Blandafa stuva ke Antifer (suterot)

**Blandafa stuva ke Antifer**
	XANTO
	XANTO
Vergumvelt	Mirifiques Aventures de maître Antifer
Sutesik	Jules Verne
Ava	Francava
Suterotinda	Berpot
Evla	1894
betara	teza

Blandafa stuva ke Antifer

Blandafa stuva ke Antifer tir stuvaf berpot ke Jules Verne sanegayan bak 1894, tis tana karba ke Yona zultafa koyara nevatum.

Vildeks

1831 : Kamylk-Pacha kulafe misrikye va jwa ko pist ke megrupena ewalama kotawar, i va jwa levoksetena gu warkuca ke yasa.

1862 : Koe Saint-Malo, Pierre Antifer breizikye tise stirafe lidam fredindafe va lan valdig iskemayan gan gadikye kobrar. Bas Kamylk-Pacha lekeon bligiwayana malgir. Bat valdig va laksiwak ke ewalama dem jwa miwar, voxen Antifer va wak stekeon mbi goleter. Juhel inafe nutikye a direfa kurera va Enogate anton luxeon trakur nume va danexa ke kasafa koyara craker.

Ben-Omar tegivsutesik ko Saint-Malo artlapir aze va galpepen wak pu Antifer razdar neke gan Saouk tis ironokaf konolesik va Kamylk-Pacha zo eninter. Ban stiraf birelik va int vere kototar, do Gildas Trégomain nikye is Juhel pikses kir gonobukas va kurera.

Ewalama koe Araba bira grocelon ice Masqat tigir. Goxe, koyasik va toleafa migajeyxa wetce jwa anton kosmad, i va migajeyxa anton bazesa va warzaf wak stas kal lan maltaf omeltik dokonoleyes do Antifer is dere dagis va lan laksiwak. Mila abduaxa, mila ikazilira va maneka az warzafa mallapira do Zambuco omeltik van utacka ke afrikafa krimta. Banlize ara staksa dem warzaf wak is yolt ke bareaf dokonolesik sokes koe Skota zo divtawar. Koe Edinburgh, Tyrcomel gertik va vilara va kulaceem waster ; batdume va bildera va cenkaxa statasa kal jwa kalvewar. Tizaf is mewegayes Saouk va in relingar ise gluyedar nume va bendeks ralfeyen keve alto ke skotik kosmar. Voxe drendik me di impavantar kiren inafa koyara koe englaf flint tenuwer.

Antifer re dadis va warzaf laksiwak va tota van Spitzberg ropiilar lize bareafa ewalama tigir. Va valdig riwe merobelin anton kosmar nume va parmafa utacka ke jwa me rokosaber. Aundakoleson ko Saint-Malo dimlapir numazen Juhel va Enogate tere rokurer.

Bana yikya va grogara va welima pu kurenik volins dafur numen intropafa migajeyxa zo ronarur : palseyena jwa koe ewalama grocelon ice Sicilia tigir. Sin banliz lapid voxe raved da tculkafa Julia ewala bak 1831 titu bira al awiyir ; goxe arti oxam abic aksat di titniyir. Numen mea jwa mei akeem ke Kamyllk-Pacha !

Antifer re fraskenyen gu sivakafa klokara, va bata dempa kipegar.