Jivago selaropik (suterot)

Jivago selaropik

Jivago selaropikrossiavon Доктор Живаго ~ Doktor Jivago ) tir berpot ke Boris Pasternak sovietaf suterotik, taneon sanegayan bak 1957 koe Italia. Vergumvelt ke berpot tir yolt ke an koredik, i ke Yuri Jivago tiso selaropik is ezlopik ; tegira wali Rossiafa Artowara ke 1917 is Toleafa Tamavageja dilizer.

Nope volruptesa tirka ke sutesik dolge Artowara ke Saneaksat, sanegara va berpot koe TSSS zo malvewar. Nubasuteks koe Italia birgoton zo divtunser aze bak 1957 koe Milano gan Feltrinelli piskusik italiavon zo sanegar. Pasternak gu Nobel suterotafo poradro direilanon zo gabler numen bata bifa va sovietafa vertuma ke TSSS tokteper ise tuyatkar.

Berpot bak 1965 gan David Lean zo tuelpatar nume tir kiewatcapaf.

Atoera

Taneafa piskura kan kalitaliavaks koe Italia bak san-taneaksat ke 1957 dene Feltrinelli piskusik zo sanegar, isti Fentafa Geja. Amuzera va berpot ko Europa is kan Rossiava mali taneaksat ke 1958 gan CIA amerikafa ristula zo tukuvapar. 1000 tulok koe Den Haag koe Nederlanda zo rubiad. Bata taneafa tcordafa rossiavafa piskura abdi tela winugafa rossiavafa awir.

Mililanon Pasternak va Nobel suterotafo poradro seotar voxe stegenon gan sovietafi gaderopafi roti gonovewar. Berpot bak oxam san-taneaksat ke 1985 koe TSSS zo gonosanegar : to tana taneafa fenkusa sugda ke Mixail Gorbatcyov.

Rupa

Rupa ke berpot tir abrotcafa is birtafa. Mefakafa gu toloya lazava. Taneon Pasternak va jontik koredik sinton is merotabdiwinon waltegis remi berpot uner. Ison va koredik kan tan baroy inaf yolt jontikviele atoer aze kan arbat ok ikayolt vaon vuester, metuelimason da bantan tir miltan.

Neva va trutca icde kalfira ke Rossiaf Gindugal va sovietaf TSSS mobilder ise va eaftafa wideytafa geja tuawalkexayasa va sanelia pimtar, i va muik lidam kevik. Sibira ton suvepes bask zo dalinger lize tegiraki bak 1920-e sanda dilizer.

Taneaf pak : Impadimak ke 5-e bartiv

Gindafa Rossia, 1902. Berpot ba caxafa jobdura icde Maria Nikolayevna Jivago gadikya ke Yuri Jivago tozuwer. Jontikedje jovleyesi gan gadikye, Yuri gan Nikolay Nikolayevitc Vedenyapin gadikyafe ziavye zo koemuder, i gan trakopik is Orthodox savsaf gertik re kobas mu piskusik va abduxoevafa fela koe winkaf widot kene Volga bost. Andrey Jivago gadikye ke Yuri dare tiyir kulaf bewik ke dolekaf oluikeem ke Moskva voxe va yasafa tufa koe Sibira al lorkar, gruspeweson is kapuson.

