Chesapeake (suterot)

Chesapeake

Chesapeake tir berpot ke James A. Michener amerikaf berpotik, sanegayan bak 1978. Tir izvafa lenopapa dilizesa remi mon balemoya decemda, dem xuta ke golama poke Chesapeake ceda ke ronefa krimta ke Tanarasokeem.

Toza

Rupa bak 1583 tozuwer, ba inkewera ke Pentaquod indiik yates il intaf Susquehannock grelt ken Choptank kuksa koe wedaxo. Va diliokaf patectolik ke vema va int kofir. Waroldon, artlapira bak 1606 ke taneaf englaf boniasik stan gan John Smith redakik dilizer. Kaliapon indiik zo sulad oke vanarayad, azen Maryland boniaxo is skapafa teza ekwon gu olaxaxo zo korundad numen elupkaf gluyas salt do Engla reduwer.

Xo

Kotaf berpot, valey abica divefa ezkalira isu yunkera ( va Kariba is Angola is Franca ) koe golama dilizer, i koe Choptank ke ronefa krimta ke Delmarva degapa budesa va Chesapeake cedapa koe noelafa Delaware soka ke Tanarasokeem. To manafo tawavo tir, dem omaf siday is weda keve yona recapa isu listapaf tuwavaf debak, moe glupafa ceda jontikviele tegulana gan zivotc is dis va pilkovafa blikapburedopafa gropa icde eipuca, i moe ceda tiyisa gazaxo ke orek.

Nelkafo xo tid miv Choptank is Devon Island is Patamoke widavama is Dili Kiria is Turlock weda, koto xo lecano gu tana yasa is lana irubasikinda.

Michener koe abduekrent bazer da bato xo tid sordafo, neken kontan grupeckes va gola drikon di pilkomodar.

Koredik

Berpot ekwon gu towara ke konaka yasa remi baroya decemda is acku zo vegedur, lize kota yasa vodar : va pilkovaf irubasikaf ord, is lana seltafa gropa, is lana lidafa waltera, is lana zalera va int gu anameda is liziwera ke tamava.

Steed yasik tozatenon tid kristevaf ( Maryland tiyir pilkovaf tison boniaxo kaxaayano pu eireaf kristevaf jiomik ke XVIII-eafa decemda ), isen vanpid olaxamidusik ise va tegirapa kaliapon voned ise remi toloya decemda va Engla dun skedapad. Nuyotaf is ponkaf gu Afirietugal, do Washington bak Geja ta Volruptesuca doalied. Mali XIX-eafa decemda, va pemaxo ke geekaf midurasavepesikeem lotis levetiruca adre kazokeved, nekev « tulafa » adala ke intafo miduxo nume kaikion bexodiskon titaytcud, kali parmafa rawawera ke intafo lecafo yasaxopo.

Paxmore yasik tid Quaker alkik, dere tigis remi varaf berpot is oxileem. Ambafa tolonga va alkafa brazara ke purevik ke Massachusetts yategar aze tuke totiaxe dure tuzolonawetese remi sandeem is baroya decemda, va bali kolnar. Male bate iaxe taneaf bovray tulon titid, az sposafa clipper tota ke toza ke XIX-eafa decemda, az totuk yestas va orek. Voxen cugeke, Paxmore yasikeem tir elupkaf lidaf nael, dem konak olkoy runion viltes va tegisa rankera va levetiruca azu lyumara, az kaikion doaliera mu lekeem is yudik ke Europa. Voxen Paxmore bocik ko gaderopa eglur, vulkuson va tavera ke sanoya Quaker oxila ; gan Watergate bilita zo gralomber nume di kser.

Turlock yasik tid korik ke weda is lava. Taneaf Turlock tir tozekik divstakseyen gu Engla az gelbeyes koe weda is fordafo wico, ton kimtafa blira. Va konaka divseltayana dositikya ( don indiik ) vantolongar aze va jontik xantoc nazbar. Turlock yasik va intafa kimtafa levblirinda dun lotid. Olutuca is volmwedafa ilagira is dubiera is tadura tid intafa dilizesafa nyosa. Va volseltuca is « Batakikajam » vox dere moblisa rodezalera va int gu volfakafa is prostewafa anameda volackad, dun tis pokef gu dure lotina tuwava isu birablira. Konak Turlock olkoy bak tanoya ok toloya oxila va int selton dile ticapted voxe di kalubed ; abic pof korobik nesidon gu tegulana orka : tcordaf redakik stegevas va englafa elekara bak toloya geja ta volruptesuca, totakazasik va levetirik divvawas va totervolia goweyonasa va butcara, okilik ke orekafa tota viltas va elicik is tis awalkopesik va nudol, is tere boparloesik volwegayeson kodoles va wedaxo dure rojuyuno gan abdigadikeem ta vegedura va lavamonaxo.

