Germinal (suterot)

Germinal


Germinal sanegayan bak 1885 tir san-bareaf berpot ke Rougon-Macquart enk ke Émile Zola. Va figapaf gropeem ke yeldaxoikeem koe Lenteka ke Franca pimtar. Germinal vergumvelt tir vey lan aksat ke sokasanerotif ilanak vadjes vas imwugal is francavafa zaeya vas welkera, i vas rieta ke malblira ke tamava. Zola selton vilteyepesa va seltaf dodelaf lizor is sinafa exura va copaf bligropeem lasuyunker. Welkera kle tir tela ke dodelikeem lyumas ta lokiewafa blira az tere tarles.

Vildeks

Taneaf luztum

Toza ke berpot tir pimtara va krabera ke Étienne Lantier lizuklizukon lanis kaaneyason va kobara. In tir foalkik. Inafa axofera va kobara tir vani tena kiren bocafa okaca adre kevfir : ont va kona kobara trasir, ont aelawalker. Levi artlanira va Montsou widava valente Franca, i va widava titisa dalafa zikexa ke berpot, Étienne moe kelda va kawodiktum gamdar. Bantan va intaf bligropeem pu ine pimtad. Ke sin, Bonnemort tir. Bat ikayolt tir man kiren in kev baroya walta koe yeldaxo al remblir. Tir luntapaf neke nope durefa is tizafa bobera mejer ise va yeld dun putcegar. Koe kawaxo mali intafa anyustda kobar ise va dakira kali tevsanda ternar.

Pwadesik va Lantier nore isker ise va Maheu yasa dulaper, i va kawodikafa yasa ke Montsou. Bonnemort tir veygadikye ke yasa. Mielcekon gikobar solve yasa afizcekon. Sinafa blira tir itupansafa lion dam tela ke Lantier : beka sin vieleon dun kobad, pune va dika erba digid nume jontikviele aeled ise ton copaf gropeem blid. Dene kawoda, Lantier lagruper kase kobara mu in co tir. Maheu yasik gamdad ise va in gabenton meon givad. Voxen kolanison va kawaxo, va awalkera ke tan dokobasik vangruped nume jupad da Lantier ikarundatason di zo seger. Catherine taneafa nazbeikya ke Maheu zo dasugdar enide va Lantier men buluyus va widava di vebidur. Lantier va ina gu sardikye dojer.

Lantier zo koflir aze va guyundera ke kawaxo toz ravecker, nyapenon gan Maheu gadikye ke yasa. Va Chaval rungruper, i va kioxaf is tizaf dodelik. Koe yastuca ke kawaxo, Lantier va atris moueem ke Catherine almar ise vantrakur da ine tir yikya.

Pwadesik va merotcizana kobara koe kawoda pintason pimtar. Catherine va Lantier gu kireem ke exava pomapar. Chaval va in aptason ilkader. Ba rita Lantier pu Catherine kalir da gu kelot al zo taruler kire va okilik kavalkuyur. Dere movur da va erba pu gadikya ( Gervaise Macquart gradilikya ke Assommoir berpot ) tisa vagetcatesikya koe Paris stakser kotviele rotaskir. Lantier va Catherine adre korenar. Poason kutcason va Catherine, Chaval va sinafa prilara waljoar. Lantier bam laner da Chaval tir aguntanik ke Catherine, nekev inafa kalira.

Dodelik va tilik mijed. Lokiewon co gokobad voxe adujason govekobad. Zo bilitad nume riyomed. Gorad da va tanoyu bartivacku lowaveon diten kobad, vewason va divlirdara abdi bartivack. Catherine va Lantier ko baplafa tamba vanstar voxen sin zo onsed abdida va betcoba al rotaskid.

Lantier uns gorar da mo kelda fugin mallanir kire va kawoda tabir, voxisen Chaval va in sater kiren inafa kobasa taksa golde Lantier al tir warzesansafa nume al zo dodemer. Moida Maheu va trasira va mawa al pomar, Lantier nyaseson va palka trobindar da di zavzagir : va dodelik ta lyumara djupomar.

