Baroy vayasik (suterot)
|
Baroy vayasik ( englavon The Adventure of the Three Students ) tir berpotam ke Arthur Conan Doyle taneon sanegayan bak 1904 koe Standard Magazine virda az direilanon koe Dimpira ke Sherlock Holmes berpotamak. VildeksTozafa bulaEdje Holmes is Watson koe meyoltana kotlafa widava ( ape Oxford ok Cambridge ) tigid, pune Soames tir gadesik va Saint-Luke kotlaki isen lane elice icde ellasava direvielon fu zo grustar, dem waks va vayarafilav mu wasik. Titi kielcek, Soames va flideks kazawayar aze trumason beliyir aze moe baza iskeyer aze konakedje graceyer. Viele dimlaniyir, pune tulok ke flideks moe taneafa runda mea tigiyid numen batcoba wazdeyer da kontan al rupeyer solve zo gotubirgayad. Ison tana tselka ke bazaxo bene ludot ke tuvel zo katrasiyir, i tselka volins iskeyena gan Bannister kwik. Soames kivar da kon vayasik va bata rola ke Bannister co impavantayar nume co kolaniyir ise va flideks co rupeyer, batkane vurseson ta seotara va vayarafilav. MaeraSoames pu Holmes is Watson ruyer da va kwik en dirnur. Rindeteson va bazaxo, sin do Soames mallanid. Kogrupasik va basalmaks ke ogalt is diblaki satcon trasir. Da valdig me zo dimplekuyud voxe poke dilk zo iskeyed radimida kan ogalt lavion zo malsuteyed, batcoba wazder da zobasik va xo kerujon buluyur, zdarion memastuyuson va vimubaca ke pira. Acum Holmes trakur da bantan va xo oxam buluyur viele va borompe ke Soames koo plor gildeyer. Neken meka divlanira rotiyir, vaxe tuvel lente mawa ke Soames. Kogrupasik va bata pokeyafa olkoba kodisuker numaze kadime marwida va mila diblinda dam tela tigisa koe bazaxo katrasir. Zobasik banlize kle vaskeyer aze yateyer viele aneyatason va Holmes is Watson, Soames mallaniyir. Azon Soames va kogrupasik givar da ant baroy vayasik dadis va kraba moe mil vegem va tuvel ke bazaxo gikabduolanid nume va tselka koe ludot rotir wiyid. Bat baroy vayasik tid Gilchrist ( utiuse yikye ) is Daulat Ras ( baratafe vayasikye ) is Miles Mclaren ( grufe nek ugdafimafe is tcastafe is mewegayese yikye, sedme Soames ). Holmes va kot battan koe inafa kraba auzur : toloy taneaf vanyed oluyaf voxen bareik va tuvel vol djukufenkur, ruyeson da va ugal me dadir kire va direvielafe elice kobaver. Tila ke Mclaren tire tutubizar. Holmes va xo waroldon bulur. Direrielon, Holmes pu Watson ruyer da va zobasik al kosmar. Kogrupasik mo utiuxo al lanir nume va ebeltafa kuritca favena moe grablexo al kosmar, isen bata kuritcinda vas diblinda trasiyina koe bazaxo is mawa ke Soames en vadjer. Batdume uculera ke Holmes va Gilchrist vanfir. Dim bazaxo ke anelik, Holmes va Bannister is Gilchrist volmiv tagar. Bantan va zobara tere welidar voxe va twa darevielon sutelayana atoer, i va twa daktesa va inafa illibura va ellasavafe elice kire ko Rhodesia fu mallapir Bannister luxeon welidar da va Gilchrist besayar. Valevion tiyir kwik dene gadikye ke Gilchrist nume tiyir vadulaf gu yikye grupene mali rumeugal. Viele gu zobara gan Soames zo walzeyer, pune va lana toba moe iriba digina gan yikye vere kagrupeyer numaze mastutuson va bata wazdexa banliz debanyayar, yontason da di godimduntuyur. Tere Soames va mallapira ke Gilchrist malnaler numen vartuca ke tcema zo nendoyer kiren arienta pu metan zo razdar. YunkexaKonaka yunkexa va berpotam, koe sanegasa virda bak 1904 : Dere rupel
Vuestexa
|
 Tana yunkexa ke taneaf piskuks va berpotam bak 1904 | ||||||||||||||||
.svg){kind=icon}