Cwekfixuya (suterot)

Cwekfixuya


Cwekfixuya tir berpotam ke Guy de Maupassant sanegayan bak 1880 koe Soirées de Médan larma.

Bat berpotam gu grot ke suterotafa geltreva zo torigir ; Maupassant tir jotaf barsandaf suterotik anton sanegayan va abic teliz, tuje bat suteksany va int gu dalaf sutesik davon aykar. Mil berpotam va toza ke trelafa nek noafa suterotafa stuva tcalar : Maupassant va tevoy berpot is yon decemoy teliz iku berpotam di sanegar abdida arti sanbarda mulufter. Koe Cwekfixuya kan geltrevaf martig va kimtafa stuva ke remburenikeem ke lan riniz bak fentugal ke 1870 koe Franca seluna gan surtera pimtar, i va stuva ugale « goni ke surtenik tozuweyer, i ke surtenik govevanyes kaf tove cenesik ».

Vildeks

Rupa bak 1870 bal francapreussenafa geja dilizer. Francaf sayakik kevu abdulakira ke preussenik va int stimad, filtenon is mea djupoceneson. Aze va Rouen merojuson jovled numen widava gan volnik zo koilkar. Bata toza ke kerelera va Rouen vebar da francafa yasa lizukon zavzagiyisa va preussenaf sayakik govistaled ise gosinkad. Batdume tanoy preussenaf fayik dene kota francafa yasa ke widava ba kota estura zo voltar. Nekev poluca ke lo fayik, francik gan bata tigira zo natcud. Preussenik va erbapa bas kazikeem ke widava maldined.

Trutca ke Paul-Émile Boutigny watson gu Cwekfixuya, 1884

Sanoy irubasik ke Rouen langazdon birgoton djukumallapid, seotayason va adrafa morictara bas zolonaf paskalenik ke preussenafa ervolia. Va artlakira va Le Havre mukad, i va lana widava musafa loon dam Rouen is novesa va kaliafa otcera van Engla tod abdulakirapa ke volnafa ervolia. Ba baleme bartiv ke gazda koe Normanda gida ta mallakira kan tevokolaf riniz va sint katanad. Ke bat koyasiktum, Loiseau W-ye isu W-ya tid, i dolekik atakileson doles va dugansaf vor pu moraf zazdik ke tawaday ; is Carré-Lamardon W-ye isu W-ya strabikafa is rabikafa yasa ; is Hubert de Bréville W-ye isu W-ya. Bat tevoy korik va erodaf geak ke riniz kereled ise va dalaf selt kaatoed. Azon dere tid toloya alkikya is lane Cornudet ayikye az tere lana ayikya yoltkirafa gu Cwekfixuya nope anamkafa altoza. Koe Rouen korik va inya pulvijid ise kapsad, askipeson gu « tresenik » is « kinokik ».

Nope eaftafa lidawicka, koyara tir abrotcifa lopon dam abdiwinon. Numen kot koyasik va diskira va eksa al vulkur kire va kaliafa artlakira foliyir. Boreon sin toz aeled ; Cornudet va kotraf xeynak dadir nume drager voxe mbi kovewar. Ba kielon bare bartiv, ael va sin flupur. Batviele Cwekfixuya va gratca levmadar aze va akenafu estu divplekur, don azekol dem toloye varafe wilocye is balemoy tirac dem Bordeaux centeda. Strabik tairdad voxen nope dakela « tumantayasa va pezolk », sentason va Cwekfixuya du inafa abdiwira, Loiseau W-ye va pak tere naler viele ina dison drager. Fure lotan koe riniz va estu pakad. Ant biptikye is biptikya is toloya alkikya wan getined. Bam Cwekfixuya va sinka pu sin vazon drager, numazen biptikye djukukevnaler. Amlitafa spua koe riniz titfir numen koyasik toz prilad.