Toleaf luztum

Pwadesik Va Grégoire glastafa yasa pimtar. Gadikye tir pilkotik ke kawoda. Ar bewik ba divmodesa nakila zo atoed, kevaxason va leeke plinapafa nakila ixam pwadeyena dene Maheu yasa.

Maheude gadikya ke Maheu yasa do yon nazbeik artlanir, buriefadatason. Va afizcek ke Maheu yasaki mea kobasi oku men dene kawoda, bam tcoket.

Mil tum taneon tildewemer ise dene Grégoire tuidulawer aze krabeson mallanir. Maheude sugar da Maigrat doltikye va tarja getcar. Azon seotatason va decemoy talolkam, Maheu tum den Grégoire dimlanir. Mbi vewar. Neken Maheude va tanoya neltxa mu nazbeikeem mbi zilir. Kadimion va Maigrat gire kevlanir aze voseper maneke va kotcoba djumena mbi zilir ise dace mbi erbazeitamar voxen bantan ikadiner da vaneksatason to Catherine diretomon pitir.

Maheude va Levaque W-ya vegungik auzur. Sinya va stekeuca ke Zacharie is Philomène fadulison keyaksed. Zacharie inafe taneafe nazbeye is Philomène taneikya ke Levaque gililagid. Philomène ixam tolon zo nazbesiyir. Neken sina va sin me djuyerumad. Prilara azon kadar aredjiara.

Maheu dimdenlanir. Va ekseem wiver. Estur aze va int tcater aze va do Maheude renarur. Taneaf nazbeik me dimdenlanid numen gadikeem toz dwimir.

Kadimi tilderama, Lantier koe Montsou gozar. Va yon yik nuyukus moekote gamdar, i va tulon Philomene djiase va Zacharie enide inafa gadikya va sin di yerumar. Va boera va Catherine gan Chaval dere volins tcoker.

Bareaf luztum

Lantier va skintuca ke kawoda giltaver. Va konaka volnaca nekir, i va tulon tela ke Zacharie riwe rwamane. Va jotaf fertik bal mielafa rosokera wan suzdar. Lantier gan grosibafa rietava adre zo brostar. Va greles yult mu dodelik djukizer.

To kapaviel koe Montsou tir numen kawodikeem me kobar ise ikaon ulid ike ombud ike walikrad. Lantier va cug kawodik gu intafa lazava laganamgluyar. Maheu di malnaler tode arak konaler. Lantier va Chaval soe nutiyis tel lodarpidaf lajubuiver. Ostik bantel va Catherine adre anamsteger, linulason wetce aguntanik, numen batcoba va Zacharie zidesir.

Bak anyusteaksat Lantier den Maheu yasa koirubar. Zacharie va Philomène tere al yerumar numen sin va vreda mu sint is toloy oc malseotad. Lantier gan pokeuca ke lebafo alto ke Catherine taneon zo akoyer ise zo konter aze giltaver.

Pwadesik va cuynafa atatcera ke dodelik men lajunariltas va exusa djumera krentar. Adre Lantier vanpir tec gaderopaf andik numen loeke tufiuntawer ise tuekoltawemer. Kadimion Kawodafu Sistu va kuba ixam omapafa ke kawodikeem kastar. Lantier kuranir da dodelikeem ve yaster voxen bat in tir prealaf. Sistu va dodelik nobas va Lantier toz xuvar ; bantel zo ildoded enide jontikedje mea di remblid. Dodelik va yastera fined.

Dodelik va bartivack amliton ked. Walta koe kawaxo : tanoy dodelik xonuker isen Jeanlin tane nazbeye ke Maheu zo tuetear. Maheu yasa cugeke tite erbadebala spuerser.

Balemeaf luztum

Yast sokir. Kawodik va Hennebeau denlanid larde kurenikye tir kuban gadesik va Montsou kawoda. Hennebeau yasik tid wiiskaf ise va mecoba ke debala gildad. Betatason va meka intafa glastafa miga, va laviaca giopon lasudunud.