Direidulugalon, Yuri tisi san-balemdafi is Nikolay Nikolayevitc ko Duplyanka lakid, den pilkot ke Lavrenti Mixailovitc Kologrivov kulaf dolekik va leso. Bantel do kurenikya koe divexo re tigir voxen va Ivan Ivanovitc Voskoboinikov gruadik banlize dere blis auzud. Nazbeikya ke Kologrivov, i Nadya ( 15-dafa ) is Lipa ( lojotafa ), do gaasikya is yona kwikya koe ind dere blid. Innokenti Dudorov ( Nika ) san-bardikye, i nazbeik ke lanzayan eaftevik, dene Ivan Ivanovitc gan gadikya koe trapova al zo koinker. Edje Nikolay Nikolayevitc is Ivan Ivanovitc koe matela gozad ise va trakopa flided, pune katcalad da impadimak sumolapis ko wotrafo xo al vukir, razdason da koncoba me guyunder. Koe imapdimak, Mixail Gordon ( Mica ) san-tanikye do gadikye koyar. Sin mali barka koe impadimak tigid. Miledje lane neciikye va yalam pu Mica al ziliyir ise remi konak bartiv pu Grigori Osipovitc Gordon gadikye pulviyir. Voxen battanye koldayane gan aluteik doon koyas va int tuizakayar. Tere ko zeria ke lapise omaze ipeyer, divpakudeson va gadikye ke velik, aze va tuvel fenkuyur aze va int malkabuyur nume awalkeyer. Gadikye ke Mica va kwitaf daney ve impayar numen impadimak vukiyir. Koyasik divlanid aze va awalkoda wid edje ardial zo rozar. Aluteikye ke awalkik poke alto tigir ise va ksera nope ruyatakola pebur.

Toleaf pak : Velikya ke ara anameda

Bak rossianiponafa geja ( 1904 - 1905 ), Amalya Karlovna Guichard do toloy nazbeik ( Rodyon / Rodya is Larisa / Lara ) ko Moskva mal Ural gola artlapir. Awalkeyese kurenye ke Guichard weltikya tiyir belgafe koyase wetce dritik mu kelotafu sistu ise tiyir nik ke Viktor Ipolitovitc Komarovski aluteik is wontaf arientusik. Komarovski va sin ko mawa ke Montenegro morafa gida koinked. Va Rodyon den sayakafa olda is va Lara den yikyafa olda bender. Bana olda dere tir tela ke Nadya Kologrivova. Pirdanon gan Komarovski, Amalya den vagefa doltama boar. Inya is nazbeikeem dene Montenegro gida remi tanoy aksat blid aze va kraba vamoe dolta di kosoked. Komarovski nekev skedegara va Amalya, va Lara kadime ge ke gadikya toz kiewagir.

Titi santoleaksat, dodelik ke kelotafa sarva wale Moskva is Brest-Litovsk toz yasted. Gelusik ke golda tir Pavel Ferapontovitc Antipov. Kiprian Savelyevitc Tiverzin nikye ko lane dimempaxe ke kelot zo rozar numaze weyonar da lan dodelik va tavembik ( Osip Ximazedinovitc Galyulin ) alier. Ardial va Pavel Ferapontovitc nope yordara koe yast soper. Pavel Pavlovitc Antipov ( Paca / Packa / Pacenka ) nazbeikye ke Pavel Ferapontovitc do Tiverzin is inafa gadikya toz blir. Gadikya ke Tiverzine is Pavel va exaksara dilfuna gan Kazak sayakik paked voxe remblid aze dimdenlanid. Edje exaksasik il sayakik yated, pune Nikolay Nikolayevitc ziavye ke Yuri koe kraba ke Moskva kake dilk tigir ise va yates korik divdisuker. Kabdion va gola ke Volga ko Sankt Peterburg al divsoker ise miledje al jupar da Yuri va Moskva artlapir enide dene Gromeko yasa di irubar. Bata yasa vas Aleksandr Aleksandrovitc Gromeko is Anna Ivanovna kurenikya is Nikolay Aleksandrovitc kaelafe berikye ruldar. Anna tir nazbeikya ke kulaf rabik ke azaka, i ke rabik re awalkaf is xantaf gu Yuryatino vema koe Ural gola. Sin va Tonya nazbeikya dikid.