Ba miel riniz va Tôtes artlakir lize jotaf germanaf fayik va diaz pu koyasik rindecker aze ko yorida vanstar lize sin di rovosielestud. Wori edje estud, pune « Élisabeth Rousset W-ya » gan germanaf fayik zo rozar : to Cwekfixuya. Viele ina moi witara va bantan dimlanir, pune vangrupet da nope « gugafamafa werkuca » su beldar.

Direvielon koyasik kabdue riniz va sint katanad voxen mecoba tir gadiafa ; stasik dakter da dirgasik va vansorkara al pour. Sin kali sane bartiv poleson goked da Follenvie W-ye yoridik di divmoder aze givatar. Germanaf fayik mepebuson al pour. Metan va inafa linulara gildar vieli kielon Follenvie W-ye kalir : « Preussenaf fayik volmiv erur kase Élisabeth Rousset W-ya al boyarur ». Cwekfixuya va bantanye gire me djukuwir ise va dulzera pu koyasik dure bibepes vewar. Neken sin exukeson vangruped da Cwekfixuya fu gokempar enide riniz di gonomallakir. Zideson flided voxe adre toz « levtrakud » ise amliton toz pokoled da Cwekfixuya fu malnaler, anton nyapenon gan ilkaf dulap.

Direvielon, sonkeson da preussenik gin tir tianaf, koyasik toz vleped enide Cwekfixuya va ilagira va fayik tere di naler. Ba miafizestura, va kota tula icde ayikya ilagiyisa va volnik toz ozwad : « Giuditta is Oloferne is Lucretia is Sextus is Kleopatra ilagisa va kot volnaf jadiwik ». Voxen viele sielon fayik gire erur, pune Cwekfixuya wan vewar. Bak sielestura, « gluyista tuaxawer » numen lantan va tiaveckes blayak ins kalid, i va tulon « tenura va tegirinda tumalyar ».

Direvielon biptikya va Cwekfixuya ben ma dapnarir aze rukuzon lasubuiver. Kottel milinde ubzer enide ina boyarur. Cwekfixuya toz iltrakur. Tere isker da mu dofa kiewuca va int wetar nume kempar. Bak sielestura nope isk ke Cwekfixuya, koyasik va liza vangruped nume kotote vanyed mesensaf, melajukrandeson mei lajupestuson.

Gazdon direvielon, riniz tere romallakir. Viele Cwekfixuya rundanyar, pune kottel takaskarar. Ina zo akoydar, va kurenikya ke rabikye lakiavamar voxen bantelya kan « eskarnafa kiavarama dositasa va disukera vas situndana ceakuca » dulzar. Amlit va riniz gazar. Ba vula ke estura, Loiseau kalir : « Aelera sokir ». Kot koyasik va intafu estu divkitar aze toz fixar. Ampuson is ciwanon gan suza, Cwekfixuya va mecoba al narir. Va sin estus riyomeson is tabodjanon disuker voxen lutsaga va inafa larida me lajudivstid : ina va betcoba me lajukalir. Metel va bet pak drager, kottel va inya cugeke afanar.

Cwekfixuya toz ikuzer, trakuson va intafu estu firviyinu pu sin. Cornudet va Marseillaise azdadagar. Gildeson va gugadank, koyasik tupaokawed. Berpotam ton ewava va Cwekfixuya buwejesa wali toloyo dongo jiadawer.

Dere rupel

  • Guy de Maupassant : Francavaf francaf suterotik ( 1850-1893 )
  • (fr) Boule de Suif, dene Wikisource ( xantokrent )
  • CwekfixuyaBoule de Suif ), kalkot- 2013 gan Élisabeth Rovall, banliz
Cwekfixuya
XANTO
Vergumvelt Boule de Suif
Sutesik Guy de Maupassant
Ava Francava
Suterotinda Berpotam
Evla 1880
betara teza
  Tuveli icde Suteroteem 
Moek ke Cwekfixuya berpotam, piskuks ke 1902