Maheu wetce ikapulvisik zo dasugdar kiren inu tir tel lokiewaf is lodalban dodelik. Va coba meflisa pu Hennebeau W-ye ronjon tazukoyer. Bantan levkalir da dodelik gan artowasik zo nuboked numen Lantier kioxon mopulvipir. Debala me towar.

Toloya safta tiskid. Kawodik me ebgad voxen aeled. Maheu medjutisu kliwafu ta onara mallanir. Maheude va laizafa denufira ke Catherine temer. Banine dimpir ise va fada is bota pu yasa firvir, parason da me tir nuyafe gu lizira, voxazen Chaval akoyder aze va ine fiker. Lantier va Catherine runrojur voxen Chaval do ine mallanir. Lantier ilfolir da dodelikeem va sistu fu rokevcener. Undeyeson, va int buiver da ine rowatar ede va Walvedeyaf Grustaks jontikote co yoter. Va yasegafa kabelcara grustar.

Bata katanara dilizer. Dodelik va grustaks jontikote yoted. Batultik lawaljoad voxe mea rovodaskid.

Ixam to mali tanoy aksat yastera al zo bokar. Pomara ke Walvedeyaf Grustaks tir axafa. Sistu co djuprokeyaksesu zo nisur. Ayikya ke Montsou den Maigrat luxeon brinugad voxe giopon. Lantier va konak vraz mu Maheu yasa trasir aze gabenton givar da sistu va lo dodelik gu kobasa dimpira su levbuiver voxise va elvapaf yastesik gu tarulera dratcer.

Lantier is Maheu va yasegafa katanara koe aalxo grustad, dimaytcusison va korikeem. Katanara tir keskotafa. Wori swava ke doda ixam al zo wanieper : jontiktan abdigruped da zatkik dene koka tid numen vanama tir uculesa. Chaval zo pistoler kire dene Jean-Bart ara kawoda wan kobar. Va yast den Jean-Bart intotcon etimar numen dodelikeem ke Montsou banliz djukumallanir.

Alubeaf luztum

Diregazdon, Chaval ko Jean-Bart kawoda taneon lanir aze va dokobasikeem gu milaskira va kawodik ke Montsou lasubuiver. Luxeon Catherine nekevon djukobar kiren Chaval va mecoba pu ine wan zilir. Deneulin W-ye gadesik va Jean-Bart kawoda vezur. Va batyona kretura me gildar kiren voldum koe Montsou, va kuba me al kastar. Frendon konedir da sianfa kobara va lokiewafa kuba co riwer voxen vaon me rovelaumasir. Larde Chaval groler, pune va in isker. Yon dodelik ta kobara lanir solve aryon ve yasted. Chaval is Catherine tid ke taneik dimpis ta kobara. Catherine zo ciondar kire nekev kotcoba gu kobara gan Chaval zo poar. Ton lebuca jiadar kiren idul koe kawaxo dupur numen va kote vage tantanon al godeswar. Zo pluker aze tere krezer. Banviele Chaval toz vetcoyer ise tuplinawer. Viele sin ta kobara dimpid, pune kawodik ke Montsou va ticplekus laday nuve gabed numen lokalion godivlanid. Catherine bal vultera gire krezer voxneke lajudivlanir.

Kan pwadesa radimfira, va mila nakila tcoket, baninde sedme dodelik ke Montsou artlaniyis az laparles do Deneulin W-ye az tere zideson djukugabes va laday nekev kevvewara ke Lantier. Bantel ve perler viele va Chaval divlanis va lird isu Catherine kozwir. Dodelik ke Montsou va Chaval is Catherine divbured. Dim auluca koe Jean-Bart, Deneulin W-ye laotar nume zolter da fu tretcakonjer.

Milk ke Montsou van yona monefa kawoda iper. Chaval zo brazar neken Catherine doon wan zavzagir, nekev koldara ke Lantier is gadikye. Remlanison va konaka kawoda, dodelik adre riyomed nume dun anamvilad. Fure va beg kuranid nume pu kot dadisik malimaxud. Batviele Chaval me djumalaskir numen Lantier va in djuprogaytar. Catherine tatcer. Lantier va Chaval otces isker. Kadimi bata lugavaca, milk ko Montsou dineson va beg djukudimlanir.