Lansielon bak taneaksat ke 1906 Gromeko va auzara is lexura deneon grustar. Tan lexusik tir dingeltokusik naf gu Amalya is vegungik koe Montenegro gida. Lanviele male gida zo rozar kiren kontan banlize awalker. Aleksandr Aleksandrovitc is Yuri is Mica do in lakid. Dene gida Amalya zo roper kire kan wuptesixa al lajivakser. Baroye sardikye va mawa tixolon kolanid. Banlize inya lebamafa is furovepesa do dingeltokusik pulvir ; kalir da « uculecker » voxen « bexe batcoba nijuyur kwestaca. » Katcalad da koe orikafa alava ke olkoba moe rova, modasa sardikya tigir ( to Lara ). Wotron Komarovski kadimu marwida divlanir ise va gum mo azeka poke rova ke Lara vanburer. Afi divmodar azen ina, megrupeson da gan Yuri is Mica zo dizver, va koekafa vula do Komarovski pakar, dumede « co tir dotc levveges va nubumara ke ini dotcusik ». Sin va dofugafa disukera ikazilid, tison kalaf da sinafa birga me al zo kosmar isen Amalya me tir awalkeyesa. Taneatomon Yuri va Lara wir ise gan nakila zo droler. Mica pu Yuri bam prejar da bate dizvenikye tir miltan tuizakayas va dalintafe gadikye moi inafa ksera koe impadimak.

Bareaf pak : Kristanazbalavielaf aal dene Sventitski

Bak santaneaksat ke 1911, Anna Ivanovna Gromeko astirbon toz rizakoler. Banugale Yuri is Mica is Tonya vayad enide di vanpid selaropik is avopik is aluteik. Yuri kosmar da va mialaberikye yoltkirafe gu Yevgraf vey gadikye dikir.

Nega va imwugal ke 1906 radimfir. Lara gan kofelira ke Komarovski va int loloon zo olyaster. Enide va ini di ilfir, pune trasitison va une, va Nadya Lavrentiovna Kologrivova pulapusik gukoer. Nadya drager da ina mu dalintafa yasa kaaneyasa va gaasik mu Lipa berya rokobar. Lara wetce gaasik dene Kologrivov va loon barda tiskir. Va bata yasa mafelar numise ganon zo albar dumede co tir kon nazbeik. Lara gan Rodya berye zo auzur. Battel va 700 rubl talolk golde boza olegar. Ika itaya seotatana bas Kologrivov, va inaf sayakaf dierk is yona aganta mbi bulkar. Va erba seotar voxaze zobeson va Paca Antipov dawarye is inafe berikye divbliyine kofaver.

1911 ilana. Lara va tawadayaf pilkot ke Kologrivov doon ironokon worar. Toz tir mevaleafa gu debala voxe va tci ke xo soe impavantar ise kan dierk ke Rodya vanpir viltanyasik. Viele ina is yasa ko Moskva dimlakid, pune inafa mevaleuca laumar. Moni kristnazbalaviel, va Kologrivov ebava djubulur nume va adrafa erba pu Komarovski di erur. Abdiwir da kan dierk ke Rodya di aytar tode ini co vewar. Ba 27 ke santoleaksat tis evla ke kristnazbalavielafa jora dene Sventitski, kevlanitison va Komarovski djulanir voxe va paca taneon auzur, kire va furefa kurera puon djumerur. Edje Lara is Paca vaon keyaksed, Yuri is Tonya den Sventitski lanid. Sin artlanid aze va jora toz pakad. Azon Lara dere artlanir. Va ant Komarovski gruper ise va sirtablucte me diskir. Komarovski liwombur nume va ina me katcalar oke nujidaskir. Lara narur da tan ar liwusik tir Kornakov, i tan malyesik ke erkey ke Moskva. Bantan va tum dem kelotaf kobasik don Kipryan Tiverzin brogadikye ke Paca al malyerotar. Azon, edje Yuri is Tonya stuted, tanoya viltara tauler. To perzucapa tir aze kosmat da Lara va Kornakov vols Komarovski viltayar, voxen bakaks tir pinotaf. Lara al krezer aze mo rova gan abic ganenik zo impadimar. Yuri va ina akoydanon kagruper. Va Kornakov wiluon toz roper voxe dakter da bakaks anton tir « grewej ». Kwiton zo givar da di godimdenlanir kiren koncoba icde Anna Ivanovna al sokir. Viele Yuri is Tonya artlanid, pune kosmad da Anna Ivanovna su awalker.

