Ellasavaf remtrakusik (suterot)

**Ellasavaf remtrakusik**
	XANTO
	XANTO
Vergumvelt	The Adventure of the Greek Interpreter
Sutesik	Arthur Conan Doyle
Ava	Englava
Suterotinda	Berpotam
Evla	1893
betara	teza

Ellasavaf remtrakusik

Ellasavaf remtrakusik ( englavon The Adventure of the Greek Interpreter ) tir berpotam ke Arthur Conan Doyle taneon sanegayan bak 1893 koe Standard Magazine virda az direilanon koe Namio ke Sherlock Holmes berpotamak.

Vildeks

Tozafa bula

Watson selaropik gu kruldera ke Mycroft Holmes akoyenon zo givar . Bantan tir taneanazbalafe berikye ke Sherlock Holmes. Dene Biogenes boxo ginobano, gan toloy nik zo auzur. Pu berye pebur da Melas W-ye vamoef vegungik va divulafa stuva weti tolka al ugalar. Kogrupas butc ke Sherlock Holmes zo yaner numen Melas negar.

Melas pu Holmes pebur da tir vey Ellasa ise va remtrakusa eba koe London ksuber ise va lanafa vartuca pojar. Weti sielon tolka gan lantanye zo auzuyur, i gan Latimer yoltkirik olegas va remtrakusik ta arientura. Va vezura malnaleyer nume va riniz do anelik rundanyayar. Voxen bantan va luga laizon divplekuyur aze vanyeyer dratces, pebuson da mukot ke vuida tere co di tiyir amidapafa gu dakteks. Ostik Latimer va eluxakiraf ralpeem ke riniz al ticimpayar enide Melas va kallakixo ke irem me rovogrupeyer. Remtrakusik ziwiden gan bata debalarura, va acagira me al ebleyer

Ba artlakira arti mon toloy koyas bartiv, Melas ko lana mona mefromenon zo trasiyir, lize azon artanye diveyer da in va yone bibe isu dulzeks fu co goremtrakuyur numaze co rodimdenlakiyir voxe va varafa stuva mezauzetenon co di gostilayar. Acum Melas ko afiansana olkoba al zo vanstayar liz Latimer do mazdikye kadimion dimlaniyir, i do zwik dem gexata besayana gu prayta is anton romuxas kan Ellasava vols Englava. Melas va englavafe bibe ke dratcesik is dulzeks ke kuncasin ellasik toz remtrakuyur. Impavantason da olyastesik va Ellasava en megildayad, remtrakusik va toloya bibera gu erune bibe pu ellasik kalion loplekuyur enide va inafa pilkoma isu izva di grupeyer. Koerunik batkane rodiveyer da tiyir yoltkiraf gu Paul Kratides ise weti baroya safta ko London mal Atina al artlapiyir voxaze koe bata mona voleron zo kagiyir. Inafa divera gan artlanira ke yikya yoltkirafa gu Sophia laizon zo azavzayad. Bantanya is ellasikye va sint akoyepenon kagrupeyed nume sinton ipeyed voxe gan toloye englikye zo solstayad. Moi bat meken fiuk, Melas van London kan riniz gan Latimer zo fuzodeyer. Abdi artlakira va widava zo divplekuyur numaze kan lanira az impadimakafa lapira va zalor gotenutceyer.

Mali diref viel, nekev dratcera ke toloy englik, Melas va Mycroft Holmes kevlaniyir, konedison va divulafa stuva voxis kocenkason va ardial.

Maera

Mycroft Holmes abdi artlanira ke berikye va bata kogrupara ant toz lamaeyer. Va dakteks dene konaka fela volmiv sanegayar enide kottan sure kakeveyes va ellasikye yoltkiraf gu Paul Kratides ok Sophia ellasikya va int di razdayar. Soe Mycroft va meka dulzera gu eruks kazawar voxnumen Melas nope dakteks razdayas va intafa levcoera tove tozekik re keunisiyir.

Maera va bula tir kaliafa, isen taneatomon izvon gu stuveem ke Sherlock Holmes, to Watson va sazdara nijutusa malyafa divplekur. I selaropik trakur da Sophia ko Engla ape lapiyir lize va Latimer di kakeveyer numaze doon voleron gozavzagiyir. Watson levaykar da Paul Kratides tir berikye ke Sophia. Givanon gu bat warzot, bantan ko Engla silukon lapiyir enide gu Latimer volteldik is berya va int di walplekuyur. Soe nope kona mexeyaca, i Paul zo tcaluteyer numaze gan Latimer is gesiasik zo kagiyir. Aze ton figapafa gropa zo stoleyer vieli va dastrubeks djuprosugdayar, i va datrubeks co rictas va Latimer gu dadira va tufa ke Sophia. Olegara va remtrakusik pebutus va batcoba pu yik jupayar da tozekik va Melas di rozeyed. Xuye Sophia is Paul tici witara va Melas belcon sinton kakeveyed. Sophia va tigira ke berye koe Engla ape me grupenayar.

Arti bat zolteks, Sherlock Holmes va Mycroft koe Baker vawila katrasid. Bantel dakter da va dulzeks gu intaf dakteks al kazawar. Givasik koe dulzeks ruyer da va Sophia gruper, i va ina sokesa koe Myrtle garia koe Beckenham. Baroy ayik den bazeckeyena kraba lanid voxen vofad da in mea tigir radimida kontanye va in sure rozer. Sedme Sherlock Holmes battanye ape tir tan tozekik efuyus az aneyayas, zauzeteson nope lorera va birga. Dositanon gan Gregson kowedisik ke Scotland Yard ardial, baroy ayik kan impadimak kal Myrtle garia lapid aze kan riniz wan lakid. Viele artlakid, pune waba nutir jovleyena. Holmes rem dilk lajukolanir aze va brera mal vegem kadimion gilder. Iper nume va Melas gluyedayan is krezes isu Paul Kratides kosmar. Sin koe olkobama zo kostoleyed lize intadatey ins al zo turunkar enide di zo jivad. Melas bexe zo lajugiwar voxen Watson vere kosmar da Paul Kratides tuaxapayan nope isk ke vala me al moblir.

Kaikizixa ke arienta va sazda ke Watson gruyer larde datan dulzeyes va dakteks ke Mycroft va nios guzekayan gan selaropik valey konaka pinta kotote al gruyer. Holmes is Watson tulon raved da praytatum bene gexata ke Paul Kratides anton tiyid suzenk volpilkomodas va vola tove Sophia tod awira. Soe suzenk me al guyunder. Watson va nega tenuker, tuelimason da arti jontik aksat kaiki kogrupara, lan teliz ke fela mal Budapest denon artniyir, i teliz munestes va divulafa awalkera ke toloye englikye nubemayane edje do lana yikya koyayad. Sedme Holmes is belisik, batcoba nutir jaxadara gu vetuig levgayan gan Sophia.