Lyudmila Dementyeva Terentyeva ( rossiavon Людмила Дементьевна Терентьева ) tiyir rossiaf artowasik. Koe gola ke Xerson koe refa Ukraina vox savsafo rossiafo gindaxo bak 1862 kobliyir. Koe Sankt Peterburg bak 1883 awalkeyer.
Lyudmila Terentyeva koe yasa ke kulaf pirdotik tavesik ke vedeyafa olda kobliyir. Yasa tiyir pokefa gu artowas rieteem : tane berikye Mixail ko Kara xalta ta poana kobara zo rezgaleyer ; toleafe tise tavesik ko Kavkaza dere ristulon zo divbliyir. Batdume Lyudmila va kevbowerefa tegira waveon vilteyer.
Koe Mariinski ayikyafa olda ke Odesa vayayar. Bak 1878 zo dobayar. Azon va Narodnaya Volya grustaks denfiyir.
Bak 1879 do Rossikova is Yurkovski va fobara va koaykaxe ke Xerson paker. Bak diref ilanacek do Nikolay Kibaltcitc is Praskovya Ivanovskaya koe birgotafe rubiaxe ke pako kobar.
Jiz va 20 ke Narodnaya Volya (1882)
Jizanik
Арончик А. Б. — Ayzik Arontcik : parmafa xalta
Баранников А. И. — Aleksandr Barannikov : parmafa xalta
Емельянов И. П. — Ivan Emelyanov : parmafa xalta
Златопольский Л. С. — Lev Zlatopolski : 20 tanda ta poana kobara
Исаев Г. П. — Grigori Isayev : parmafa xalta
Клеточников Н. В. — Nikolay Kletotcnikov : parmafa xalta
Колодкевич Н. Н. — Nikolay Kolodkevitc : parmafa xalta;
Ba 02/05/1881 koe Sankt Peterburg zo soper. Aze koe Petropavlovskaya ralma zo dagir. Gu Jiz va 20 ke Narodnaya Volya zo kojizar. Ba 15/02/1882 zo tugunar ise gu zelara va rokeem is poana kobara koe xalta bak tol-sanda zo lanzar.
Ayikya lanzayana bak bat jiz, Lyudmila Terenyeva is Tatyana Lebedeva is Anna Yakimova ko Kara xalta koe Sibiria zo gostakseyed. Soe Lyudmila Terentyeva koe Petropavlovskaya ralma bak 1883 levgon awalker.
« [...] L- Terentyeva yikya, i tan lanzanik ke jiz koe Odesa, levgon bulon awalkeyer. Dumede walton co zo jivayar, nope fixara va jiva ika selaxa. Wori nisu al exuled, i nisu ruyesu da kimtikya co zo boeyer aze zo jivayar enide gomilara di zo mastuyur. Tire, inafa awalkera gan ticefa rictaga ke ardial jontikedje zo gubirgayar isen meka kogrupara me zo sopuyur. Toloy selaropik va intafa runda videyed. »
— Sergey Kravtcinski Strepnyak pulvis va Lyudmila Terentyeva koe « Подпольная Россия », 1885.
.jpeg)
