Bafela ke diveavik (suterot)

Bafela ke diveavik Bafela ke diveavik tir stuvaf berpot ke Jules Verne sanegayan bak 1899, tis tana karba ke Yona zultafa koyara nevatum. Vildeks Bat berpot va lana etsa ke goyolomba vwon ice Tanarasokeem munester, lize kot lujor vas tangaldolk ke patecta vadjer. Neva bak 1897 zo suteyer. Pwader inde tan kulapaf diveavik va tufa pu tan irubasik ke Chicago djukuriskemar. Batenide, moi inafa awalkera, xuyavara zo grustar numen tevoy « falik » zo dasugdad. Voxe ta gotura va datan kodigitis va gojena tufa, va goyolombafa etsa vwon ice Tanarasokeem gonaskid. Ba awalkera, nope bocafa kuranira, den Tornbrock tegivsutesik, William Hypperbone va bewik ke Excentric Club boxo ke Chicago ganer, lize intafa bafela di zo belir. Konak korik gan tegivsutesik zo xuyavad nume va « oluafa omba ke Tanarasokeem » ropaked, i va omba dasugdasa va wasik va konoleks ke kulik. Toleik ke etsa va oyeem dodeyen gan ombusik regayuyus mo zersas lujor luxeon watar. Coba tuesawed viele bulaf pereaf elicesik gu etsa va int loplekur... Koredik Tevoy kalaf konolesik tid : Max Real : luntafe lingese yambikye vey francafa xanta. Dure aflicer ise kottode linular trakopik. Inaf nilt tir kadule. Tom Crabbe : ficikye, ontinafe vas peroye nuge, inton funtese dum nubutiusik dositanon gan John Milner funtesik remi varafa koyara, is vieleon tevon estuse. Inaf nilt tir kaduluke. Herman Titbury dositani gu Kate Titbury kurenya. Bata tolonga tir tec totcidik. Inaf nilt tir falte. Harris Kymbale : felusikye ke Tribune fela. Va teliz icde lizukafa rilitaca wina bal koyara vieleon suter. Inaf nilt tir kuse. Lissy Wag : jotafa is listafa dolesikya ke doltapa ke Chicago, dositana remi koyara gan Jovita Foley dokobasikafa nikya. Lissy tir tixolafi is vazafi solve Jovita tir axigafa. Inaf nilt tir blafotaf. Hodge Urrican : fredindafe is zidesafe birelikye, tise totas redakik is dositane remi koyara koe Tanarasokeem gan sagaf Turk savsaf birelik. Inaf nilt tir kramteuke. Pereaf bulaf elicesik loplekuwer. Gan Tornbrock tegivsutesik zo razdar ise kan XKZ- eltaytum anton zo dasugdar. Inaf nilt tir kere, bocafa kseva ke korfiutsala. Yunkexa Konaka yunkexa va berpot, koe piskura ke 1899 Dere rupel Jules Verne : Francavaf suterotik ( 1828-1905 ) (fr) Bafela ke diveavik, dene Wikisource ( xantokrent ) Vuestexa

Bafela ke diveavik XANTO Vergumvelt Le Testament d'un excentrique Sutesik Jules Verne Ava Francava Suterotinda Berpot Evla 1899 betara teza   Tuveli icde Suteroteem  Moek ke taneaf piskuks va berpot bak 1899 Goyolomba ke berpot