Branican weltikya (suterot)

**Branican weltikya**
	XANTO
	XANTO
Vergumvelt	Mistress Branican
Sutesik	Jules Verne
Ava	Francava
Suterotinda	Berpot
Evla	1891
betara	teza

Branican weltikya

Branican weltikya tir izvaf berpot ke Jules Verne sanegayan bak 1891, tis tana karba ke Yona zultafa koyara nevatum.

Vildeks

Rupa ke berpot koe Tanarasokeem tozuwer aze va belisik kal suyafa Australia reme toloya karba ke neva dostar, i kal Australia dem letaxo.

Branican weltikya tir jotafa kurenikya ke John Branican redakikye tis 29^-dafe runi rupa. Ine va ina divkiavar moida ta biratawuk mallapir ise va molt ke San Diego bulur. Tolonga va Wat jotafe nazbeikye dikir. Kaikion viele Branican weltikya raver da lana tota va tela ke John Branican arti baroy aksat radimi mallapira al gamdar, pune pu inaf redakik djupulvir. Goxe batviele, Wat velye ticu doma luber nume xonuker.

Branican weltikya moi wizuwera ke Wat ve tuoviskawer. Len Burker tis kurenik ke kosayikya va ina deneon guaptar, keson va awalkera ke ziavikye sye iskematase va kotafa tufapa. Voxe gan bilita ke vilteyen nistaf arienteem zo vebidur nume il patecta goyater. Va zijnapafa kurenya gruidersena doon malstar, i va Jane vieleon ropese va Branican kosayya mefromeson va vaduluca is abidara.

Nope galovarsa, Branican W^-ya va ve griakoler nume adre vofar da barda mali mallapira ke kurenik al tiskir voxise va wizuweyese velye al drasur, voxis va kurenye mea deayase va warzot, numen kottan folir da ine tir xonukeyese.

Voxisen bak bata rekola, Branican W^-ya va kulapafe ziavikye al konoler. Batvielu tuke bata erba, va parmaf isk ke nazbeye toz adoner, viuntuson va gadiskik is siwik dene Wat-House kizey reduyun koe San Diego, ise va Dolly-Hope tota dirgana gan Ellis redakik ropiilar, exuleteson va bireem ke poz is katrasitison va conyuta ke John redakik is inafa tota is drig.

Bata axofera kal lugave ke Australia kostar, gadeson va brinuga wegidollakisa is golikeson va kunoy fiuk ke australiafo letaxo, dem wupe ke siput is govitol is ayiktoraf grelt, voxis dem gotuskura nekina gan Branican W^-ya ta jupekara va mukot ke kotafa blira.

Xantof vergumvelt ke berpot co gotiyir Lady Franklin kiren Jules Verne va brudira va ayikyeem don pilkovon kurenikya ke John Franklin djusuteyer, i don ayikya ektuyusa va varafa tufa is blirugal ta katrasira va kurenik griawiyis moe olgalicusa kelda va Lentef nael, goxe giopon.

Koredik

Dolly Branican : gradilikya ke berpot, belcon tisa gustafa is pofa, ayafa tove artan wavdon blis, pofa tove int kev duxara ke blira.
Wat ( tutrelan Walter ) : nazbeikye ke tolonga, wizuwese mali 4^-eaf luz. Inafa xonukera tir neki ke oviskuca ke Dolly. Inaf yolt pu Wat-House kizey zabduyun gan Dolly ta viunsura va gadiskik ke San Diego zo zilir. Bat kizey va Godfrey tulon viunsuyur.
Jane Burker : kosayikya ke Dolly. Va ini remi oviskugal viunsuyur voxe lente kurenye skotcer nume me rodetsuner.
Len Burker : ikorikye ke berpot, parodjaje is pegafe, mekonteyene gan faxuca ke volkalaf kurenik. Malyerotane nope todlura.
John Branican : redakikye va Franklin tota, 29^-dafe titi berpot.
William Andrew : dorjesikye dirnuyuse va John Branican ta dirgara va Franklin tota. Va Dolly nendar ise remi inaf oviskugal volmiv roper. Va Len Burker aptason dun rodaxar.
Godfrey : jotafe san-balemdafe birelikye, gaayane dene Wat-House kizey, payuse va Branican W^-ya.
Zach Fren : birelikye giwayase va Dolly gu wizuwera. Dum ini folir da John redakik al remblir nume katrasitison va tamava doon kallapir. Tir inaf parmaf nik nume bak iyelarsa zober.
Tom Marix : okilikye ke brinuga ronutalton exulesa va Australia bak toleaf pak ke berpot.
Harry Felton : ikaredakikye ke Franklin tota, nik ke John redakik. Doon stoleyen gan Inda grelt koe Australia.