Kuelap

Kuelap ~ Savsafi widaki ke Perua

Ralma ke Chachapoyas rujodaf gejik

Kuelap tir zolonafo rawaxo abdi Inca ugal tigiso lentrone Andes rodega koe Perua, koe Luya winka, gan Chachapoyas arayik zo vegeduyur.

Va vegeduropafa belca dem cugexafa jolapa tazukar, is dem tcaf azekosap geulenton tigis moe xed ke Cerro Barreta kalkafa stona ( ontine vas 3000 m- ). Azekos kene mon 600 m- divlizewer ise gu anamezafa rebava zo anammadayar, i gu rebava konaklize tisa ontinafa gu 19 m-.

Uldinet da vegedura moni XI^-eafa decemda zo bokayar, keni tuzaskawera ke Chachapoyas araya, azen kerelera di tiyir cugafa isti XVI^-eafa decemda. Ctakaf rebaveem is birtafa koefa vegedurinda va fli mu lana grustayana sanelia vrutad, dem irubaxo is alkaf seg isu fiptaf is elupkaxo.

Debala is vansara

Rawopaf birtey ke Kuelap manekon ice 6°25’9.29″ G- is 77°55’22.85″ T- koe Luya winka ke Amazonas gola tigir. Mallanixo koe Chachapoyas widava tigir azen vansasa kelda va wixafa vawa vwon ice Nuevo Tingo poke doma ke Utcubamba kuksa bulur aze tawaf vraday ticnir. Mal tawila poke cugexa binka kal ralma star.

Vansara moo arestafa binka zalorafa gu 9 km- is ticumasa va 1200 m- mal El Tingo widavama dere rotir. Mali 2017 raxanja ta exulera vas 20' titu Nuevo Tingo krulder, divnedison va ilamkaf patectoy vanmiae wuka.

Kosmara

Bata cugexafa stabrega ke Chachapoyas vegeduropa riwe kali 1843 zo afanayar. Lazava tir merovansanuca ke aalafa gola elupkon muvakirapafa. Wori ba 31/01/1843 Juan Crisóstomo Nieto gan lizukaf irubasik zo nyapeyer nume va debak winugon kosmayar.

Azon Kuelap gan konak rilitik isu grupelik zo dulapeyer. Tulon Adolf Bandelier va in pimtayar azen Louis Langlois francik bak 1930^-e sanda drunayar. Isen dere Federico Kauffmann Doig peruaf rawopik va debak is Chachapoyas araya vayapayar.

Pimtara

Dalafa vansara

Dalafo kolanixo va favera ke ticemaf koredik vrutar, oye osk tazuk is vegeduropaf pinteem voxosk runda ke jontiki raporki ke vegeduks yunkeyeni gu gedrafa alkafa leca don gexata is vundaf sulem, i don perake lecase va alkucapa. Vwon ice vansaxo va vrutaks va laumara ke debak dere trasit, i va tulon yona adonesa badapa voneyesa va konaka azafa divlizera.

Dopewapa

Dopewapa ( espanavon Templo Mayor ) tir tano lozolonafo tumtaxo ke cugexa. Bata kolna ton tazuk ke trovgaf fey tir xakolafa vas 13.5 m- vwon ice ontinuk. Jontik vrutaks va gedraf firviks al zo stragayad isen birtafa miga va rundara va ayafa niska is niskaxopo koe koef ak kodoplekuyud. Aname xe konako kotawaxo isu firviks malu lentefa krimta is geuon meftavaxo ke Ayacucho is Cajamarca koe lentefa rodega zo trasiyid.

Ivamuf azekos

Ivamuf azekos tigis kake geefa rebava ke debak tiyir flikirackaf gu « Dopewapa ». Moe bat azekos tel koredik blodaf gu flira ke debak batlize ape sokeyer. Tena ke blira ke Kuelap va lana tsokapafa stakera dikir, i va stakera dilizeyesa vawale ant mil azekos is divlapuyusa va beta ayikya, skuyuna gan grustapayana lizukafa lospa xuton gu rotikoboda. Diza ke bata bifa tiyir firdap anamvilayas va debak num parmafa jovlera. Batcoba moni 1570 ape sokiyir ugale espanik va bolk saves va amerindiikeem jadion exoneyed.

Ticefa widava

Ticefa widava valente debak isu vatalte tigir ise gu rebavapa anamnarisa gu arak ke belca zo kimar. Baroy gotunackaf seg tid ise koo toloyo xo zo vansad. Bato va vansara va lentef is istef gabot nover solve bano va geef seg tickis irubaxof anton rovansar.

Inca naboxa vagee ticefa widava

Koe aptafe dre Inca naboxa zo kosmayar, i naboxa ke sardik dem dugapaf firviks tis gedelafa trocadayxa is xim ke intafa muka is tanoy yantaf enaav. Batcoba rotir tiyir Capacocha firviks, i Inca orpa ksubeyena koe loo lozolonafo alkaxo ke gindaxo.

Idja ke ticefa widava

Bat gabot va sanegafi fli bak bocafa kerelesa rekola goyordayar. Baroye dre lujorafe ok rontagentimafe ke Inca rekola krulded ise va yone savsafe ivamufe dre traozed. Balemgentimafe emoyapayane dre geeon arte bat gabot tigid ise vas jontika taneodafa ok toleodafa ayikafa naboxa ruldad. Bata kolna ape tiyir dem tolbopifa ok balembopifa kepaita. Wazdexa ke yona losavsafa kolna valeveon tigid.

Callanca kolna

Bata kolna tir ke Inca xanta. To tela logijafa ke debak, ton rontagentimaf tazuk isen inafi fli rotir tiyir wetce callanca xe zanudase va fiptaxo vox dere sokexo mu koyasik is emudenik bak Inca rekola.

Rasek

Delafe xe flion gu fipta tigise lenteon arte debak tir pak ke lentef gabot ke ticefa widava, drume vatalteon merovansan bup. Konaki decemoyi anamkafi kalkafi raporki zanudasi va mimadjo koe ticak tigiyid. Voxen sinafa yorda rotir tiyir fiptafi lodam rojusi. Ticefa darka tiyir pinafa nume va tigira ke abic korik noveyer. Ostik vegungafa mona va wiranya vakorayad.