Blakerikafa Gluyista (suterot)

**Blakerikafa Gluyista**
	XANTO
	XANTO
Vergumvelt	The Red-Headed League
Sutesik	Arthur Conan Doyle
Ava	Englava
Suterotinda	Berpotam
Evla	1891
betara	teza

Blakerikafa Gluyista

Blakerikafa Gluyista tir berpotam ke Arthur Conan Doyle taneon sanegayan bak 1891 koe Standard Magazine virda az direilanon koe Yona stuva ke Sherlock Holmes berpotamak.

Vildeks

Jabez Wilson tir moraf erbabeitasik gri totaf rentasik ise va doltama poke Saxe-Coburg puzig koe London gedir. Va Sherlock Holmes pomadar radimida va lana Blakerikafa Gluyista al denfir, i va gluyista nuve fukorlana gan konoleks ke diveavaf amerikik nazbeiskon awalkeyes vox blizesiyin gan divulafa swava tove blakerik dum in.

Tire weti abica safta, Vincent Spaulding inafe jotafe tcicesikye tise bitavik is segeyen ika omarsafa kuba, va dakteks ke fela al nedir lize in beliyir da kot blakerik va Blakerikafa Gluyista co rodenfir nume va balemoy pound talolk safteon co war. Acum Wilson va int atoeyer numaze gan lan Duncan Ross zo segeyer. Inafa vuida tiyir ksudara va bu ke Britanafa Xadola wali 10^-e is 14^-e bartiv. Remi bat bartivtum gubeon axaf gu arientura, dolta pu Vincent Spaulding zo gilisker, i pu Spaulding viroyanyan ta bat kinestaf lag vox ekemon kotaskis. Wilson loplekur da Ross va uxuca is tiaskuca remi bat balemoy kobas bartiv karakeyer. Edeme in co zo taruler. Kotcoba remi konaka safta dilizecker voxen lanviele Wilson ba 12^-e bartiv ta kobara artlanir, pune va eluxok bene tuvel trasir, i va eluxok daktes va solelara va Blakerikafa Gluyista.

Bata arienta lolon tuyosawer numen in va Sherlock Holmes kevlanir aze kan inafa pomara kosmar da Vincent Spaulding enwe tir John Clay fiuntaf is aroaf tozekik pilkomodan gu adalafo alto. Sherlock Holmes banliz lanir. Va sid kan runza mone dolta ke Jabez Wilson dendar nume kosmar da inafa lizukodaja enwe tir « trovge ke zikexa » ke glastafo arboyapafo bedablo keve Fleet vawila lize walvedeyaf omeltap tigir, i va omelt kabdion ozuyus va itayapa dovialasa do francafe bowere.

Holmes va tigira ke erilt wale dolta is bano bedablo uculer ise vangruper da arienta iduler : tanafa muka ke nyagaca ke Blakerikafa Gluyista enwe tir ilplekura va Jabez Wilson gu dolta liedje erilt mal fuk di zo suxar lize orkon gu sunaltera, drowigaf Spaulding va afigasuteks va int ostik gikobudeyer.

Pomanon gan Meryweather gadesik va omelt is tan ardialik ke Scotland Yard ristula, Holmes is sagaf Watson va mielafe ikse koe fuk ke omelt oged numaze va « decemdafa dubiera » tatced ise va Spaulding gralomed, i va Clay cobekon levegayas va bata pirtafa dubiera do dofugiktum.