Emily Brontë
1818-1848
Englavaf englaf suterotik

Emily Brontë, kobliyise bak 1818, tir nazbeikya ke Patrick Brontë gertik. Bro berikyeem, va grivapa ta sutera wavepon exaksar nume, va int gesiason do Anne tela lojotafa, va Gondal gestafo gazaxo redur. Loon dam beta berikya, Emily va Haworth yasamona is anamefa vayka en skeweson suver : batlize, dum gradilikeem ke intaf tanoy berpot, koe govitafa tuwava abrotcibartivon ugalzer. Tison 17-daf, ko Roe Head School va Charlotte dositar. Voxe kire va divblira en levgajar, ko gertaxo kalipon di dimpir.

Baroya Brontë berikya ( Anne is Emily is Charlotte ), trutca lingeyena moni 1834 gan Branwell Brontë berikye

Ara yovara va jonvielera koe Law Hill School nover da kosmar va ageltafa izva ke Sam Stead jotaf gadikiskik, dan pu in va tela ke gradilik ke Wuthering Heights koswatar. Koe Law Hill, ta vulkura va aldoasa anameda, va yona ezla suter. Azon koe Haworth balemdon ugalzer abdida ko Bruxelles va Charlotte dositar. Moi awalkera ke sinafa ziavikya, ko Haworth tenon dimpir. Bak 1845, Charlotte va inaf nubasuteks va ezleem kosmar nume va finera gu Emily ta sanegara soltiolter. Bak 1848, tandon arti sanegara va berpot, golde kotcakola Emily Brontë mulufter, vewayason va kota selaropafa tcicera.

Intaf tanoy berpot Wuthering Heights ( dodeson sanegayan bak 1847 yoltoe Ellis Bell ) va kiewatcanya war kore me tir lion dam Jane Eyre tel miltandon sanegayan gan Charlotte berya. Katcalaf gu suterafor is remaynustuca is ilkapafa berpotevaca turestayana gan tela germanafa, yoke nouca in fereon al zo dolunyer do ellasafa ok Shakespeare folva. Voxen enkagrupesuca titir gavefa ise norluca ke Emily Brontë anton moni tena ke XIX-da afton tudenaweter.

The Dinner Party ( Ayikyafa jorestura ), sposafa ayikyevafa yambaxa ke Judy Chicago (1979)    The Dinner Party
   Miwanikya (34-e deba)
 ( 3-e berk )
Emily Jane Brontë

Emily Jane Brontë

 Koblira  30/07/1818,
 Thornton, Britana
 Awalkera  19/12/1848,
 Haworth, Britana
 Vedeyot  Britana
 Ava  Englava
 Suterind  Ezlopa, Berpot
  Suterot 
  Tuveli icde Suteroteem