Ayafa gropa (suterot)

Ayafa gropa


Ayafa gropaLa Condition humaine ) tir berpot ke André Malraux sanegayan bak 1933. Tir bareaf is bocaf telvung ke inafa asiafa barneva, radimi Yon olgalicusikLes Conquérants, 1928 ) az Gazafa joyaLa Voie Royale, 1930 ). Gu Goncourt Suterotafo Poradro zo gabler.

Vildeks

Ayafa gropa va exulera ke doevaf artowas yiktum ( Tchen is Kyo is Katow rossiikye ) levegas va kevmadara koe Shanghai widava pwader. Nega ba 21/03/1927 tozuwer viele doevik is vedeyevik va vintera kev refe bowere oged. Sinaf nyapay tir : « Volto vegeson zo aytat. Meie aytat. Vaxe nyudik. » Va verkafa artlanira ke milk ke Kuomintang ked, i va milk dirgan gan Tchang Kai-chek is gopomatas va konarira va roti ok icle vetrovgara.

Berpot batinde tozuwer, rontion rundason va belisik ist tegira is vuidara ke Tchen : « 21 ke bareaksat ke 1927, miamiel is acku. Kas Tchen va valpokitalk lamadatar ? Kas remon tazeter ? Pola va inafa uvoona mucuyur ; va intafa acuca grupeyer voxe batvulon anton vonageson rodetrakur, drolenon gan bata batakafa layezba akeoyesa male pij moe lano alto rowino leon dam izga is lizu bata nuga blagamayana gan moda divniyir, i moe alto soe bliso is tiso cot ke ayik. » Inafa vuida tir opelafa voxen in kalion gotegir, dadison va tanoy mielcek ; direvielon gazdon vintera di zo bokar.

Vuida ke Tchen tir falura va ervovaj. Ta batcoba va ervobutcasik gokatrasir aze aytar ise dubier. Moi nubemara, va inyona eluxaxa konarir numen Kyo is Katow va bildesi lipi rodimnarid enide koe molt va ervoeem divtotayan di dimdigid. Kyo is Katow zoben gan Clappique tremkik va ervo pu birgotaf lyumasik ke intafa lospa tcastafa koe kotafa widava kle rotanamzilid. Mielon waroldon gotegid kiren vintera direvielon zo azenter.

Gazdon direvielon, wideytafa geja zo bokar : viel ke dimblira sokir. Milk ke Tchang Kai-chek jadiwik kake tuvel ke Shangai widava tigid isen artowasik va meld kev winugafa ervolia oklon is drikackon mowad, i va fakafa cenera tuke pakon lizukafa sanelia pomayasa is levdafuyusa va vask is bliga, kev sokaf ardial vollyumayas kir merodevornayas.

Ostik, lan gijarotiik zo atoer, i Ferral dirotevik lajubuives va seltom dem arientik is ja is zonostesik. Enide in gu Tchang Kai-chek jadiwik tore olgalicus va widava az poon kostujes di kavangluyar nume fukorlason is ugon zober. Ferral ozer da kaiki vetrovgara va roti, zonostera titir impavantakirapafa. Ferral va Valérie fertikya dikir voxe tarkansar : nobar ant viele djumer ise va dik warzot dear.

Cenera gan milk ke Tchang Kai-chek jadiwik drikon zo war aze rape doleray exoneyen do Ferral ban in is rabandenyeyena ervolia va artowas doevikeem vajiker. Tire Tchang va diliukara va lobecafo po abdualbar numen vintesik va askira ke Kuomintang pako voltegiso dwid. Ferral me tir ayafamik ise va intyon dulap lagiwodar. Tire va intyona tegila ke ja tigisa koe xo dratceno gan artowara is volvura djunendoyer. Inafa kimiskafa bitonuca kan bat trogarn zo pimtar : « Korcafa akola dem kuranira va gruadafa gijarotiuca tir to kuranira va loruca : kot ayik va lorikafa tira soklokar. »

Jadiwik bam diner da doevik va ervoeem daykad ise duntud. Kategison va bata surtera is dratcera ke milk ke jadiwik, Kyo rupeteson va Komintern grustaks ( gades va doevikeem rape goraks ke Rossia ) ko Hanku widava mallapir. Benplekusa Moskva dakter da zavzar mialodafa tove bat sayakaf uum nume va doevikafa kevmadara malpour. Tire dum doevafa idja, Kyo va axuca ke doevikafo po koe Shangai sonker nume zo awuzar.

