Forteykirafa muska koe Limoges (yunkexa)

Forteykirafa muska koe Limoges ~ Émeutes sanglantes à Limoges (FR)

Ploteson va keraf nilt isu ebeltaf, muskik va gamiaf tuvel vangabed edje okolervolia ta reltkirafa webera va seltafa wakara artlakir. Rigelaf dodelik ke Limoges yasted : soe zovdasik al trumar da va abic atsotkirik vox dositan gan konak weltik diskis va barvagef aboz is tulwafi edji anton kaatoer, batkane tarkason va krent ke felateliz pimtas va « muskafi tari tisi dem leote geltraf kobasik voxosk loote dastrubenik ke batyona artowasa neda nudivlanisa va sid kotviele skapafa ok seltafa koboda betlize koe patecta vinustar »... Ba balemka abdi piskura va bat otuk, Francaf Gabot ke Walvedeyaf Dodelaf Grustaks su zo tadler : bato warzafo gaderopafo pako va kota niedara ke francafa selteva tutanasa va aluteik is gruadik ke dodelaf lizor gu « ageltaf kobasik » tugaldar inde Jaurès al galper. « Kerik » ke SFIO pako lidam arotigrosibevik ke CGT va yastesik ke Limoges zobed. Golokilik va muskik al koflintar numen sinaf pusik tunuyatason vanmilenidad : va tuvel ke flint vanludevad ise jontikkase fu kolanid viele « braora dem okolsayakik revulon tcepason artlapir » aze va exaksasikeem gwarder. Ban kabelcan koe Orsay gerd va milk pitcer ise gu raporki aorar. « Konaka viltara sokiyid », ~ felusik ruyer, voxen batcoba mekane di zo exoneyer. « Krijafa karzara zo askiyid, azen sayakik va zeltara van rid bam mbi dirgayad. Neken abic kabduon omarson al viltayad, nuve ». Baroy bakanik is san-lerddafe yikye aytayane... Yunkeyen Loplekuks ke Petit Journal va tunodrayan sayakik latuvolgunar neke va bata forteyotafa tenulera daborer, voxen inafa dragena tcinera me nutir vandilitisa va pulalyumara : « Lodamen va manyona ilamota gorujat ise va bali ke jontikman dulapaf kosik gonarubat, pune proyuca is xeyuca co gotiyid ta koweyonara va dilizesa kabelcara izgon ic ebeltaf nilt ». Wetce tabexon dirotevafa ja, Petit Journal va intyon dulap gurunkar : keve rebava ke flint, wale keraf nilt is vajikes okolsayakik, milmusa finta kimbar da mila vieleafa fela dem tevoyu bu ika anton aluboy centime talolk zo sodoler. Vuestexa

Forteykirafa muska koe Limoges Émeutes sanglantes à Limoges (FR)  Yunkesik ?  Ord yunkexa  Fela Le Petit Journal  Sanegara 30/04/1905   Tuveli icde Lingeropa