Ba miel riniz va Tôtes artlakir lize jotaf germanaf fayik va diaz pu koyasik rindecker aze ko yorida vanstar lize sin di rovosielestud. Wori edje estud, pune « Élisabeth Rousset W<sup>-ya</sup> » gan germanaf fayik zo rozar : to Cwekfixuya. Viele ina moi witara va bantan dimlanir, pune vangrupet da nope « gugafamafa werkuca » su beldar.
Direvielon koyasik kabdue riniz va sint katanad voxen mecoba tir gadiafa ; stasik dakter da dirgasik va vansorkara al pour. Sin kali sane bartiv poleson goked da Follenvie W<sup>-ye</sup> yoridik di divmoder aze givatar. Germanaf fayik mepebuson al pour. Metan va inafa linulara gildar vieli kielon Follenvie W<sup>-ye</sup> kalir : « Preussenaf fayik volmiv erur kase Élisabeth Rousset W<sup>-ya</sup> al boyarur ». Cwekfixuya va bantanye gire me djukuwir ise va dulzera pu koyasik dure bibepes vewar. Neken sin exukeson vangruped da Cwekfixuya fu gokempar enide riniz di gonomallakir. Zideson flided voxe adre toz « levtrakud » ise amliton toz pokoled da Cwekfixuya fu malnaler, anton nyapenon gan ilkaf dulap.
Direvielon, sonkeson da preussenik gin tir tianaf, koyasik toz vleped enide Cwekfixuya va ilagira va fayik tere di naler. Ba miafizestura, va kota tula icde ayikya ilagiyisa va volnik toz ozwad : « [[Giuditta is Oloferne (trutca ke Caravaggio)|Giuditta is Oloferne]] is [[Lucrezia (3) (trutca ke Gentileschi)|Lucretia is Sextus]] is Kleopatra ilagisa va kot volnaf jadiwik ». Voxen viele sielon fayik gire erur, pune Cwekfixuya wan vewar. Bak sielestura, « gluyista tuaxawer » numen lantan va tiaveckes blayak ins kalid, i va tulon « tenura va tegirinda tumalyar ».
