Tamavafa gadakiewega koe Koteivoira

Bat teliz va kot debak bendeyen dene Tamavafa Gadakiewega ke UNESCO koe Koteivoira otular.

Bak 2018, balemoy debak ke Koteivoira tid ke winugafa vexala ke Tamavafa Gadakiewega : 1 arayaf is 1 tuwavaf is 2 aotcaf.

Winugafa vexala

     Bat debak bevular iyelaf

	Grand-Bassam	Welmot : 1.10 km²
	Arayaf debak bendeyen bak 2012	Ludeem : (iii) (iv)	UNESCO otuk : 1322
	Debala : Grand-Bassam Gola	Maneka :  5° 11' 46" L-, 3° 44' 10" T-
	Taneafu kelu ke Koteivoira, Grand-Bassam izvafa widava tir boniaxofa widavafa tula ke tena ke XIX-eafa decemda is taneafu acku ke XX-eafa decemda. Va azedera ton revava tuaptana gu kaza ok ristula ok europafo irubaxo oku lizukafo tarkar. Debak va Nzima afrikafa onasa wida dere ruldar, is va konaka tula ke boniarafa vegeduropa, i va tulon flifa mona dem lupaxa ik tciga is jontika matela. Grand-Bassam tiyir moltafu is skapafu is malyerotafu kelu ke Koteivoira ; va birtafa seltafa skeda wal europik is afrikik az lizor mu volruptesuca vrutackar. Widava tiyir skapaf rizack ke tawavo dem francafo kazaxo kene Guinea pargalu, abdi witafa Koteivoira, ise va yona sanelia mal cuga coyunta ke Afrika is Europa is mediterraneafa Asia al koimpar.

	Taï vedeyaf gerd	Welmot : 3300 km²
	Tuwavaf debak bendeyen bak 1982	Ludeem : (vii) (x)	UNESCO otuk : 195
	Debala : Bas-Sassandra Gola	Maneka :  5° 45' 00" L-, 7° 40' 01" T-
	Taï vedeyaf gerd va tana ironokafa stabregapa ke taneakafa bwaala koe taltefa Afrika tadler. Kulaf tuwavaf ruxeem is dratcena moukdunolafa katca dum klodaf troskol is san-tanoya jidolafa apta va opaf dulapap atoed.

	Comoé vedeyaf gerd	Welmot : 11500 km²
	Aotcaf debak bendeyen bak 1983	Ludeem : (ix) (x)	UNESCO otuk : 227
	Debala : Zanzan Gola	Maneka :  9° L-, 4° T-
	Comoé vedeyaf gerd tir tano loglupafo nendaxo ke taltefa Afrika ise tir adalaf gu gedrucapa ke ruxeem. Comoé bost koonis va gerd, va tigira ke gesia dem ruxa gubeon anton trasina vagee patecta divecker, i tulon ke lucameila is vema dem ekemafa abdaala.

	Tuwavaxo ke Nimba fluvor	Welmot : 180 km²
	Aotcaf debak bendeyen bak 1981	Ludeem : (ix) (x)	UNESCO otuk : 155
	Debala : Dix-Huit Montagnes Gola	Maneka :  7° 36' 11" L-, 8° 23' 28" T-
	Tigis kimon ice Guinea is Liberia is Koteivoira, Nimba fluvor va anamefa meila sofelir. Datceem besanaf gu ekamafa aala tite webekafa garba va kulapaf ruxeem isu fled ruldar, dem lizukafa apta dum gemuinda ( Nimbaphrynoides occidentalis ) is zegol malsaves va raporki ton xeka.