Elin Danielson-Gambogi

Elin Danielson-Gambogi
1861-1919
Suomiaf lingesik

Elin Danielson-Gambogi ba 03/09/1861 koe Noormarkku widama koe refa Suomia kobliyir. Ba 31/12/1919 koe Antignano koe Italia awalkeyer. Tiyir geltrevaf is tuwavevaf lingesik.

Blirizva betara

Jotarugal is vayara betara

Elin Kleopatra Danielson tir vey sayakikafa is flibikafa yasa. Karl Emil Danielson gadikye is Rosa Amalia Gestrin gadikya tid arayakiraf. Voxen yasaf viel bak 1871 konjer numazen gadikye direilanon kser. Nekev erbarge, gadikya ke Elin va vayara pu nazbeya lasudoder, pomanon gan Mauritz berikye kaikion erbon wan zobetese va Elin. Tison sanalubdaf, in va zovdaropafa bema ke Yambaf Cultim ke Helsinki denfir lize va zovdaropa is siak is patectoyafa lingeropa isu rigelafa vayar. Dene yasegafa bema ke Adolf von Becker va vayara linter aze bak 1880 vanpir tavesik. Va taneafa wonara mililanon paker.

Danielson klabur da va yambafa klepa di koaskir. Va tavera is vayara kali 1883 ektudar ugale va filavcek ta vayara koe Paris seotar. Va lok ke 1880-e sanda tiskir, vayason dene Colarossi cultim is aryona yasegafa bema. Ke inyon tavesik, Gustave Courtois is Raphaël Collin tid, voxis Auguste Rodin taves va geaki ke balumaropa.

Toza ke klepa betara

Dum jontik lingesik ke Paris, bak konak idulugal Elin Danielson ko Bretagne gola lapir, i ko tulon Pont-Aven, enide va patectoy di linger. Turestanon gan Julien Bastien-Lepage tuwavevik, inafa luistava loeke tuafiawer. Kaikion koe Suomia dimdenlapir, blison koe Noormarkku ok Helsinki, ise va Önningebykolonin rijay denfir, i va rijay dem suomiaf ik sverigaf lingesik va sint kabelcas koe Åland tursia. Va Victor Westerholm kali awalkera di dun dogoler.

Elin Danielson va yona direfa tanda koe Suomia ok Franca tiskir. Mali 1887 va konaka wonara koe Suomia paker lize nope intyon ayikyaf delt ton entafa ok dace mewalnafa ok zugiafa nakila zo katcalar. Loloon malyopason va debala ke ayikyeem koe selt, volrapalur ise va konake yambikye don Gustav Vigeland norgaf balumasik skedegar.

Koe Italia betara

Elin Danielson bak 1895 ko Firenze kan vayarafilav lapir lize balemaksaton di tiskir. Direilanon gire lapir aze va Firenze az Antignano wida gee Livorno parmon koirubar. Bak 1898 va Raffaello Gambogi yerumar, i va italiafe lingesikye tise leon klaafe gu san-barda. Bata warzafa anameda va lingeropa ke Danielson turestapar isen tolonga va int belcelon turestar. Va konaka wonara koe Italia is Franca bal yona direfa tanda paker. Elin toz zo tukiewatcar.

Wori tolonga va yasegafe arge kakever : Gambogi va Dora Wahlroos lingesikya toz skedegar ise va swavarge toz divnedir. Ironokafa tanda ke blira ke Elin Danielson tid dem erbarge is ilkarge : golde Taneafa Tamavageja va vofa patecta me gin rovowir. Tis alub-san-anyustdaf, tici 1919 nope rizakola mulufter.

Yona trutca betara

Dere rupec betara

Vexala dem suomiaf lingesik

Elin Danielson-Gambogi

Elin Danielson-Gambogi

 Koblira  03/09/1861,
 Noormarkku, refa Suomia
 Awalkera  31/12/1919,
 Antignano, Italia
 Vedeyot  Suomia
 Eba  Lingeropa
 Serna  Geltreva, Tuwaveva, Önningebykolonin rijay
  Grabom 
  Tuveli icde Lingeropa