Bilmara ke Aniche (yunkexa)
|
Raston gu arotievafa deona, bilmara ke Aniche kre tir teci moxinafi mi ok kotavesa kuda. Solve momasiko ke Lumière berikyeeem va tari watson gu sisten sistesik relander, pune feleem va Clément Decout balger, i va tueaftan eaftevik, i va foban fobasik, i va adjuben adjubesik... Koe kotafa vema ke Aniche valente Franca, zolonafo yeldaxo mali tena ke XVIII-eafa decemda zo saved. Segeyen dene lizukafu kawodafu sistu bak 1845, Vuillemin dritik va ekaveem vanticfiyir vieli di vanpiyir gadesik, numen to fiptatason va alub-saneaf ilanuk ke inafa kiewafa is ronkafa kozanira, lorot dem 4000 zoratc ba 04/08/1895 koe Auberchicourt pokefa dota zo grustayar. Clément Decout vanmia ganenikeem anjer, i tolsantevdafe dodelikye zunepene. « Kas tiyir arotievik ? Becapaf : kottode wetce kontan crakemb va tizura me zo murobayar. » Inafi vrati kre nutir jaxadara. Vuillemin weti tolda va in volmiv al divdenayar. Voxen jotaf levskusik voloblif lidam volozodaf va vord enkelur. Taneon va Vuillemin alubon westar, voxen mek vilt di nijur aytas, azen in va aora volins lubesir nume tituon ve zo roidasir. Tuavayan gu divroidara volana ton afifa ayewara, zovdaks ke Yunkena Loplekuaca va litera va sotisa malyerara laumasir : dumede gan kelttey co tazer, pune gunik kal toloye metre mal sid ton titafa taka zo ticplatir, koe teca buskafa rumkanyera. Ar trasiks : sollipayan vageeem kolpayan, i ckaneinda katrasitina gan wimbrusik bak direfa decemda. Blison kalubeyes vox jivotgabeyen is bindes, Decout va meka ewa tiyar aze tere xonuker. Bata « virnafa xonuka » pu felusik ke Le Petit Journal va tela ke Pauwels kimbar, i ke arotievik daykayas va aora koe Madeleine Uja ke Paris ba 15/03/1864 : abdievlon merizeyen, tralt va ant aorusik al aytayar. « Kore waunera va xonukera ke artan sotir vollorbaca », sutelasikeem ke fela « va meka saura » tove Clément Decout lidam dere Pauwels satoler : va lana tuvaleara me preyutar. « Ede bata tula va volnik ke selt co rogribudad »... |
