Pone ke mawakwikya (suterot)

Pone ke mawakwikya

Pone ke mawakwikya, sanegayane bak 1900 dene Fasquelle piskusik, tir losposaf berpot ke Mirbeau. Taneaf abdisiatos ton skulta koe Écho de Paris fela wali 20/10/1891 is 26/04/1892 awiyir, edje berpotik lidon is suteroton astirbon deoneyer nume voldjumeson kobayar ise va suteks ta karbakorafa sanegara me lasutuwadayar. Toleaf siatos fabdupuyun koe Revue Blanche mudreyfusafa virda ton sanoy driz wali 15/01/1900 is 15/06/1900 zo sanegayar, trabe moi Dreyfus arienta. Mirbeau va taneakaf siatos koeon voneper, ton azafa buxa is epicara va krent, ise va nelkafa tegira bak arienta arrundayar. Bal karbakorafa sanegara, va toloy luz medenon tikis va poneusa mawakwikya tere loplekuyur, nume va berpotafa rofolinuca kaikkonayar, ape enide berpot wetce ilkaden tuwavevaf berpot me di zo pulayar. Berpot koe toktenaf amlit zo kazawayar isen felaf munesteks di zo tiyid mat. Voxen dolena kiewatca tiyir akenafa : 146 000 tulok bak blira ke sutesik zo doleyed.

Kumsetura va prekseem

Berpotik va ponekoruca narayar isen luz vere lodam malsetikeson zo evlad ise zo sutelad kiren batcoba nover da in va fart walrukomas va darekeugal gu rekeugal darpe setikera kevplekur edje nega va sugdala is saipuca radimion vankrister ise va blira ke kot askisik gu bali toz artazukar.

Isen koe pone, aotcera va kom is oxi kare aflica ke negasik tir rotisa, is ke berpotik meviele iskes va dilintafa tigira vulkuna, numen batcoba va joara va conyuca ke prostewaf berpot is drowigafa mukoduca ke lanyon berpot nurutis geltrevaf dere weber. Detceikuca ke pone dere guntar da belisik va dile mekasaf siatos va munesten bifeem kazawar. Batkane, laxubuveson va kera ke belisik, Mirbeau va meka lanuca icde gunuca ke Joseph vanburer, i ke Joseph uculen gan poneusikya gu boera va rumeikya azu aytara. Ostik, da kalira ke Célestine mawakwikya zo askiyir, pune batcoba miv en tiyir kaikkonara va tarkana suterotafa vexura is dere seltardil, kiren opelafa « leveikya » somesuteyer banugale suteroteem nutiyir an ind ke felisa seltpula batkane dadisa va antoka ke muxara num rotarkanuca.

Voxen pone ke Célestine osk me tir warzafa tula ke rotura va suterotaf agvaveem, voxosk tir xeka zanisa va kumsetura va prekseem is grivundara va selt. Kire dere jupar da va tisik is ra rem ludottrek remzawat. Kan disukera ke poneusikya gidivucomasa va iteem is yoy, Mirbeau jupar da va erupaja ke theatrum mundi wenya is koekuca ke digisikeem denfit, i ke winkaf glastedikeem ( tel ke Lanlaire yasa, dem vertovaf yolt, konoleyesa va dilintafa meturomalyana tufa nope beyasaceem ke « poraf » abdigadikeem ) is ke lokulupafa parisafa pula. Jupar da va nasmerlaf kakak ke koranyikeem kosmat, is va yon « lidaralk » ke felis puleem isu straca ke glastaf selt, i straca gubeon palsena leve nedina poruca, tulon kotindafa ikrafa diavaca, don tela lofinutafa tisa stagakola ke Rabour weltikye va twinda. Va xatcaxa ke rotarkanuca ke gijarotiik to daavapon soltiolter ise va sinafa zionafa grita joxar ise va sinyona jogiaca mastuna kak listafa « koneja » anton restesa va ixakik divnedir.

Seltafo kusto, zaxara is merla

Berpot wetce gaaropafa vestara va seltafo kusto zo envar, numen Célestine ( dum Virgilius ) zo vuidar enide va inyonu ivamu di zo remstayad isen nasmerlaf dakeleem di zo kabdunedid. Tire, edje tir xeyeyese koe widegama ke Normanda ( Le Mesnil-Roy ) dene Lanlaire warzaf unesikeem, pune va kote une kereleyene mali konak tanda koe yona loporafa kodia darpe setikereem is bruxa divrozar. Voxen anton awion kodia tid porafa kiren felisik loote tid mimbik. Arti bata koyara reme gruspera ke strabikeem, fonkaf belisik doon Célestine gwidon is jaxadason gorabater : « Beka drendik tir loeke krizaf, pune sometir lion dam porateldik. »

