Delt va Dorian Gray (suterot)
VildeksRupa ba englafa matela bak cadimany tozuwer viele toloye nikye izgon ice isaba tilded : Lord Henry dile yoltani gu Harry tisi puvegus glabusik, is Basil naf lingesik. Lord Henry is Basil va listuca ke trutca skuyuna gan lingesik pulvid ; bantan pebur da bat grabom vas inafa ilka dogiskirsir nume pu saneg me zo ronedir. Bak bata pebura, va pilkovafa skedara va tezik divrozar, i va listapafe yikye. Lord Henry tir titolesik drolen gan listuca nume va bantanye dulaper nume erur kase bak direfa tezura rozavzagitir ise rungrupeter. Bam Harry va prilara icde listuca is jotuca is sedielaca do Dorian Gray tezik bokar, i va varafa gruspesa dewitca buivesa da in va kotcoba rotaskir. Miltan re ixakaf is roturestan, gan pulvira ke Harry zo powar nume va inafa malyuca toz jiligackar viele Basil va tenukeyen delt basitalkar. Bat delt va inafa listuca dun videter solve tela ke in likseter. Va lana lickuca tove delt pestaler nume fuxar da delt ikaon tuguazaweter. Bak auzura va ziavikye, Harry kosmar da Agatha ziavya tan skedanik va bat Dorian Gray gruper ise dace monendar. Ini va lan inaf grustan sielcek paker nume va Dorian katrasir. Sin va sint gu klabeem ke tcilk ke Harry toz prilad. Azon Harry is Basil is Dorian va sint belon wan kakeved. Arti tanoy aksat radimi taneafa kakevera, Dorian pu Harry dakter da va Sybil Vane jotafa wenyusikya sutoz renar ise fu kurer. Sybil va kuranira va kurera pu intafa yasa luxeon dakter. Inafe berikye va mevaleuca muxar isen gadikya mowalzer, voxen Sybil gan ske wan zo vumber. Dorian tcoketeson va in zirses, va Harry is Basil malstar, voxen zirsera ke Sybil bak drunta tir mayakafa. Tici drunta Dorian pu Sybil kalir da nope inafa zirseraja mea rorenar : to gan inaf fitc zo mempeyer. Va in antaf do niga jovler. Direvielon edje va intaf delt pokolanir, pune Dorian katcalar da delt al betawer. In va warzackafa udutafa muxara trasir. Va intafa djumera bam setiker ise zo vudesir da mila djumera co dilizeyer. Paratason az nekevon kureteson, va Sybil kle djukukatrasir voxen Lord Henry givar da miltanya su kser. Dorian destapar voxe zo satolemer ise va debala tubrutar, kalison da inya liston awalkeyer. Gloga ke Dorian kaatoeyena koe delt banvielu toz tuebeltawer : va volgunuca su drasur. Basil va Dorian auzur enide va inaf askiyin delt di rodivnedir voxen bantel vewar, kivason da inafa birga di zo kosmar. Va delt koe tselkabudeyena olkoba kle preyutar ise va girefa kotezara mu in kevvewar. Miledje Lord Henry va orikaf berpot firvir, i va berpot droles va Dorian is betas va inafa blienvara. Dorian va blira ton gazase puve bam bokar nume va orikafa tamba ke London vibongutuson is puvedeteson nobar. Gu riafa muka dum aka is tayi is kofiga va int anammadar. Trutca va titolesa tcala ke inafa ayuca toz divnedir nume va prazdaf is alkejan olkik bam zovdar. Basil va nisu icde Dorian gilder nume tulidar. Bantel va birga tere welidar nume va trutca nedir, i va trutca betaweyesa. Basil skusik wavdon pilkomodar. Batdume Dorian va bogarapa va redusik va bata lingera va intafa gloga pestaler nume va Basil adjuber aze va alto griawisir, poanon pomanon gan Alan Campbell, i gan savsaf naf razopik itun az ksetes. Kadimion Dorian koe mila zazda dam James Vane berikye ke Sybil xuye tigir. James oye inaf ikayolt gilden pilkomodar. Aze va in div tresexe suzdar aze dilfur. Bexe Dorian katcalar da nekisik va ksera ke inafa berikya me rovotir int kiren in tir jovarsaf ta batcoba. Arienta weti sanalubda sokiyir neken in loon nutir tolsandaf. James zo buiver nume va Dorian urber. Wori tere zo givar da Dorian en tiyir askisik. Bantel mevielu dun kivar da nope intafa gomilara di zo dimtrasir. Kadimion bal tcabanesa etsa koe winka, James Vane zo aykar numen kivara ke Dorian zo tudiliodar. Voxen nope bata bifa, Dorian va int djutukiewar. Batdume moi tegiranya va intafa ewava koe trutca nyaser voxe kosmar da inafa evakuca va yona voctafa uka su loplekur. Djupotunuyatanon gu bata taniafa kimbara va intyona tgegiraja, ton piksesa tegira, va wed ko trutca kougar, i va mil wed dam tel zanudayas va aytara va Basil. Viele rictaga va alto ke lan guazik kosmar, pune Dorian nope tiskin xiz anton zo ropilkomodar. Poke ino, trutca va varafa listuca ke taneaf viel luxeon su katrasir. Dere rupel
|
 Daktes moek ke taneaf piskuks, 1890 | ||||||||||||||||
.svg){kind=icon}