Balemeaf pak : Plura artfir

Komarovski va gaderopafa skedara ta rojura va Lara kev malyerotara faver. Lara is Paca va sint kured, va kotlaf dob seotad aze ko Yuryatin kan impadimak mallapid.

Nega bak toleaf muvugal ke Taneafa Tamavageja dilizer. Yuri va Tonya al kurer ise wetce selaropik koe ropexe ke Moskva kobar. Tonya va taneaf oc konazbar, i va nazbeye. Radimi dimlapira mal Yuryatin, Antipov tolonga va taneafa nazbeikya yoltkirafa Katenka dere dikir. Paca pester da gan renara ke Lara zo belkesir kore renapar. Batdume ve tir kuranik den gindafa rossiafa ervolia. Lara wetce tavesik koe Yuryatin toz kobar. Kadimion va Yuryatin bulur kiraze ko widava ke Galitcina mallapir, kaaneyatason va Paca. Bana widava tir tela lize Yuri wetce sayakaf ropesik re kobar. Arlize Antipov rikulik gan osterafa ervolia zo kostoler voxe zo torigir da moe meldxo co griawiyir. Yuri gan bulira al zo bakar nume ko ropexe koe Meliuzeyevo widava zo stakser lize Lara tir ropesik. Galyulin ( tavembik alieyen koe toleaf pak ) koe zaniga ke Lara dere tigir lize nope bakara vogonur. Re tir rikulik dene taksa ke Paca nume va lara rogivar da bantel tir blis, voxen Lara etrakar. Lara va Yuri lokiewon toz gruper neke me zo woer. Tici bat pak, koe ropexe zo givat da lana artowara su sokiyir.

Alubeaf pak : Donera va darekeugal

Kaiki fraskewera, Jivago selaropik koe ropexe zavzagir. Nume va Lara vikon paskaler. Sin toloy ( voxis Galyulin ) lasujupad da dimon denon di romallapid.

Koe Melyuzeyev, lan ramisavik ke abdarafe bowere sure artlapiyis is yoltkiraf gu Gints zo givar da lana lizukafa sayakafa taksa su emdur aze koe vegungafo aalxo re pemar. Va Kazak milk ivamudatas is baservoatas va emdusik djudositar. Kazak sayakik artlakid aze va emdusik kalion ivamudad. Gints pu emdusik dewitcar voxe vol buiver eke dositas sayakik zo malbuived nume va okol titlanid aze gu emdusik va int toz tuberad. Kazak fayik pirdad da Gints yater voxen bantan gan emdusik zo onkar numaze koe golda fikon zo adjuber.

Levi mallapira, Yuri va Lara divkiavar. Va seramuca toz muxar, i va rieta da « kepaita ke varafa Rossia zo soltiolteyer numen min is kotafe sane koe rid taneatomon tigit. » Nekev int, bam pu Lara gempon toz kalir da va pestaka mu ina dikir. Lara waljoar numen va sint solparsad. Arti tanoya safta sin kan amidaf impadimak mallapid, ina ko Yuryatin vox ini ko Moskva. Koe impadimak Yuri under da tamava al tuamidapawer ise « va ina teldon al lasumerenar. »

