Lentexo kev Geexo (suterot)

Lentexo kev Geexo

Lentexo kev Geexo tir stuvaf is izvaf berpot ke Jules Verne sanegayan bak 1887, tis tana karba ke Yona zultafa koyara nevatum.

Vildeks

Rupa ke berpot koe Tanarasokeem bak 1862 dilizer, trabe bak Wideytafa Geja tenutuna bak 1865 nope xaara ke geexofa neya. Bifaxo tir Florida galdolk is inafo valentexo lize Camdless-Bay veskxo ke gradilik tigir, voxis vageeon merokolanino Everglades wedaxopo lize grogara va berpot dilizer.

Tegira kene Saint-John bost dilizer lize kulaf irubasik kan gantatotapa dem setcak lapid solve wawik va tiv malsaved. James Burbank tir balemsandikye, i pilkotik ke veskxopo koe Florida xantafe gu Lentexo. Va ebeltik uner, rewason va nelkot vas ayikuca is zaavafa miltuca kaiki intaf ugal, i va nelkot volsaf gu rieteem ke « batakikam » is « saneikaj » tis sanelia ke gola bak sare ke nega.

James Burbank va ebeltaf kobasik wetce nuyik uner aze tunuyar radimida gan neyik ke levetiruca malaskitison al zo budar. Bat neyik gan lorotaf volnik zo stad, i gan Texar tozekapik. Voxen batcoba enwe tir ikse kiren Texar gu palsotik koe Jacksonville kadimion zo libur numaze va Burbank buntur : bantan co tir relmesik levzanis va lentexofa sanelia isen lyumatason va geexoikeem inafe Gilbert nazbeikye va bata sanelia al vilter. Batkane Texar jupar da lani kexi zo brudar, i kexi benplekusi va aloyara va tunuyanikeem div galdolkxo ke Florida. Rewara va bati mwaki tir yonta ta pursasa brinuga kev Camdless-Bay dirgana gan Texar. Diref levetirik zo aloyad oke zo aytad, inafa vreda zo elaked aze zo firded, nekev rojura ke James Burbank is yastik ( Edward Caroll ikaberikye, is Walter Stannard is Alice inafa nazbeikya ).

Burbank kev bat vegungik va int gorojur, keson da galdaf milk va gola di kostujer. Dupont birarambik darpe nega va bepra ke Jacksonville vanlapir numaze bal zivottcekap artlapir, ton sugda ke bali. Lan totuk gan Mars zo gaded, i gan Mars sagik zanon gu Burbank vilteyes va galdafa ervolia do Gilbert tis aguntanikye ke Alice Stannard.

Bal bifa, Texar va Diana lojotafa nazbeikya ke Burbank lajukigder, i va Diana dositana gan Zermah kurenikya ke Mars. Ilkadera ke Texar va James Burbank tir kaike intyon volsaf rieteem, larde bantan gu zoba dun koridayar, meviele lajuvrinayason kiren Texar kotviele tiyir venastkiraf kir milviele wiyin koe sumepafo xo.

