Amidaca wal toloya betara va "Herman Melville"

'''Herman Melville''' koe [[New York]] koe [[Tanarasokeem]] ba 01/08/1819 koblir. Tir bareaf ke anyustoy nazbeik ke Allan Melville parloesik vey Skota. Mali 1826 inafa ja erbon zo arger nume arti balemda tinewer. Gadikye bak 1832 awalker, iskeson va mek rob pu yasa re sokesa koe Albany.

Arti tolda, Melville va Saint Lawrence dolekafa tota van Liverpool wetce zanisik rundar. Radimi dimlapira bak konak aksat koe Greenbush taver. Azon koe New York dene aluteikaf ilput kobar aze koe New Bedford va Acushnet megoltota van geefa [[Pacifika Welfa|Pacifika]] welfa vilter. Oxam tir tolsantandaf ise koyara alubdon jijatasa tozuwer. Tcabanera va [[Megol (Balaena)|megol]] ba 03/01/1841 tozuwer aze va tota ko Rio de Janeiro star aze va Horn evilma kaiknir. Ba 09/07/1842 arti san-anyustoy aksat tiskin moe bira ton yotcasa ugdafa gropa, Acushnet va [[Marquises]] ewaleem tere artnir.

Koe ewaleem Melville do dositik ke tota emdur. Bak tanoy aksat dene patectolaf Taipi grelt blir aze moe australiafa megoltota otcer. Teni pakeyena tarlera moe tota, ba 20/09/1842 koe [[Tahiti]] Melville zo divtotar aze koflintar. Zo komalyer nume zo lanzar, neke wetce kandoik moe ara megoltota zo vilter. Arti tevaksatafa koyara kal [[Hawaii]] tursia, koe Lahaina ewala va abuguca katrasir. Koe Honolulu va amerikafa gejatota wetce opelaf birelik vilter. Ba 14/10/1844 ko Boston dimon artlapir.

Dimon koe [[Tanarasokeem]] Melville va yasa koe Lansingburgh kevlapir. Mone konake berikye koe New York azon koirubar ise va remsutera va nega ke koyareem ton stuvaf berpot kobaver. ''Taipi, nega ke balemsaftafa jonvielera vanmiae patectolik ke krant ke Marquises ewaleem'' ba 27/02/1846 zo sanegar, azen diretandon ''Omoo''. Bata toloya neva gu saneg pegapaf gu divepatectuca mbi tcedeped. Nope bata warzafa fiuntuca, Herman Melville gan trelna ke New York zo yaner. Va malyopas suterotaf teliz koe ''The Literary World'' is konak klecas krent mu ''Yankee Doodle'' bilder.