Bopelanikeem ke Jonathan tota tir berpot ke Jules Verne sanegayan bak 1909, tis tana karba ke Yona zultafa koyara nevatum.
Bat berpot tir kaikiawalkeraf, vey nubasuteks ke Jules Verne, vox fabdupuyun gan Michel Verne nazbeik.
Vildeks
Rupa wali 1881 is 1893 koe Hoste ewala poke Horn evilma dilizer ise va bopelanikeem ke Jonathan tota vas mon 1000 korik gogaltes moe ewala divnedir. Kaw-djer giwasikye ba kota deona levgana gan bata sanelia vanpir gadesik aze gin vanpir.
Koredik
Kaw-djer : arotievik is bowesik ke ewala. Bat koredik va tuwavafa rictela dir ; abicviele batcoba tir dika, pune altokafo po jupar da in tiziskon xultur. Ant lanviele fala gosokir : bilmara kan aora zo levegar voxen muvacek va wepa tenanteyar. Volto in va roti koilkar voxen to sanelia gu inafa anduca ba koto sko moerur. In tir oc ke gazafa yasa ke Europa voxe tir vilkiraf arotievik neyaf gu « Me lorik mei felisik » nyapay ; batdume va vo is xantafa anameda al jovler numaze arte Geefa Amerika koe Tierra del Fuego tursia bumon re blir. Tir tec nendasik va amerindiik ke bana coyunta. Nekev bumuca moe Hoste ewala, va intafa tufa is turestara koe vo wan belundar. Arte neva Kaw-djer mo Horn ewala va int djukutuantar lize va storka volmiv al lajukolnar.
Dick is Sand : toloye jotafe gadiskikye, sinton sagafe. Dick tir tec okilik is nendasik va Sand, tison mejilon ketsamaf is milmusaf. Sand nendason va nik, va int wetar. Va dira va nimateem drasur voxe va bali takrelon malnaler. Ba yugal vanpir dingeltusik is kitcovik edje Dick gan Kaw-djer zo tazukar enide di tir direik.
Ceroni yasa : Lazare italiafe gadikye tir ruyatfamafe nume va kota erba gilorkar. Va Tullia dun alieyer vieli vezura ke Kaw-djer. Tullia do kurenye nope goni zavzagir. Graziella nazbeya tir 16-dafa runi neva. Halg bronazbeikye ke Kaw-djer vaon korenar. Voxen Sirk are bopelanikye va ruyat pu Ceroni firvir enide gu Graziella va int di koaykar. Lanviele Sirk tove Graziella va po djukufaver numazen ina ben Kaw-djer gogelber. Radimion jaxadason Sirk va Halg astirbon bakar. Arte berpot Graziella va Halg yerumar, i va Halg vanpiyis tilik ke onasa ja.
Fritz Gross : germanikye fitckirafe vox izakotafe. Abiceke vodar vaxeon kotviele ulir nume tunomyelawer. Suton awalker azen inaf dingelt gan Kaw-djer gu Sand mafelapas zo firvir.
Ferdinand Beuval : francafe seltevikye vanpir taneagadesik. Nijur peckaf is megorackas. Gan exura tizon zo aloyar. Azon gu ristulaf play gan Kaw-djer zo rundar lize nijur donaf gu mani dilafi fli.
Lewis Dorick : amerikafe doevikye. Astirbon dun zvaker.
Patterson : tir totcidikye voxis ubzes kobasik is intotcik. Dafuson va ruyat erbawar. Nope tuwavafa zexa, va wayana kotcoba drasur numaze va doda tublodar. Soe ubzeson wan kobar. Katecta ta erbawarapa sokir viele Patagon volnafa ervolia artlakir. Va tuvel ke wid aun fenkur voxe al tir ixakaf : volnik va in aytad viele va erba ageltar.
Hartlepool drigokilikye : lodekavakiraf moblisik ke drig. Va roti pu Kaw-djer balte isker : « Va int derbé da va kona benplekura gruskú voxen redura me tir jinafa gruta. Va viaro acon grugí voxen gotura va zalor en tir arcoba. »
Zol vakol : va Sirk nubemayas va Halg laiter aze aytar.
.svg){kind=icon}