Bilita koe Ceska (suterot)

**Bilita koe Ceska**
	XANTO
	XANTO
Vergumvelt	A Scandal in Bohemia
Sutesik	Arthur Conan Doyle
Ava	Englava
Suterotinda	Berpotam
Evla	1891
betara	teza

Bilita koe Ceska

Bilita koe Ceska ( englavon A Scandal in Bohemia ) tir berpotam ke Arthur Conan Doyle taneon sanegayan bak 1891 koe Standard Magazine virda az direilanon koe Yona stuva ke Sherlock Holmes berpotamak.

Vildeks

Tozafa debala

Ba 20/03/1888, Watson selaropik ko lipok ke 221B Baker vawila lanir enide va savsaf doirubasik di gire wir, i va Sherlock Holmes kogrupasik. Bantelye va bulafa twa rielon kazawayana. Ina tir evliskafa is mesugdayana voxe va pira ke megrupenik batliz ta tixolafa rupera ba bat siel dakter. Guvideteson va ayoltuca, auzusik titir xatcaxakiraf.

Lana pinta askid da Holmes is Watson maltrakud da twa tir bas igeltafe germanavikye ape vofe gu Ceska gazaxo. Auzusik artlanir : Holmes erur da Watson di zavzagir ise va dopulvira di tcoker. Xatcaxakirikye kolanis va kraba ke kogrupasik dakter da tir Von Kramm biptik ke Ceska. Holmes me zo ortar : konaka bazexa askid da vangruper da lentegisik enwe tir Wilhelm Gottreich Sigismond von Ormstein, trabe miv gazik ke Ceska. Bantan gan endayuca ke kogrupasik zo ergayer nume va xatcaxa mo sid mimar aze va auzusa lazava diver.

Weti alubda, auzusik men tiyir gazik ; va Irene Adler jotafa britanafa dankasikya rungrupeyer aze skedegayar. Bat yik ware irubas koe London va afigasuteks va sinafa memwedafa tolonga digir ise dratcer da bal daktera va aguntara do Clotilde Othman von Sachsen-Meiningen sersik ke Skanda fu tusanegar. Tanoya danda ke Irene Adler dasatasa va gazik nutir lickuca. Kurera wal toloya gazafa yasa arti barka sye zo dakteter isen dobulafa bilita arse zo gotaruter. Gazik malerur da Holmes va bat rotplekus afigasuteks di koilkar nume gu moavaf 300 £ talolk is 700 fizud abdiston viroyar.

Kogrupara

Holmes va kogrupara ba gazda ke diref viel ant djukubokar nume va Watson selaropik tori bare kielbartiv koe Baker vawila kakevetcar. Watson eldeon ba bartivack tigir. Holmes gaveson artlanir, efuyunon gu okolxef kwik. Va aboz deswar aze kalkiper aze va fiukeem ke rielcek pu Watson vilder.

Ba vanafiz kogrupasik va Briony Lodge sokexo ke Irene Adler al lanir, raveteson va inyona giltira bas iremstasik ke revava. Holmes batkane zo givayar da Godfrey Norton yoltkirik va yikya gilauzur. Tire, bantan va garia laizon artlakiyir aze kan riniz kerujon mallakiyir, radimelaninon gan Irene Adler kan yasegaf irem. Holmes va yikya deasa va mane vas Saint-Monique uja pu stasik gildeyer. Va ar riniz radimelakis dere mekeson rundanyayar. Bevulason entaf worasik, koe uja zikar. Va mulafa kuresa fipta ke bat toloy onkan yik tcokeyer. Ostik, Godfrey Norton va vrutasik kucilan gu tuenara va kurera me dikiyir, batdume pu tele antafe ayikye banlize banviele tigise goyaneyer, trabe pu Sherlock Holmes govoyordas. Kogrupasik tire wotron vanpiyir vrutasik va kurera ke Irene Adler.

Kogrupasik krupter da tcokeyena nakila va dratcera va gazik ke Ceska sye fu kastar : ede Irene Adler re tir kureyen, pune mea godulaper da va savsafa memwedafa skedegara co razdar. Soe jupekatason va vuida, afigasuteks fu zo godimnarir. Kogrupasik gruper da yikya moni pere sielbartiv sye dimdenlakitir nume pomanon gan Watson djukusuzenkar. Bantel kal Briony Lodge godositatar aze koe nuda keter. Va vikizaxa rem dilk kabutur viele in zo fenkutur, aze stubeter, iegason va « tey ». Holmes va int ton gertik efur azen toloy nik van Briony Lodge belcon mallakid.

Irene Adler sure dimdenlakir. Konaktan va sint nokied, djufenkuson va tuvel ke inaf irem num yovurkatambon. Mijera ve dilizer : Holmes efuyus ton gertik maltegir ise va mijesik lasugriuziar voxe kev gexata zo dendar. Forteyapar ; den Irene Adler zo kostar aze mo saxa ke bontay dimduntutuson zo ser. Buivepeson yordar, ruyer da va gael gracir nume erur da dilk di zo fenkur. Watson va vikizaxa bulkayana gan Holmes komimar aze va fird iegar. Irene Adler zo elogar nume ko bontay iper. Van vask kadime lana bopica va int vodjur, djuprodimnaritison va tciamaf afigasuteks. Azon, kosmason da debala tir elogaraja, va in dimaykar. Artan koe olkoba tigir numen Holmes va afigasuteks me rokoilkar. Gojeks soe su zo tcaluter. Kogrupasik va Watson koe nuda katrasir azen sin kal Baker vawila belcon dimdenlanid. Holmes diver da va mijera do dofugik al grustar. Aze ko Langham gida sumesuter lize gazik ke Ceska zo vistaler, ise erur da bantan ba riel direvielon denlakitir enide va afigasuteks di dimdigitir nume va arienta tenuketer.

Dum sye, gazik ke Ceska kev Baker vawila ba eldeviel artlakir lize va Holmes is Watson katrasir. Baroy korik kal Briony Lodge belcon lakid voxe zo evodad kiren Irene Adler bak mielcek va xo al bulur, ilbureson va digikseem. Tanoya kwikya ware zavzagir ise va tuvel fenkur. Holmes va vask kaljoxar lize gojen afigasuteks tigiyir voxe va twa sugdayana gan « Irene Norton » mu int anton kosmar. « Va vlardafa begama trasitil viele eldeon pitil. Luxe lan afigasuteks, rinaf anelik godwir ‼ Rená ise zo rená [...]. Gazik rotegitir inde djumaskitir ise va ayikya uduton kantayana me craketer ». Yikya koe twa diver da al vangruper da gan bate gertikye al zo relmeyer, i gan weltik arse tis Sherlok Holmes sonketeson suzdayan kal Baker vawila.

Nekev tinerama ke kogrupasik icde bata arienta, gazik ke Ceska gan bata staksa zo keldaskir, i gan staksa ozesa da rotplekusa twa me zo tusanegatar. Twa ke Irene tir do afigasuteks va ine. Holmes dimnarir enide va bata arienta setiketer kiren inafa endayuca gan ayikya zo edobeyer.