Lampião ( 1897 - 1938 )

Virgulino Ferreira da Silva, okon Lampião tiyir tozekaf okilik ke Cangaço lizor koe Nordeste gola ke Brasila bak 1920-e sanda isu 1930.

Blirizva betara

Kobliyiso ( ba 07/06/1897 koe dye Serra Talhada ) koe gola ke Pajeú das Flores koe Sertão ke Pernambuco galdolk, i koe kova ke Cangaço lizor, lizu sposaf abdiik veyon tiyid, Virgulino Ferreira da Silva ( okon Lampião ) va Cangaço do toloye berikye denfiyir, jaxadatason va adjubera ke gadikye, dum sposafo Antonio Silvino abdion.

Va dirgara ke bat lizor kalion narir aze va jontika kerdela di artowarotar : nubokes gejopik grutes va banugale evodasa aptatca ta golera, Lampião va daxidafa tozekuca kaliapon konakilar lize ingara is rist va pilkovafe fetinte gu gomilura is jontika lonjera ke inaf tozekiktum nekid.

Blay ke Lampião bak 1927

Vrostagon vagekirafo dem vage dem eviesa kseva, is diskiso va edjipi yunkeyeni gu diema, is kabdunediso va xiz is flek is orilna, Lampião is inyon cangaceiro dositik koo elakena widava isu widega farud, dankagason va « Mulher Rendeira », i va intaf gejadrom, is kabuson va talolk pu sanelia vangitison ipesa, is dace walzilison va sugdaks ik afigasuteks. Ison koblayason va yona ayikya, Lampião vanpir « Gazik ke cangaço », i vundaf korobik re dure volmiv anampulvis. Tec gijarotickaf gejusik nuve nendayan gan diola num volrotaytan kir diliukayas va oretlik, gu belikaf jiomik ke Sertão va int ruyeyer ise va felira va golapa is inafa sanelia ravaldayar.

Finta ta gralomera va Lampião

Okilik ke blay dem dile decemoy gejusik, Lampião va pilkot is widega dilfuyur ise guineyer ise va saneliaki paxayeyer, ise katecton guldeyer, ise va kevliduca ke yona lizukafa staba vepokon vefayar. Wetce okilapik ke Cangaço, wali 1922 is 1938 erniguyur vieli ji va inafa tira tenukeyer.

Taka ke cangaceiro blayikeem ke Lampião divnediyin gan ardial moi sinafa xonukera

Koskayanon, Lampião is yerumanik is lerdoy dositik koe Angicos ( Sergipe galdolk ) ba 28/07/1938 zo xonukesiyid. Kotote di zo bastakayad. Taka widavawidavon zo rembureyed ise moe viga zo kabdunediyid aze kake ralpoda koe tcilaxe kali 1969 di zavzagiyid liz taripi wiyid.

Voxen xonukera ke batyon tozekik don tulon tela ke Lampião, gan saneliaki ke Sertão zo akleyer, i gan sanelia kevfoliyisa va volrotaytanuca ke gradilik isu wan kevfoliyisa. Sedme jontik milugalik, Lampião va tizuca ke bumpaf selt is vollovaf kakak ke wituca viwazeyer ; tiyir warzeksack ke lana gola torigina gu gavesuca, i ke gola merokolanina is keunisisa va vedeyafa tanuca.

Sedme sanelia ke biradomafa widava, Lampião va fikuca is dace ana rotuca gokalsulana jontikedje lecayar, i va akolapa gofraskemba va Brasila. Voxen milugale sedme saneliaki ke Sertão, Lampião va voda lanote viwazeyer : va buduca is gradiluca is porafa pesta. To batcoba va tolucapa ke korobik askir.

Lampião
( Virgulino Ferreira da Silva )

Lampião ( Virgulino Ferreira da Silva )
 Blira 1897 - 1938
 Vedeyot Brasila


  Tuveli icde Izvopa 
  Tuveli icde Arotieva 
Xonukexo ke Lampião is blay koe Angicos