Teveaf ik lerdeaf pak : Greelt koe Moskva - Koyara - Artlapira - Varikino

Radimi Artowara ke Santaneaksat is toza ke rossiafa wideytafa geja, Yuri is yasa van savsaf yasaf pilkot ke Tonya ( yoltkiraf gu Varikino ) tigis koe Ural meftavafa gola djuyated. Bak impadimakafa koyara, Yuri va Strelnikov ramisavik ( tiglik ) kakever, i zugaf redakik flioton giklibus va gralomen batakik is jontik wideytik. Yuri is yasa va jovleyena mona ke pilkotxo levirubad. Bak fentugal va neva belid isen Yuri va ezla is felateliz suter. Imwugal artfir isen yasa koe vesk djuprokobaver. Yuri ko sanefe nevaxe ke Yuryatin toz gilakir numen bak tana worara va Lara koeon kozwir. Lanviele djupropulvir voxen ina al griawir. In va mane ke inafa oga merontion lajuseotar. Bak ara worara ko widava, va ina ko inafa kraba auzur. Lara givar da Strelnikov en tir Paca kurenikye. Katecton gu lanara auzura koe Yuryatin, sin toz skedegad. Azon koe inafa kraba bak lo toloy aksat va sint belon kevlanid. Voxen Yuri gan konake sagikye ke Liberius zo ilwaler, i ke dirgasik va « Yelipa ke Aalxo » Bolcevik gejelaf blay, konviele mal durimafa kakevetca dimlakir.

Saneaf ik san-bareaf pak : Mo vawapa - Aalafa ervolita - Eladayasa napleka - Lente kudjakirafa mona

Liberius tir abidase Bolcevik savsikye is keskotapaf andik. Neke dere tir malafamik is taspusik is ketsapik. Va Yuri gu laxapa icde aliuca ke selteva is titisa cenera dun argar. Yuri va loon tolda do Liberius is blayikeem tiskir aze tere lajupotcer. Arti kuncasisa dimlanisa koyara kal Yuryatin, Yuri ko widava artlanir nume va Lara taneon wir. Zo givar da kurenikya is nazbeikeem is ikagadikye va pilkot al yategad aze ko Moskva dimon lapiyid. Lara razdar da radimi inafa griawira Tonya va pintikya radekayar aze sina va sint tunayad. Yuri va une trasir nume do Lara is inafa nazbeikya bak konak aksat zavzagir. Lanviele irubasik ke widava va twa ke Tonya pu Yuri blider, i va twa suteyena weti aluboy aksat az remniyisa koo data nuba kali ini. Koe bata twa Tonya givar da int is nazbeikeem is gadikye ko ape Paris fu zo divblitid. Kalir : « Uum tir da va rin rená volsen va jin renal » is « Meviele va sint gire witit, mevielu ». Ba tena ke belira va twa, Yuri ve astkranaver nume krezer.

San-balemeaf pak : Dim Varikino

Komarovski gire awir. Uneyeson va turestara dene doevafo pako, Komarovski wetce eldik ta malyerot ke Sokasane ke Lugavafa Roneka su zo koflir, i ke teca detcafa soka tigisa koe Sibira. Drager da va Yuri is Lara birgoton fu divpatectar. Sin taneon vewad voxen Komarovski rokleson dakter da Paca Antipov zo uculegayar gan pako ise re tir awalkaf. Lara gan Tceka gaderopaf ardial co zo kulmer numen in va Yuri buiver da ina batvielu talton goyater. Lara tere dotrakur nume do Komarovski mallapir ; Yuri fure dere lapitir. Miledje, Strelnikov jadiwik ( Paca ) wan tir blis voxe zo onkar neke aneyatason va Lara ko Varikino dimlakir. Gaverson, Lara mea tigir. Paca va batceks ke intafa kranavesira va vo is yasikeem muxar numaze kser. Yuri va inafo alto diregazdon katrasir.

San-alubeaf pak : Tena

Kadimi dimlapira koe Moskva, galera ke Jivago vantenur ; va Marina ara ayikya yerumar nume va toloy nazbeik doveyon di dikir. Va konak suterotaf abdumimaks dere guzekar voxe meviele di tenuker. Yuri va warzafa yasa jovler aze koe Moskva ant blir ise va sutera kobaver. Voxe arti ugalam nope takradeonera koe lundek mulufter. Milugale Lara ko Rossia dimlapir aze va awalkera ke kurenikye zo givar aze va caxa ke Jivago tcoker. Va Yevgraf Jivago mialaberye ke Yuri re tise jadiwik ke NKVD ardial buiver enide in va dimdrasura va nazbeik di pomar, i va nazbeya dovey Yuri buluyuna koe Ural gola. Tere Lara griawir ; kottan trakur da bak Karlerapa ke Stalin zo sopeyer aze dene stolexo ke Gulag bolk awalkeyer, i « kon yoltiskaf otuk koe vexala azon egluyusa. »

