Ba 02/03/1930 Pravda fela va teliz ke Stalin vergumveltaf gu « Fansila ke kiewatca » sanegar.<ref>Iosif Stalin, ''Fansila ke kiewatca. Uum ke fira va tawamidurafa tudonara'', 1930</ref> Batcoba tiyir kategira ke okilik ke pako va tawadayikafa perzura koe varafa patecta. Divpakudeteson va wupesira va deona ke vertuma gan bat anamgimawes tawadayikaf exureem, Stalin va « bulfera is iltazukawera » malyopar. Armor ke tudonara tir loeke wiluf numen ristulafa xuvara va tawadayikeem tir rokla. Stalin va lizukaf gadesik wetce vajulen bonol anton narar. Miledje va drowigafa kuranuca ke tudonara abduplekur. Va gildura is rubuca tove tawadayikeem batkane nukevnedir.<ref>(de) Vladimir Nevežin, « Einführung », 1930</ref>
Konak celemoy tawadayik va kiewatcaf dakteks ke Stalin sopteyed. Va teliz ke Stalin ton batakafa liwa ta flavafa yatera va ''kolxoz'' diel naruyud. Ota ke tudonayan ebaveem jontikeke titfiyir. Ba 01/03/1930, uldinera va ota tiyir vas 57 % voxe arti toloy aksat ware oxam tiyir vas 28 %. Koe gola ke Tcernozyom, bata voda mal 83 % kal 18 % titfiyid,<ref>Fitzpatrick 1994, bu 63</ref> ise koe Moskva winka mal 73.6 % kal 12.3 %.<ref>Viola & al. 2005, bu 264</ref>
Perzura koe tawaday dun sokiyid kiren tawaayiktawadayik va dimdubiera va intyona pasuxa is jiadara va tudonara is griruntara va ''Kulak'' is jiadara va kevalkaf tawuk dineyed. Mon 20 % de enomayamb yaseem teni temotara va pasuxa tire mbi di dimdubieyed.<ref>Hildermeier 1998, bu 396.</ref> Acum jontik enomambik di va erura kan tizuca lasutcedeyed. OGPU remi batyon aksat va 6500 flavafa exaksara patayar, don 800 viltanon rujayana. 1500 flibik zo bakayad oke zo aytayad.<ref>Werth 1997, bu 168</ref>
Pakesikafa ota dene bata perzura laumapayar : bak taneaksat tiyir vas biwe 109 000, vox ticfiyisa kal 214 000 bak toleaksat ; bak bareaksat ke 1930, aptacik ke birgardial va loon 1.4 celemoy perzusik kopatayad.<ref>Viola 1996, bu 140</ref>
