Chancellor tota (suterot)

Chancellor tota

Chancellor tota tir berpot ke Jules Verne sanegayan bak 1874, tis tana karba ke Yona zultafa koyara nevatum.

Vildeks

Chancellor tota dem 28 korik is yulteem kum amerikafa kilta mal Charleston vagerone Tanarasokeem kal Liverpool koe Engla lapir voxe va lana vawa tubemuasa va rundanyasik malaskir numen ilfolira va swavafa galera ke redakik toz awid. Fird koe yultxo sokir aze remi konak viel alkejar abdida gan zivotccek zo tenanteyar. Voxen tota kev burgifa ewalama xeyer. Robert Kurtis ikaredakik va dirgara narir aze va dimempara dioter enide digin ezasir aze va Guyana rodefartlapitir. Goxe lavaka kotlize wan tid isen bak daref zivotccek likay zo vilayar. Daref redakik is tanoy rundanyasik is baroy birelik koe tanaf megollikay yated, jovleson va dositikeem vegedus va ankit. Ban in mea tir dem san-anyustoy korik viele tota zo jovler. Bliga is lavada zo vaceped ; warzaf zivotccek va ayon kosik nekir. Arti baroy aksat radimi mallapira va Charleston, dantales ankitik va mecoba icde tigixo engruped isen bliga toz zo gracid. Tan moblisik va abic kabay kan ant dadina vigrokaxa ebidur, i kan ayafi cotki, voxen bagalara tenuwer. Numazen viele tanoy moblisik kser, pune pak ke drig toz ayiktorur. Konak bopelanik tuoviskawed isen artan pikseson trobindad da va tel diref estunik di xuyavad.

Jules Verne va noapafo vawalexo koe bata rupa firvir. Bat rundanyasik zo tulebar numen inafa andacka remi stuva to remblira en awir. Sedme ewa ke miv Jules Verne, bat berpot tir « kovudason geltrevaf ».

Jules Verne va rupa ton pone ke Kazallon rundanyasik bilder. Jupar da kan iteem is swava ke zvakes pwadesik, belisik va debala ke kontan dikis va vodeem glan gan ginukafa adruca ke remblira ugalar, isen goaspil tit govitaf sok dare tukultas lubesid.

Jules Verne va belisik gu kiewatrakurevafa lingera va merotacagina abdufisa abduxoa koe nubeem ke ayikeem gilteyer ; voxe re va ayik dimearsas kal nartuca pimtar.

Tisa yona kolmaja, va altokafa nyukuca is fituluca is ketsuca noulir, isen ban baroy kor fereon tid ke lan koredik meremblitis. Teca tuwavafa rebara toz inkewer : kot xonukesik ik awalkik en tir ketsaf is dasotaf korik.

Kolmanya tire tid : takreluca taneon lidafa az altokafa, is gruuca is arreneva en tid duga ravaldasa va remblira ke olkik nume va tela ke eem tukuvar. Takrelaf olkik gruwonter nume va wupe lokase grukevliker ; va piksa vanolasa va dositik loeke grupacagir, voxise va dratcesa oviskuca lokiewon acagir nume ovon is mepangon rodekogorar.

Ayiktorura enwe tir tegi ke nartik. Neken pwadesik tore tis tan seltaykirik, pune kulton vofar da gan ayiktorura adre zo zoer.

Yunkexa

Konaka yunkexa va berpotam, koe xantofa piskura, 1874

Dere rupel

Chancellor tota
XANTO
Vergumvelt Le Chancellor
Sutesik Jules Verne
Ava Francava
Suterotinda Berpot
Evla 1874
betara teza
  Tuveli icde Suteroteem