Gantafa mona (suterot)
|
Gantafa mona tir izvaf is stuvaf berpot ke Jules Verne sanegayan bak 1880, tis tana karba ke Yona zultafa koyara nevatum. VildeksRupa koe Barata kadimi Sepoy kevmadara dilizer, i kadimi kevmadara namina is xantafa gu remay ke stuva. Edward Munro buluyus vombik koe Kolkata blir ise va drasuyuna kaluca dun kaltrakur, is va Laurence jotafa kurenya griawiyisa bal stakera dilizeyesa koe Kanpur gan milk ke Nana Sahib okilik tis durulaf volnik ke britanik. Mali bata zixa, conyuta ke Nana Sahib tir drasuyuna : bantan koe Nepala gelbeson co tigir oke sedme nisu dace co tir awalkeyes. Enwe volto tir isen rictaga ke Mumbai va inafa tigira dace al murobar : tire va warzafa kevmadara lasunazbar. Nik ke Munro, i impadimakafe dritikye Banks, drager da sin koe lentefa Barata kan cugunaykaf irem elon di koyad, i kan sidirem dalinon envayan az vegeduyun mu nafalik ke Butana az ika dromo dimdoleyen kadimi awalkera ke jafasik. Bat irem tir gulaf gantaf fuzol impokas va toloye erodkirapafe omaze is tanamus a vawakelot. Bat impadimak dace tir lavalapis. Munro dotrakur numazen sin mallapid, pilkovon dositanon gan konak nik : Maucler francaf ganenik is Hod redakik tis tcabanesik va jaktol. Don adraf zanesikeem, sanoy korik juxon ic Himalaya rodega koyad. Radimi taneafa bifiskafa koyasa pakava, Steam-House ( to yolt ke evodasa sorka ) ko Allahabad az Kanpur artlapir, lize Munro woraso va xo ke savsafa folva raver da Nana Sahib gan rictaga zo moaneyar. Wori bantan gu koyara ke Munro is dositikeem mali remlapira va Varanasi zo walzeyer. Va zugafa boga pu Munro siofar vielu gazikya ke Bhopal tiyisa fertik gan mil britanaf fayik zo aytayar. Batdume in va int djukujaxadar nume va sagaf levpomasik yoltkiraf gu Kalagani stakser, vuidason va sekara va Munro enide ino di zo zurter. Wori Steam-House va zalor lenton dakir aze va pemaxo tori konak aksat inker viele koe coyunta zeitafa gu tcabanera va jaktol tigir. Miledje koredik va nederlandik parloes va snavol yoltkiraf gu Matthias Van Guitt rungruped. Ke zanisikeem ke Van Guitt, Kalagani lajuseguyusi tir. Kalagani va fol ke Munro vonkik urlicker radimida va inafi bli al giwar. Dace beyon jupekar da Matthias Van Guitt is zanisikeem gu teremta ke Munro is nikeem va int zokever viele ino gelapir liz va Nana Sahib esteteson djupokatrasir. DrunaraNana Sahib is Bala Rao Sahib berikye tid izvaf korobik. Bak 1862 kadimi Sepoy kevmadara griawiyid. Koe berpot, Jules Verne va mewinugafa wana kaiki izvaxacka omavasa va nega gestar nume va rupa gu jontoluca winder : tela ke Munro vonkik dikiyis va kurenik stakeyen bal kevmadara, is tela ke Nana Sahib. Mile ayikye va jaxadara djukugardied. YunkexaKonaka yunkexa va berpot, koe piskura ke 1880 Dere rupel
Vuestexa
|
 Moek ke taneaf piskuks va berpot bak 1880 | ||||||||||||||||
.jpg)
.svg){kind=icon}