Voxen zaxara gazasa dene digisikeem va kwikeem adre tuyicar. Tove sin blira tir kusto, voxen jontikviele bro miv Célestine, lodamen sin co tarled ise va sint co grustad enide va murkafa is volmwedafa vura di kumsetud, pune va silukafa vansara va felisikafa ravalduga gu antafa bexoda torigid. Witaf tazuk ke levetiruca, gropa ke monazanisikeem gan Célestine bueleyene gu durulafa vofatca gan berpotik zo rankecker : « Lantan espud da levetiruca mea tir... Ax ! to kranderanya, en... isen kwik, toktan kle tid, me levetirik ?... Levetirik tire, dem kotcoba tikisa va lidafa parodjuca is merotarutena avonara is kevmadara nekisa va boga. »

Sedme ine, kwik tir « punaf » tisik, i « stezaf ayaf gamdarulik » « mea tis ke sane lizu divfir », vox soe me tis « ke glastikeem lize blir ise liz djukofir ». Ede kot levetirik ke witaf ugal gu widluca is kaiksavera is gronafa plukera zo lanzar, pune ostik mawakwikya gu ogaf ikrakobasik zo gilaskiper, numen bat sok fereon tir taneafa bora van tresewera. Tana fega ralentamba va Célestine dye tir inafa nuera va rotis dulap vas kaikfira va fertusa jowa num kotresexoara. Voxen Mirbeau icde tarlesa rotira ke kwikeem vol bidger kiren ban in evon zo ripindar ise cugviele gan felisik zo avonar. Dace Célestine, nekev intafa vofatca isu boikera, tere silukon vanpir dalik nume va zanisikyama koe zazda ke Cherbourg poaster liz va Joseph matelik al dositar, i va variaf Joseph tukulaweyes nope djastasa dubiera va dilgavafa porma ke Lanlaire isen Célestine dace trakur da in va Claire rumeikya boeyer aze aytayar. Voxen, ton ontinuk ke awuzara va belisik, ine dace belir da va bat in « kal gomil » djuproyoter... sedme bocaf ravlem ke pone...

Kan Joseph koredik, i kan bewik ke kota kevsemitevafa gluyista ke Normanda, Mirbeau va ewotara va pakoikeem ke abalt is praka ektudar. Kiren bat welimaf is stivawes Joseph ton perakekorafa laniga tir variik djukadakis va ilblira ke kon nudol. Berpotik plataer da di zoltet da dandara ke kevdreyfusevik koe perakekorafa oria suyon tigir isen vedeyevik is kevsemitevik dure iegas va « Yudik xonuked !!» en tid tec adjubesik, isen lyumara ke mudreyfusevikeem en tir tela ke Afi kev Mielak, i tela ke nuyafa trakura kev dine volaye ke kot ayik kir tis vey snavolap. Milinde, kan govitafa seramuca ke yon kategirevaf kwik tove rolaf vodeem ke felisik mesidjeson ksudan ( ervolia is gazaroti is erba ) volmiv vangrupet da ant straf is siaf olkik evon ripindan gan aldo ke levetiruca, gan tudrowigasa ewapa vas guga ik olueba is alka ik poruca ware zo rotester.

Da Célestine poneusik va intafa keviera gu seltafa memalyuca do min lajuwalzilir, to kire va fam kan dofa lyumara miv me roplekur. Inafa mivokafa keviera duvuna gu « situndasa oviskaca » tid a wana ise en di nijud volwarzesafa tove ine is mefakafa tove kot artel. Ant inafe pone, sanegatane gan berpotik, va enekefa keskanya koe geltrafa blira ta tutenara va kwafa levetiruca di ronekir. To blirafa boikera vrutana gan pone is dere tisa tela ke Mirbeau, va kodiblara va mila levetiruca remi vieleafa is plukesa skintura balimon nalena weber. Sedme Célestine, kwik « tid levetiraf vey fortey ». Valevi Sartre, Mirbeau va nekira va blirafa merlerapa ke belisik tire ektudar ise va folve ke ayafa gropa koafir, lingeson va vieleafa blira do inafa varafa vlarduca isu zugiuca isu forduca. Voxen kan diola ke martig is tuke grelera ke ravlem jaxadas va minaf rotokeem, kevjivaf berpot klabon nijur dezus is tudaavas numen merla kadar teca kreda ta madawera.

Dere rupel

  • Octave Mirbeau : Francavaf suterotik isu felik ( 1848-1917 )
  • Pone ke mawakwikyaLe Journal d'une femme de chambre ), kalkot- 2012 gan Sabrina Benkelloun, Wikikrenteem dotay, banliz
Pone ke mawakwikya
XANTO
Vergumvelt Le Journal d'une femme de chambre
Sutesik Octave Mirbeau
Ava Francava
Suterotinda Berpot
Evla 1900
betara teza
  Tuveli icde Suteroteem 
Pone ke mawakwikya, taneafa xantofa piskura ba 1900
Célestine zovdayane gan Jeanniot yunkesik koe taneafa sanegara bak 1900