Cater tid ebeltik ke berpot. Tozi XIX-eafa decemda awid viele oklaf abdigadik Cudjo guineyeno idjon icu Angola vanpir levetirik dene miduxopo ke Steed aze zo lajutunuyar. Nekev tunera va levetiruca arti Wideytafa Geja, inaf xantoc dum amerikaf ebeltikeem kimton is rokiskon blid, kali edave ke 1960-e sanda is lyumara va Wideyaf Rokeem, pakena gan toloy yik ke ironokafa oxila.

Caveny yasik tid ironokaf artfisik, i eireik aloyayan bak 1846 div vo gan aelakolapa. Va int kalion gu lizukaf seltaf patectoy kofid aze kotlize azon tigid, ton pofa rozalesuca.

Watsa

Michener va jontika watsa koe berpot ruer, don nelkon :

Blikapburedopa is gesabliuca ke ayik dene tuwava. Chesapeake ceda jontikedje tiyir katcalafa anameda dem gedruca is listuca, i tamava ke lava is siday belcon. Tozuraf indiik tiyid tamaf gu tuwava ise tarkayad nume ridolon tuvodayad. Azon, bata ceda gan ayafa savera lolokalion is parmon dun zo ligundeyer. Jontikedje irubasik va int guon joayad, blison armoron gu weda is mafelanyason va lamasi zveri, is malestuson va orek is tul is krimtaf onaks. Voxen tere, ligundera va patectoy is lizukafa ik sumufa fura va kotcoba toz tuiyelayad, kali teca awalkera ke ceda.

Ara aldafa watsa : uum va levetiruca is wideyaf rokeem. Remi baroya decemda, Paxmore yasik isu Steed isu Turlock va int tsuned. Paxmore olkoy tid mu tunerevafa envara ; Steed olkoy tid nuyotaf vox impavantas va bolk num tire jintrakackaf ; isen Turlock bewik ordkoraf gu « Batakikajam » ton wavlaf bliragropeem isu lidadugeem lanecked da ebeltik tite seltbil wan gotigid. Isen Michener va tanoya decemda mekoseltasa va ebeltikeem abdi tunera kioxon ranker, is zaavevaf mweem is abdimalyekseem famiwayas va Amerika is inafa lidafa rictela tove tamava.

Ara watsa tition zolonafa vox vreparlewesa darpe bueem : rankera va kareva dilizeyesa abdi volruptesuca koe 13 boniaxo, kuranon abduplekuson va katalikevafa yasa isu Quaker, i va yasa fenkusa va tamava is tarkasa va olkafa minia ke kottan. Michener batinde ware nedir da izva ke Amerika jontikviele tiyir tizafa is mealiafa.

Michener va totervolia kozaniyir ise va bira is totara skeuyur. Batcoba numon tir koe jontika nakila dilizesa moe tota ok ton yona stuva ke vultesa tota isu butcasa va levetirik isu tcordafa isu yestasa va orek is krimtaf totukam ikz-. Tulon listapafu bu pwadesu va doaliera is onkara wal toloya volnafa tota tigid.

Adim, wetce dye gostragana coba, Michener va loa bifapa ke noeltafa izva ke Amerika cugon djerkar, dumede sina va anamedama dem korikeem ke Chesapeake me co turestayad : Wideyafa Geja nemon zo divrozayar, voldum intaf abdibifeem ; divefa geja kev Mexika az Espana koton zo guizgad ; Taneafa Tamavageja me dilizeyer, mecoba aflar ; Toleafa Tamavageja dere zo iskedar, beka uum va awalkopera va Yud sane ton giwara va lospa bak 1938 awir ; Geja koe Korea nemon remawir ; Geja koe Vietnama dace me ozwar. Bata « ikudara » ke Michener va tamavakorafa bifa va tena ke berpot kevaxackar, i va tena manton viunsusa is rankepesa va Watergate arienta num drasura va kota lidafa pesta ke pakap ke gaderopaf runt.

Dere rupel

Chesapeake
XANTO
Vergumvelt Chesapeake
Sutesik James A. Michener
Ava Englava
Suterotinda Berpot
Evla 1978
betara teza
  Tuveli icde Suteroteem