Bering Bira
bira
TAWAVOPA
Ord koetadavafa bira
Welfa Pacifika Welfa
Welmot   2 315 000 km²
Aludeve
 - mialuk 1600 m-
 - cuge 4151 m-
RISTULA
Krimtafa patecta Rossia  
Tanarasokeem   

Bira valente Pacifika welfa betara

Bering bira tir teli lolentefi ki ke Pacifika welfa. Ton vanpokeon bargentimaf tazuk, domega tid lenttalteon Sibiria is lentroneon Alaska. Bering vedil mantaf gu 85 km- lenteon tigir. Geef krilt ke bargentim va ewalafa vokoda ke Aleut tursia.

Liwot va Bering bira is Aleut tursia

Toloy jumtak vas mon milaf lum zo rowaltrakud. Baton, valenteon is varoneon jumtak dem azekackaf titak is mialukon titsuyaf gu anton 150 m- vadjes va midaze ; banon vageon is vatalteon welfaf jumtak loon titsuyaf.

Midliwot va Bering bira
Oprempasa tota bak fentugal moe Bering bira
Kreyaf wiks va Bering vedil

Midafa drovuba va ban welfaf jumtak ton baroy jumtakam titsuyaf gu 3700 m- ik 3900 m- solzarted. Lentugeronon Aleut jumtakap divlizer.

Talteon poke Kamtcatka dega Circov drovuba va Kamtcatka jumtak gu Aleut jumtak solzarter. Vage Bering bira drume vokoda ke Aleut tursia, Bowers drovuba va milyoltaf jumtak kimar. Cug lavok ke Bering bira va Pacifika welfa geunir. Alaska salt rem Blijni vedil dye lente Circov drovuba vaon platir, vox dere rem yonar numay wale ewala.

Viele bata lavokafa flava koe Bering bira tigid ise taltnid, pune niarud. Batinde va voltrulakoraca nekid, i va salteem riwe ivamuf.

Bata voltrulkoraca ton toloya gama grocelon ice Alaska solzarter. Bata gama van Bering vedil idulugalon solentnir. Bana va Aleut salt dimkalnir aze wetce gijarotif Kamtcatka salt kene asiafa krimta getalton is geon wan nir.

Idulaf salt lentnis kene Alaska va gropa ke opra kabdue krimta nekir, i va gropa leon lugavafa voldum ronefa krimta.

Bat saltaf vierd me tir bograckaf kiren krayta is zivotcap is arapeniwepesa laveka ke Pacifika welfa va saltarura dun nekid.

Kene midaze, aludevaf lavok ke Bering bira ticnir aze cugon tulavekawer ise va Pacifika welka kalnir. Bat lavok kulaf gu sinkasa eipinda va bliopafa warzesucapa ke Bering bira nur. 25 kabayafa katca zo gilonad, don termil is aaltuk is baki. Idulugalon megol sinkaneyas zo dizved. Soe noafa onara va sanelia ke bat moukol al kastar.

Lidawicka betara

Mali 199-e sanda, Bering bira tir tani tamavaki lize lidawickafa tuidulawera tir zolonapafa ise exaksaweper.

Izva betara

Towara ke bireka mali 25000 tanda, Beringia

Bak Opraf Firday, laveka ke bira tiyir omafa eke ayik mal Sibira va Bering vedil roremlaniyid aze va noeltafa Alaska rokolanid abdi da va kotrafa Amerika kaikion kaliapon boniayad. Re midafa gola tiyisa banugale siday gu Beringia dile zo yoltar.

Yolt ke bira tir tel ke Vitus Bering totasik zanon gu Rossia taneon kosmayas va milyoltaf vedil, beka ar vestasik mo bata bira ixam al totayad, tulon Semyon Dejnyov.

Dere rupec betara