Laptev Bira
bira
TAWAVOPA
Ord domafa bira
Welfa Arktika Welfa
Welmot   672 000 km²
Aludeve
 - mialuk 50 m-
 - cuge 3385 m-
RISTULA
Krimtafa patecta Rossia    

Laptev Bira ( rossiavon мо́ре Ла́птевых ) tir domafa bira ke Arktika welfa. Inafa taltefa kima tir ronefa krimta ke Taymir dega is Severnaya Zemlya ( Северная Земля ) ewaleem vome Kara bira, isen geefa kima tir krimta ke Istefa Sibiria, isen ronefa kima tir Kotyelni ( Остров Котельный ) ewala is Lyaxov ( Ля́ховский ) ewaleem vome Sibira bira. Inafa lentefa kima tir conya male taltuon Arktika evilma ke Komsomolets ( Комсомолец ) ewala ( uton ice 79° L- 139° R- ) kale ronon Anisi evilma. Welmot ke bata bira tir vas mon 672 000 km².

Liwot va Laptev bira is kimeem
Fentugalaf opruk moe Laptev bira

Inaf yolt tir ke Dmitri Laptev rossiaf vestasik isu Xariton, i toloy kosayik vestayas is liwotayas va inaf krimteem bak XVIII-eafa decemda. Mialukafe aludeve tir vas 50 m- isen tele cugafe tir vas 3385 m-.

Bata bira va lavada ke Lena bostap ke ronefa Sibira dem arteon riskapa kazawar. Loon talteon, kene Taymir degapa abrotcafa reca ke Xatanga bost tigir. Bat toloy artexof tazuk tid lecaf gu arapeniwes salt nekin gan sibiraf bostap ko Laptev bira. Ban va lizukafa lidawicka loeke dere gotud. Arte mon 80 km- male Lena bost, Olenyok bost va Laptev bira dere konir.

Toloy ar bostap va Laptev bira artnid : talteon Anabar is roneon Yana.

Fereon tsentena gan sukarapa is noldotara, Laptev bira leve figaf lidawickacek fentugalon gitigir, voxen sel ik noldawaxa dere idulugalon dile dud. Bira tir tapanafa lokon gu tanda, voxen noldempasa tota va grifunera va Tiksi nelkaf molt ke bata bira poke artexo ke Lena ginoved.

Lizukaf fled tir dem lempol ( Odobenus rosmarus ) is yona spedolinda ( Erignathus barbatus is Phoca vitulina ) trasit.

Dere rupec betara