Kaelafe oluikye (suterot)
|
Kaelafe oluikye ( englavon The Adventure of the Noble Bachelor ) tir berpotam ke Arthur Conan Doyle taneon sanegayan bak 1892 koe Standard Magazine virda az direilanon koe Yona stuva ke Sherlock Holmes berpotamak. VildeksRupa va griawira ke Hatty kareizur, i ke aguntanikya ke Robert Saint-Simon O-ye ba viel ke kurera. Inya titi jora tigir voxaze moi fiptara griawir. Bifeem ke viel ke kurera va Saint-Simon O-ye tubizakad kiren Hatty Doran aguntanya vofa gu San Francisco nutiyir seramapafa gu titisa kurera. Ine pu Holmes kareizur da va aflicarura ke yikya moi kuresa fiptara katcalayar. Ina mefavon vanyeyer tenkafa tove ine. Antafa megubeaca ticion koe uja sokiyir lize kurera zo fiptayar : Hatty va kurerafe tsenke volins akeoyesiyir numazen lane weltikye banlize tigise moe taneafa starka vaon treduyur aze dimziliyir. Moi kolanira va mona ke gadikye ke Hatty ta kurerafa estura, Flora Millar tis savsaf fertik ke Saint-Simon poke tuvel rondayar voxe zo divbudeyer. Hatty pulviyis pu mawakwik ba artlanira zo wiyir. Arti sanoya wexa radimi toza ke estura, yontayar da ve muzeyer nume ko mawa ezlaniyir. Kadimion konaktan rabateyed da in va mona al buluyur. Holmes va jontik uum gomaer. Toktanya tiyir tel ayik lakolanis va mona ba estura ? Toktanye tiyir weltik moe taneafa starka ? Toktanye tiyir korik lanis is win ko Hyde gerd do Hatty ? Tokdume xeyeyes kureraf gem isu xiz moe domega ke Serpentine kuksa koe gerd zo katrasiyid ? Tokcoba tove Hatty al dilizeyer ? Sedme Holmes, bata arienta kre tir opelackafa kire va yona milaca ixam al suler isen bata toda me tir birtafa gu dimaotcera nekev tugojara va Watson selaropik is Lestrade kogrupasik. Katrasitison va alto ke Saint-Simon W-ya, bantan va Serpentine kuksama dace al lajadar. Holmes va Hatty is divulikye ke taneafa starka katrasir aze va maera pu Robert O-ye kan Hatty pebur. Hatty is Francis Moulton bulikye tiyid kurenikeem voxe va sint kadimion solparsayad enide, ikseltason va moava, ine va tufa di laflavayar. Voxen bal govitikafa zierdara va kawodafo pemaxo co xonukeyer lize kobayar. Hatty foliyir da ine tiyir awalkafe, aze va Robert O-ye al kakeveyer aze djukukureyer kore inafa takra vas Franck wan tikiyir. Voxen enwe Franck gan Apache amerindiik anton al zo kostoleyer aze al otceyer, suzdason va Hatty kal London. Va uja tori fiptara zdarion artlakir aze gan Hatty ve zo kagruper. Koe uja va int gutixolar voxe geltumar enide Hatty di stivawer, azen in va lipimi suter, i va lipi fargieni viele va tsenke puon dimzilir. Hatty al djukuyateyer, kalison va mecoba pu kottan, voxen Holmes va sin al katrasiyir ise al buiveyer da varafa ageltuca vode co tir. Neken Robert O-ye gan parara ke Hatty me zo konter ise laner da al zo tafur. YunkexaKonaka yunkexa va berpotam, koe sanegasa virda bak 1892 : Dere rupel
Vuestexa
|
 Tana yunkexa ke taneaf piskuks va berpotam bak 1892 | ||||||||||||||||
.svg){kind=icon}