San-teveaf pak : Radimifta

Bak Toleafa Tamavageja, guazafe nikye ke Jivago, i Nika Dudorov is Mica Gordon, va sint katrasid. Tana sinafa prilara vas lizukafa tcatesikya yoltkirafa gu Tanya tikir, i gu gejaf gadiskik vektapasa vas Yuri is Lara. Tanya pu sin va volfakaf rumeugal pwader kire gan gadikya yerumayasa va Komarovski zo jovleyer. Vamoion, bat sin va sint gire katanad, katecton gu taneafa piskura ke ezlak ke Yuri Jivago.

San-pereaf pak : Blok ke Yuri Jivago

To bloktum suteyen gan Jivago selaropik tid.

Koredik

Dalaf koredik

  • Yuri Andreyevitc Jivago ( Yura / Yuratcka ), i Jivago selaropik. Nazbeikye ke sibirafe kulafe dolekikye is Maria Nikolayevna Vedenyapina ; kurenik ke Antonina Aleksandrovna Gromeko ( Antonya / Tonya ) ; va toloy nazbeik dikid : Saca is Maca.
  • Larisa Fyodorovna Guichard, kurenikya ke Pavel Pavlovitc Antipov ; tanoya nazbeya : Katya.
  • Pavel Pavlovitc Antipov ( Paca / Packa / Pacenka ) ; nazbeye ke Pavel Ferapontovitc Antipov kelotaf kobasik is Darya Filimovna. Vayasik az jadiwik ke artowasa ervolia ikayolton gu Strelnikov.
  • Viktor Ipolitovitc Komarovski ; aluteikye az gaderopik bak artowara. Nendasik va Amalya Karlovna Guichard ; fertikye ke Larisa Fyodorovna.

Yasa ke Larisa is tela ke Jivago selaropik

  • Yevgraf Andreyevitc Jivago ( Granya ) : mialaberikye ke Jivago selaropik.
  • Nikolay Nikolayevitc Vedenyapin ( Kolya ) : suterotik is ziavye ke Yuri Jivago.
  • Antonina Aleksandrovna Jivago ( Antonya / Tonya ) : nazbeya ke Anna Ivanovna is Aleksandr Aleksandrovna Gromeko, kurenik ke Jivago selaropik. Va toloy nazbeik dikid : Saca is Maca.
  • Aleksandr Aleksandrovitc Gromeko : tawamiduropik, kurenikye ke Anna Ivanovna Krüger nazbeikya ke azakiasik ke Ural gola. Va tanoya nazbeya dikid : Antonina ( Tonya ).
  • Amalya Karlovna Guichard : francikya nyobrafa gu belgafe dritikye kobase koe Ural gola. Gadikya ke Rodyon sayakafe ravesikye is Larisa.

Nikye is skedeganikya ke Jivago

  • Mixail Gordon ( Mica ) : nazbeikye ke Grigori Osipovitc Gordon. Nik ke Jivago selaropik.
  • Innokenti Dudorov ( Nika ) : nazbeikye ke Dementi Dudorov arotievikye is Nina Galaktionovna sakartvelafa sersikya. Nik ke Jivago selaropik.
  • Vasya Brikin : yategasik va kobasa ervolia. Koyas dositik ke Jivago az inaf nendanik.
  • Marina Ctcapova ( Marinka ) : nazbeikya ke Markel Ctcapov tuvelsusik is Agafya Tixonovna. Tisa bocafa skedeganikya ke Jivago, va toloya nazbeya veyon dikir : Kapitolina ( Kapa ) is Klavdya ( Klava ).
  • Anfim Efimovitc Samdevyatov : Bolcevik zolonaf flibik, nendasik is nik ke Mikulitsin yasa isu Jivago.

