Lanzerotto Malocello

Lanzerotto Malocello ( ? - ±1384 ) ~ Italiaf vestasik va Afrika.

Lanzerotto Malocello ( francavon Lancelot Maloisel ), nuve kobliyiso tozi XIV^-eafa decemda koe Varrazze ( Italia, poke Genova ) az awalkeyeso abdi 1385, tiyir genovaf totasik ke XIV^-eafa decemda. Wetce kosmasik va Canarias tursia koe Atlantika Welfa zo torigir. Yolt ke Lanzarote ewala tir nope inaf yolt. Inafa tiskira moe ewala gan ugalay va olgalicura ke Jean de Béthencourt va tursia zo slamer.

Kevudana xanta

Yolt ke Lanzerotto Malocello moe biraliwot ke 1339 gan Angelino Dulcert katalaf liwotopik taneatomon awir. Moe bat liwot, ewala yoltkirafa gu « insula Lanzaroti Maroxelli » is yunkeyena gu irowa ke Genova grocelon ice afrikafa krimta awir. Inaf yolt is tigira ke bata irowa, dere rowina moe liwot ke Bartolomeo Pareto ( 1455 ) tid bazexa mu genovafa xanta ke Lanzerotto.

Neken ra mu francafa xanta dere krulded. Tire bak 1632 Maloisel yasa sokesa koe Coutances koe Normandia vox nuve tisa vey Liguria, va larn icde intafa izva rubiayar lize Lancelot Maloisel ( yolt ke Lanzerotto Malocello francavon ) zo ozwar, vuesteson va nubasuteks isti XIV^-eafa decemda, lize lan Lancelot Maloisel nuve artlapis bak 1312 va Canarias tursia kir rewayas va bazera ke yon birelik ke Cherbourg banlize abdion bopelaweyes. Do koyas dositik va ewala di koinkeyer ise di yoltayar. Azon va folk vegeduyur aze wetce jiomaik tolsandon di sokeyer vieli gan patectolik zo aloyayar oke zo aytayar. Bat bazeks tir ke sanegayan ugalay va brinuga ( 1402 ) kal Canarias tursia ke Jean de Béthencourt. Koe ugalay, blayak bazer da domuson va lentefa ewala ( Lanzarote ), normandiik va « ung viel chastel que Lancelot Maloesel avoit iadiz fait faire » ( lan guazaf folk dare vegeduyun gan Lancelot Maloesel ) al trasiyid.

Bata vrutara re tir antafa vuestesa va tigira ke Lanzerotto Malocello moe ewala voxe va meka bazera va inafa xanta ok sare ke kosmara dafur.

Kosmara

Goaspil ke kosmara va ewala tid megrupen. Evla vas 1312 bazeyena gan Maloisel yasa ke Normandia nutir abdievlafa kiren ba mana evla, Portugala ( tirodaf dorjesik va brinuga ) va afrikafa krimta men dulapeyer. Noelafa uldinera va bata kosmara bak gazarugal ke Alfonso IV wali 1325 ( evla ke liwot ke Angelino Deporto lize Canarias tursia mea tigir ) ik 1339 ( evla ke liwot ke Dulcert ) debaler. Ewala artlapiyina gan Lanzerotto Malocello yoltayana gu Titeroygatra gan patectolik di vanpiyir Lanzarote. Moe bata ewala Lanzerotto va folk kolnayar, i va folk ware kruldes bak 1402 isen rawaks poke Guanapay tculk ape tigid.

Vegedura va folk tir wazdexa va jiomafa vertuma is kuranira ke Lanzerotto va sokerapa moe ewala numen inaf slamen yolt di tid Malozella ( 1374 ) is Maloxella ( 1385 ).

Warzafa brinuga bak 1341 va kosmara va kotaf ewaleem noveyer. Tunafalara va tursia pu Castilla gazaxo bak 1479 parmon di zo gaayar.

Goaspil is evlacka ke awalkera ke Lanzerotto Malocello tid megrupena. Sedme konak izvopik co tid vas 1385, voxen lan genovaf tegivsuteks ke 1384 va abdifa evla merontion bazer.