Kyo kle dimlapir voxe me grupé ta grielekara va debala va coba loon co rotaskir. Mali intafa forteyafa gomilara, luxeon Tchen va rontafa tegira adre tupakoar numen batcoba va vidura va tizuca is pisonara tod olegara sugdalar. Va rieta adjubesa va Tchang Kai-chek pu gadesik ke Komintern bam drager voxen ina en zo grivanovar. Soe metan va Tchen laweyonar.

Va doevik idjon gu ristar gan ervolia ke roti djukuselusi va kevmadara katrasit, isen to batviele Clappique kosmar da int is Kyo gan ardial zo kaaneyad ise zo dratced. Va Kyo deneon metigiso gu kalobrara giopon lawalzer. Givatason Clappique va ino ko zazda koe widava kakevetcar. Kyo is May dositikya ta kakevetca lanid voxen Clappique ba bartivack va erbetsa al kovefar. Va erba ta dodera va koyara num mallapira. Nume va kakevetca mevofason kelur.

Tolonga gan ardial zo soper. Clappique mu sinafa tunuyara lavezur voxe me kiewaskir. Tire debala adre turotawer. Miledje Tchen rontion ixam taneatomon lagadjubeyes va Tchang Kai-chek jadiwik, banviele lomulon rietar : kserabilmara « ta lokase tcedera ».

Soe Tchen va finges direm moi tel ke jadiwik moebidur nume bulfeson va mukot, mu mecoba xonuker. « Awalkera sotir levgasuca voxen ksera sotir tegira, ~ kaliyir. »

Ferral va Tchang Kai-chek selus va vintera loeke luxeon djukuzober kiren trakur da batcoba va intyon erbadulap di rotukuvar ise va inafa gaderopafa gijarotiuca laumar. Do Valérie fertikya ta kakevetcara va Tchang lapir. Voxen gan Valérie zo tukipear numen kakevetca dilizejer. Ferral tere zavzar antaf voxe va yawara me batcer ise wan laner da va roti loeke tere watar.

Ostik Hemmelrich moxinon kosmayason va stakera va intafa yasa gan milkik ke jadiwik, gorar da va « intafa ayafa gropa » nuyon re rokaikfir nume va Katow kev jadiwik is inafa forteyotafa ervolia tori bocafa doaliera yolton gu yasa kazokever.

Nega va tena vanfir, viele Kyo moi sopera do jontikar dositik koe flint tigir. Kyo zo fegar gan König ardialokilik. Va relmera ke intafa staba ok nakera kali xonukera gonarar. Battode ok bantode Kyo co zo tuzionar ise va intafa « ayafa gropa » dere co drasur. Kan cyanure buca djukukser. Katow va kallikera va nakera is mejera luxeon takrelon gorar nume va intafa bucurepta pu aryon siniaf stolenik kivas va nakera tiskar.

May is Clappique is Gisors is Hemmelrich luxeon lajuremblid aze koe Kobe widava koe Nipona diliodon blid lize va int malad ise kliwud beka May gire djudoalier.

Ferral van omelt is bowere koe tulon Paris luxeon xultur. Va rotipi re dadir.

Dere rupel

  • André Malraux : Francavaf francaf suterotik isu gaderopik ( 1901-1976 )
   Goncourt  Suterotafo
      Poradro
 : 1933
Ayafa gropa
XANTO
Vergumvelt La Condition humaine
Sutesik André Malraux
Ava Francava
Suterotinda Berpot
Evla 1933
betara teza
  Tuveli icde Suteroteem