artion ve razduyur. Volse jin, al espú da amidapon di kenolaní. Trakuyú da ezlafa ra me tiyir ravlem yoke mamafa voda ik kseva ik conya ik pestabeem volse tiyir sionapara ke swava : coba va dana gloga plekur, ede va koncoba plekur, kan intafa puda keve tamava tubliweson eruson. » Bal radimif tandeem, ino va Helios virda ( tana lozolonafa witevafa virda koe Espana, gadena gan Juan Ramó Jimenez ) tiackon dokalir. Bak 1907, va rovava va francava koe Soria Antonio Machado seotar. Kosokeyeson koe yasarekluexe, va Leonor Izquierda Cuevas ba 30/07/1909 kureten rungruper. Va daava is kaliuca ke blira do tel renapanik inafa ezla bam remsuted. Bak 1911, impavantason va vayarafilav, va Manuel berikye do kurenik dositar. Battel koe Paris va remsuterafli al seotar, ise Antonio koe Franca Reila va tavereem ke Bergson tcoker. Ba 01/08/1911 Leonor nope kotcakola tizon mulufter. Kranavselunon ise dimpiyison ko Espana erur enide zo betuker. « Jinafa takra, van afi is bli, va warzafa galova ke blinazbalarugal dere ker. » Daletoe, ino kan ezlafa sutera di ektudar va remsutera va koefa gruyuca ke korik dan va trakopa tanon under. Campos de Castilla ( Tayeem ke Castilla ), is Nuevas canciones ( Ikaceem ), is Juan de Mairena, is Abel Martin ezlaxa is vedaxa malon tid. Antonio Machado ko Baeza widavama koe Andalucia zo koflir. Do gadikya koon kosoker aze perdon di irubar. Va trakopavayara tozur acum arti konaka tanda va vergumvelt ke Madrid kotla di seotar. Bak 1917, sanegara va taneafa piskura va Poesías completas ( Kotraf ezleem ). « Belikon, jinaf grabomeem vodamar, ede vodar ; vexe folí da ~ batinde grabom bruton vodar ~ kanon al webé, milugalon dam yonar milsaref ezlopik, va slikafa basgamara koe aal ke espanavafa nyabuca, ise da ronjalbason al kobá ta yon enidaf is loprantaf blinazbalarugal. » Idulugalon, ino va worara ke lospa dem yon kotlik ke Granada ( don Federico Garcia Lorca ) kazawar. Teni 1919, ino ko Segovia zo betuker lize kali 1931 di soker. Va redura va Segovia Sanefa Kotla paker ise wal ebaceem is koyara ko Madrid tiskir. Koe yon suterotrijay ke Madrid va saref espanaf gruadikeem kazokever ise do Manuel berikye va sutelara va jontika wenyaxa isu buska isu folvabuska kiewatcon zirsena kali 1931 dokobar. Bak 1927, Antonio Machado wetce bewik ke Avaf Gazaf Cultim zo libur. 1928 tir tanda ke taneafa renatwa pu telya dasugdana kan Guiomar yolt koe tweem is ezlaxeem. Ba 14/04/1931, etimara va Toleafe Sokasane. Bak 1934-1935, mu El Diario de Madrid fela isu El Sol Antonio Machado gilton dokobar. Bak 1936, toza ke Wideytafa Geja koe Madrid va ino akoyer. Runion ino va lazava ke Sokasane tupakoar. Bak 8-aksat, Lorca zo adjuber. Machado, wanieno is merovinuno, va ezla pu ina ektur. 1937, sanegara va La Guerra, ixam sanegayana larma dem blok is veda, bata larma yunkeyena gan Jose berikye. Ko kot otuk ke Hora de España sokasanefa virda Antonio suter. Bak 7-aksat, va toleafa walvedeyafa aba ke kevfascievaf gruadikeem ta arayarojura tcoker. Bak 1938 ko Barcelona do yasa kosoker. Tozif sokasaneik, Machado tire tir koe pemaxo ke tsunesikeem va Franco ise ko Hora de España is dere Vanguardia va intafa bruxa ta sanezanira plekur. Teni 12-aksat, vedeyevafa ervolia va Barcelona deblamed ise ton toloyo beratorafo pemaxo va Espana solzarted. La Tierra de Alvargonzalez y Canciones del Alto Duero do yon yunkeks ke Jose Machado zo piskud. « Kotviele va tawadayik zolkomé, va kotcoba grupena gan in is afanana gan min trakú ise da battan va jinafe grupene sipir. » Geja va ino sol Doña Guiomar solzarter. Ina ko Portugala mallapir, darpe abdulanira ke vedeyevaf milk va Madrid ko Valencia az Barcelona luxeon jovler. Golde zeltara va Lorca ino me dimaytcur. Fascievikeem abdulanir. Ino va Barcelona gobulur, batviele van divexo. Glogawalkeson moo divblirakelda tir, do 80-dafa gadikya is Jose berikye is battelaf kurenik is konak nik. Koe erna, va zolpa dogisa va yona tanuskaca drasur. Lospa tir puskeweyesa. Fentar. Sin va jowa kal Cerbère remlapid. Eldeon ko Collioure artlapid lize koe Quintana gida di jonvieled. « Kotcoba remfir volse zavzar, voxen minafa arienta tir da conyukason va keldeem is birakeldeem remfit ». Ba 02/02 artpison aze ino ba 22/02/1939 koeon di awalker. Gadikya arti barka dere. Kagrupeyenon va bagaliafa kotawara ino di kazawar. Inafe berikye koe ucom va eluxaki ve trasiyir. Moe bati Machado va ironokaf blok al suteyer : « Esto días azules y este sol de la infancia… » |
| ||||||||||||||
.svg){kind=icon}