Nazbeikeem

  • Saca ( Sacenka / Sanetcka / Cura / Curotcka ; yoltegama ke Aleksandr ): nazbeikye ke Antonya Aleksandrovna is Jivago selaropik.
  • Maca ( yoltegama ke Maria ): nazbeikya ke Antonya Aleksandrovna is Jivago selaropik.
  • Katya ( Katenka ; yoltegama ke Ekaterina ): nazbeikya ke Larisa Fyodorovna is Pavel Pavlovitc Antipov.
  • Tanya Bezotceredeva : nazbeikya ke Larisa Fyodorovna is Jivago.

Grupenik ke Larisa

  • Lavrenti Mixailovitc Kologrivov : kulaf rabik. Gadikye ke Nadya is Lipa tisa rumeugalaf nik ke Larisa Fyodorovna.

Ar koredik

  • Osip Ximazedinovitc Galyulin ( Yusup / Yusupka ): nazbeikye ke Galyulin tuvelsusikye is Fatima. Poopik az jadiwik ke batakafa ervolia bak artowara.
  • Terenti Galuzin ( Tereca / Terecka ): nazbeikye ke Vlas Paxomovitc Galuzin is Olga Nilovna. Kseldunik den batakafa ervolia az gelbesik den artowasa ervolita.
  • Averki Stepanovitc Mikulitsin : savsafe pofesikye va Krüger azakiaxe. Va Liveri nazbeye vey Agripina Tuntsova taneafa kurenikya dikir.
  • Liveri Averkievitc Mikulitsin : nazbeikye ke dareik. Okilik ke artowasa ervolita koe aala, ikayolton gu Lesnix.
  • Xristina Orletsova : nazbeikya ke Bonifatsi gertikye, aguntanik ke Innokenti Dudorov. Gejagradilik.
  • Pamfil Palix : ervolitikye. Savsaf sayakik ke gindafa ervolia is pisonasik va Gints ramisavik.
  • Pelageya Nilovna Tyagunova ( Palaca / Polya ): berikya ke Olga Nilovna Galuzina. Nik ke Vasya Brikin.
  • Kipryan Savelyevitc Tiverzin ( Kuprik ): nazbeikye ke Saveli Nikititc Tiverzin kelotdodelik is Marfa Gavrilova. Dere kelotdodelik az bewik ke artowas erkey do Pavel Ferapontovitc Antipov nik.
  • Evdokia Tuntsova isu Glafira isu Serafima : baroya berikya tisa ziavik ke Liveri Averkievitc Mikulitsin.

Ozwaks

« Lanviele Larisa Fyodorovna mallaniyir aze mea di dimlaniyir. Ape koe nuda zo sopeyer. Ape awalkeyer oke griawiyir, awe, vulkuyuna ton yoltiskaf otuk ke kona drasuyuna vexala, koe tano dato rezgalexo koe Lenteka. ».

— Boris Pasternak, Jivago selaropik, « Tena »

« Jinafa mempesya, merovulkunya ! Liedje suxoma ke jinaf meem va rin setiketer, liedje keve jinafa epita isu kutceem wan altogitil, pune do rin tití. Va ikuzeem ko koncoba bagaliafa gu rin is zavzasa plekutú. Va rinafa setikera ko krenugafa ewava bendeté, i ko ewava gabentafa kir remgabesa va takra. Batlize tigití vieli batcoba al zo askitir. Azon dere malfití. ».

— Boris Pasternak, Jivago selaropik

Elpataf grabom

Dere rupel

Jivago selaropik
XANTO
Vergumvelt Доктор Живаго
Sutesik Boris Pasternak
Ava Rossiava
Suterotinda Berpot
Evla 1957
betara teza
  Tuveli icde Suteroteem 
Jivago selaropik, taneafa xantofa piskura koe Italia bak 1957