Geef Bitej (suterot)
|
Geef Bitej tir stuvaf berpot ke Jules Verne sanegayan bak 1884, tis tana karba ke Yona zultafa koyara nevatum. VildeksLiza koe Griqualand gola koe Geeafrika dilizer lize Cyprien Méré kawopafe dritikye kobar ise va blixafa razopa moe duzafi vruni vayar. Mil gradilik va Alice Watkins djukurer voxe gan John Watkins gadikye mbi kovewar kire tir kulansaf. Bam gesiason va lan amerikik, Méré va kawodafa savera koaskir. Miledje va tcaf duz lasugiar kane va Alice di rokuredar. Nope lana deolafa bagalara, va granafa ebeltafa duzxa malseotar, i va duzxa yoltana gu « Geef Bitej ». Wetce buelegaks pu Watkins W-ye firvir voxen duzxa kadimi ilbodera bal porasa kapa griawir. Geef Bitej dere tir leca ke geef mialapoz. Konak aneyasik va duz grupes va vixanafa xanta ke bata duzxa kivad da batmana iarinda va sin di rawad. Nope dubiera va duzxa, uculereem van ebeltafe kwikye gadewer, i van Matakit Cafre mikrik vadulaf is europon gaayan vox nutis gomilasik. Nekev inafa dubiesafa niedara, Cyprien Méré zibur. Alaakafa liza ke berpot tir laitera va Matakit koo varafa Transvaal gola. Cyprien remi stuva gan baroy kevlik zo dositar, i va kevlik djukoilkas va bata droiskafa duzxa kiren battode Watkins va kurera va Alice nazbeikya co di kaxaar. Enwe ant Cyprien va yikya enrenar solve baroy kevlik va kureranya anton xialad, kiren gadikye ke Alice tir ref pilkotik ke Vandegaart-Kopje duzxo solplatiyino nope rokopafa malyera bas Jacobus Vandegaart. Arti jontik fiuk razdayas is afias va ayafa tuwava ke kottan bal duxara, askisik va dubiera tere zo basxatcaxar : ale enwe lan waikoy. Tuwava ke duzxa bam nijur amidapafa gu tela folina. YunkexaKonaka yunkexa va berpot, koe piskura ke 1884 Dere rupel
Vuestexa
|
.jpg) Moek ke piskuks bak 1895 | ||||||||||||||||
.svg){kind=icon}