Lamone ke Karpaty rodega (suterot)

**Lamone ke Karpaty jaka**
	XANTO
	XANTO
Vergumvelt	Le Château des Carpathes
Sutesik	Jules Verne
Ava	Francava
Suterotinda	Berpot
Evla	1892
betara	teza

Lamone ke Karpaty jaka

Lamone ke Karpaty jaka tir tacukaf berpot ke Jules Verne sanegayan bak 1892, tis tana karba ke Yona zultafa koyara nevatum.

Vildeks

Koe Werst wida koe Transylvania ( refa Romania ), Frick namulolsusikye lanviele katcalar da vikiz va rawafe lamone ke Rodolphe de Gortz nudivstir : acum kolna gire co tir dem irubasik. Bat warzot va widikeem mayesir, i va opelik kaikfolis da lamone zo veber ise gan tacedik gin zo kereler. Nick Deck jotafe aalkobasikye is dositase selaropikye ke wida ko lamone djukulanid voxe nope evodasa wica di tukosawed. Banviele Franz de Télek jotafe biptikye va wida artlakir. Va debala ke lamone zo givar ise gan yolt ke digisik zo pedrar.

Pwadesik weti konak ilanacek kimbar nume va rupa ke Stilla italiafa dankasikya kareizur. Ba kota zirsera, bata yikya aguntanafa gu jotafe Franz de Télek bipitikye va mayesisa maldisukera pestaler : to Rodolphe de Gortz tremkikye renarsase va ina. Voxen ba dye kures viel, ina moe zirsexo awalker, nuremrunon gan bata disukera. Numen toloy kevlik va waldafa ilkadera voned, kire va sint gu blodik g awalkera ke Stilla torigid. Rodolphe de Gortz pu biptik rotapsason dace suter. Banvielu ilgrupeteson va kranavera, Franz de Télek dun koyar. Lanviele va Werst wida artlakir lize lamone ke rotapsan volnik tigir.

Va lamone djukuvestar. Lajukolur aze va Stilla dankasa gilder ise wir. Gan Rodolphe de Gortz zo kostoler voxaze lajudivvawar. Va in katrasir, i va in nutigis do Stilla. Voxe viele va ina iper, pune Rodolphe de Gortz nubemar numen dankasik roidawer. Orfanik grupeik dofugaf gu tremkik va lamone dem feliik divroidasir. Bal joxara va swela, Franz de Télek tuoviskayan gan divroidara zo katrasir.

Radimitena ke rupa va bula grogar : Orfanik rotapsanaf is diveavaf redusik detaf gu Gortz va cugunayakaf bolk al tenekayar. Bat bolk askiyir da Rodolphe de Gortz va debanyes delt ke Stilla kev elza romimayar, miledje amuzeson va puda komamayana koe krafolma bal ironokafa zirsera ke dankasik.

Koredik

Stilla : italiafa dankasikya, 25^-dafa
Rodolphe de Gortz : tremkikye digise va lamone, lexafamafe, 50^-dafe ik 55^-dafe
Franz de Télek : biptikye, 32^-dafe
Inaf yolt tir germanamagyaraf voxen in tir romaniaf ise koe lamone koe Krajowa ( romanavon Craiova ) irubar. Tir ontinaf dem olukafa vola is ebeltaf iteem is gudukaf usuk. Bat takrelik gan guazafe italiafe gertikye zo gaayar. Awalkera ke inafa kurenikya is setikera va yasa dere xonukeyesa va swavarge al nekid.
Franz va Europa don pilkovon Italia al worar. Tir ovakirapaf voxis va yamba albar, i va lingeropa voxis dalon lexa. Gu Rodolphe de Gortz djukujaxadar kire va awalkera ke Stilla culimer.

Orfanik : opikye zanon gu Rodolphe de Gortz
Rotzko : sayakikye, ironokaf dositik ke Franz de Télek, 40^-daf
Nick Deck : aalkobasikye, aguntanik ke Miriota Koltz, 25^-daf
Miriota Koltz : nazbeikya ke Koltz gadesik, 20^-dafa
Koltz gadesik : malyesik is taneagadesik ke Werst wida, 55^-daf ik 60^-daf
Jonas : yudafe yoridikye, 60^-dafe
Patak : selaropikye ke Werst, 45^-dafe
Hermod : bemokilikye, 55^-dafe
Frik : namulolsusikye, 65^-dafe