Edje Hennebeau W-ye sonker da kurenikya rester, pune dodelik va Montsou kolanid. Gan zide is ael zo tuevakad. Artlanison kabdu inafa mona, ilgaeleson axazed : « Va beg ‼ Va beg ‼ Va beg ‼»

Lantier va kiewuca ke bata ipera ilfolir voxe do milk arti liza djukuzavzagir. Latunariltar. Maigrat va Hennebeau W-ye pomadar voxe zo dimstakser. Ayikya va Cécile yikya ke Grégoire pluked, kan po tulebason. Solpaketeson, Lantier iegar da sin va Maigrat godenlanid, malseotatason va beg. Maigrat moo kepaita lagotcer voxe luber. Inafa taka mo sid roidar. Ayikya va in alied, va tawa ko inaf art plekud, va ikra soltiolted. Batultik artlakid.

Teveaf luztum

Ervolia va kawoda anamsur. Maheu zo taruler. Lantier pikses preyutason blir ise giberoxanason koe orike va vielcek tiskir.

Maheu is vegungik tizon mijed, lazaviskon. Cu is ael kevwad. Lantier va int divvaskar. Belgaf dodelik kobatason dene kawoda nuve al zo rozad. Maheu ta kobara klibur. Gan Maheude zo pobaxar. Alzire tana nazbeya ke yasa aelawalker.

To Chaval va belgaf dodeliktum gader. Va Lantier rwamar voxe ilcener. Laizon va wed divucomar. Catherine lajubaservoar. Lantier va in gu griawira granser. Catherine doon djumallanir voxe gan Chaval zo zamber.

Lantier va Catherine lalevrotimir voxe mbi vewar kiren ine djuzavzar sagafe gu Chaval. Blitison do in fure gin mallanir.

Dodelik va ervolia koenintesa va kawoda djukudilfud. Sayakik va yastesik toz viltad. Maheu tir tan xonukesik.

Pereaf luztum

Kev bata dilzesa tizuca, kawodik tid merotis nume va dimpira ta kobara trobindad. Va Lantier torigin gu blodik ke stakera sated.

Lantier is Souvarine vilkiraf arotievik mijed. Lantier wan laner da selteva sotir maera va dodelaf uumeem. Souvarine tir mu tizuca is mecobeva.

Souvarine va kawaxo siker, nekison va molavara elekasa va Chaval is Catherine is Étienne tite kawaxo. Chaval sagaf gu krumtafa is zidesafa anda va Étienne pistoler. Bantel va in zideson tere aytar. Bam Catherine is in va kalaf gemeltam tere rowalzilid voxen Catherine abdi artlanira ke grelesik di zertur. Ke Maheu yasa, ant Maheude is Jeanlin lapted ise pu Lantier ixed ise va enekefa kakevdara wan kevfolid.

Berpot ba mallanira ke Lantier dimpis ko Paris jiadawer. Banvielu in re laner da nope bata bagala kawodikeem va ristasa roda lanviele rotempatad nume dene lomalyaf selt di blitir.

Germinal tir berpot malyaf is elimaf gu dalingera va dodelikafa blira. Zolteks tir rotatrakurevaf larde Zola nufimukar da abduxoa co tir merotisa isen selt yalestaf. Soe tena ke berpot va koncoba vektasa vas sokasanefa pokolera nedimir.

Dere rupel

  • Émile Zola : Francavaf francaf suterotik ( 1840-1902 )
  • (fr) Germinal, dene Wikisource ( xantokrent )
  • GerminalGerminal ), pak- kalkot- 2003 gan Laurent Lermigny, Wikikrenteem, telo nuyanevaxo suterotxo, banliz
Germinal
Open book nae 02.svg
XANTO
Vergumvelt Germinal
Sutesik Émile Zola
Ava Francava
Suterotinda Berpot
Evla 1885
betara teza
Bookshelf icon (red and blue).svg  Tuveli icde Suteroteem  Bookshelf icon (red and blue).svg
Taneafu bu ke xantof nubasuteks, 1885