Koredik

  • James Burbank : pilkotikye ke veskap, xantafe gu lentexo, kevlevetirevafe.
  • Texar : folixiskafe is mwiskafe tozekikye, bar-san-alubdafe. Texar tir vey Espana, dis va ebeltaf is tritaf usuk is vaf wolteem is kusamaf iteem is art mantaf « dumede co tir nope abaltara », is tigaf kutceem is trelaf pez dem snavolaf pezolk. Inafa altoza va djasta is tizuca bazecker. Inafe rane tir mialukafe, tadle godjafe « kotvielu tupoayane gan tuwavafa stuvura ». In abdion tiyir lukastkiraf voxe nope viltara anteyayasa va imeem al gotipoker numen gexata tir olgackafa. Batinde sutesik va koredik pimtar, ok kre va koredikafa tolda larde Texar tir jontolaf kire va jelikye tikir. Vekta ke toloy jelik tir altokon is swavon is lidon kotrafa.
    Toloye Texar berikye koe kona wida ke Texas kobliyid, batdume sinaf yolt zo deayar. Jovleyenon kene bira, zo koemudeyed aze gan yon sodegasik zo varteyed. Sinafa vektanya va obrara vere al jekuyur. Va mila puda isu tila isu zatceem isu altoza isu wayeda did ise milinde abditcon diavuyud. Sinafa gaara isu torefa ravera wan tir bula. Sin gan alizmonafa yasa dun exulesa va patecta ape zo gaayad. Mali santoldafa klaa va int divadomtayad. Azon kan furemkara is dubiera az elakera az vawapafa brinugura bliyid, malsaveson va sinafa akoydasa vekta. Ba milgugal dive xo dare devilayano griawiyid numen sinaf yolt di zo vulkuyur.
    Wali tol-sandafa klaa isu bar-sanda, sin griuzianon al blid. Kottol va tufa kotkane kaaneyayar. Va sint abicviele katrasiyid, koe Amerika ok arlize, kotliz sinafa stuvura sume metixolafa disukera stayar. Banugale vanpiyid butcasik va levetirik, volmiv rembureson va levetirik mal Afrika kal Tanarasokeem. Azon viele butcara toz keunisirsiyir, pune va arcoba mordayad. Sinafa vekta dun tiyir kotunafa. Altokon is pudon is zatcon, toloye berikye va ant korik askiyid. Bata tuwavafa pilkovaca va sin zanickinyir. Kotviele battol gomilayar oke elakeyer, pune bantol arlize va int sanegon nediyir. Isen larde metan va sin belcon mali jontika tanda al wiyir, pune venast kotviele guyundeckeyer batdume bantol di zo tuvolgunayar. Sin va vimubafa fugara anton gotaruteyed.
    Texar berikeem va Florida al levirubar. Inaf vask di tiyir Ebeltafa Vurja, i xo grupeno gan metan. Gu tozekik ke gola va int gesiar. Nariyison va rictela tove batakikaj ke utca is pakoik ke levetiruca, Texar va turestara va sanelia ke Jacksonville divatcer.
    Bogara ke Texar va Burbank yasa tir banvielu James Burbank va Zermah levetirikya bal sanegafa dolera areldon al lusteyer, i va levetirik gojen gan mil tozekik. Bata bogara laumar viele Burbank tunerevik va intaf levetirikeem djukutunuyar. Texar, vanpiyis felisik va Jacksonville kir divstayas va savsaf palsotikeem, va tari booler aze va jaxadasa mulura kev Camdless-Bay yasaf pilkot ke Burbank kabudar. Bak elakera, va Diana nazbeikyama ke Burbank is Zermah lajukigder, aze pomanon gan Squambo amerindiafe sagikye, ko Ebeltafa Vurja va sin vanstar. Va arpeoara va James Burbank is inafe nazbeikye taneatir, koridason gu relmera do volnik. Voxen artlanira ke galdaf milk va azed aptijusir. Inaf vask zo kosmar nume in do toloy stolenik gonotcer aze art Everglases wedaxo gelber lize gan berye zo kazokever. Lanviele Zermah va sin belcon onser. Larde birga su zo kosmar, pune sin djukusulad, voxen gan galdaf milk stan gan Burbank kadimion zo ivamudad. Va sint vol djukuranked nume belcon zo zeltad.
  • Edward Carroll : ikaberikye ke James Burbank, walzilise va mil galdaf rieteem.
  • Walter Stannard : gadikye ke Alice tise aguntanikya ke Gilbert, nyobrafe is tise ke lentexofa neya.
  • Zermah : levetirikya tunuyayana gan James Burbank bak nega, vox vewayasa va bulura num wan zanisa va savsaf felisik. Tir kurenik ke Mars.
  • Gilbert Burbank : nazbeikye ke veskik, vilteyese va galdafa ervolia is tise rikulik. Aguntanik ke Alice.
  • Mars : levetirikye tunuyayane, kurenik ke Zermah. Va Gilbert Burbank tcicer ise inafa grupera va Saint-John bost tir neki ke konaki gijafi berpotki.
  • Alice Stannard : aguntanikya ke Gilbert Burbank. Tir listafa is ovevafa.

Yunkexa

Konaka yunkexa va berpot, koe xantofa piskura, 1887

Dere rupel

Vuestexa


Lentexo kev Geexo
XANTO
Vergumvelt Nord contre Sud
Sutesik Jules Verne
Ava Francava
Suterotinda Berpot
Evla 1887
betara teza
  Tuveli icde Suteroteem 
Taneaf yunkeks ke xantof piskuks ke 1887