Lin Zhao
|
Lin Zhao ( siniavon 林昭 ), kobliyiso yoltkirafo gu Peng Linzhao 彭令昭 ba 16/12/1931 koe Suzhou koe Sinia az klibuyuno ba 29/04/1968 koe Shanghai tiyir siniaf suterotik is ezlopik is doevaf sayudasik. Radimi sayudara va siniafo doevafo pako, va sinafa rofavera ranker ise vanpir volakaf lyumasik. Zo soper aze zo stoler voxe kake oblayeem va jontika ezla is krent rankes va gaderopa ke pako di wan suter. Zo xonukalanzar aze tison bar-san-tevdafo zo klibur. BlirizvabetaraKobliyiso dene glastafa yasa, ba san-perda ba baroy aksat abdi etimara va Sanefe Sokasane ke Sinia bak 1949, vaon bulur aze gu felusa bema ke siniafo doevafo pako va int kovileyar.[1] Bak idulugal ke 1950, tison san-anyustdafo, va taneafa tawamidurafa fabdura is tulon tawuk walmunes va taway paker. Bak bata rekola tir olgafo tove divilkan tawayaf pilkotik. Dere welidar da va « udutafa kaluca » pestaleyer viele va pilkotik estobasin ko jumega dem fentarsafa lava gildeyer ise va klibura va arman mekategison tcokeyer. Va Mao Zedong ton « keraf bitej koe takra » dasugdar.[1] Bak 1957 Mao Zedong va Decemoya Imwa tawuk mopoyer [2], i va « tuvexeas tawuk » uuyas va vanzilira va lana muxasa nuyuca pu sanelia, don malyopara va pako, ta dimroklara, voxen bat lizor juster. Keve aklesa vanrustara, roti kan koaskira va zugafa rujara kategir. Moi vayasikafa exaksara koe Vedeyafa Kotla ke Beijing ba 04/05/1957, jontik vayasik zo soped. Bam Lin Zhao « va tcumivesa joya » elvon di vilter.[2] Va rofavera ke kevronokevaf tawuk akler. Nope suteks, koe nevaxe di gonokobar. Va Gan Cui kakever, sin djuyerumad voxe gan pako mbi kalvewad. Gan ko stolexo ke Xinjiang zo stakser aze bak oxam 1979 di dimpir.[1] Lin Zhao bak imwugal ke 1960 ko Shanghai nope selasa lazava gonodimpir.[3] Va Xinghuo virda di redur. Bak saneaksat ke 1960 zo stoler aze dandon gu « ronokeva » is malyopara va pako zo lanzar.[4] Va mivmalyopara is kaagdera va draga kevvewar. Nope selasa lazava bak imwugal ke 1962 ware zo tunuyar, voxaze arti abic aksat bak santoleaksat ke mil ilanacek ware zo koflintar.[5] Konakviele di aelyaster ise lanviele lakser.[3] Arti riwe barda kake oblayeem edje va jontika ezla is konaku decemoyu krentafu bu rankesu va pako, pune Lin Zhao ba 31/05/1965 zo givar da gu stolesa tol-sanda zo lanzar.[3] Ba 29/04/1968 restali gu xonukesisa akera zo ataler. Tison bar-san-tevdafo koe Shangai ba mil vielcek zo klibur.[6] Inafa xonukera pu gadikya is berikya arti tolka zo dakter, gan ardialik kevimaxus va talolk danun nope klibuyus vilt.[7][8] Abdi awalkera bak stolera koe Tilanqiao flint koe Shangai, nekev isk ke sida is wabuja, Lin Zhao va konaka decitoya staa kan intaf fortey lajusuter.[9][10] Ta sutera, va nuba kan usuknouli foldur aze wetce sutesiki kum forteysida faver.[11] Koe suteks, va fabdura skutuna kaiki awalkera ke Mao drager. Krupter da « lyumara va torkeva, va konara metode rotumalyar ». Koe lan daalaks pu Vieleafa Fela ke Sane, va « kevronokevaf tawuk » lanzar is va siniafo doevafo pako gu favera va « rietavafamuca ke intafa oxila » buntur. Lin Zhao va askipejera bak stolera is enomara va wabuja jupayasa va sutera kan fortey pimtar. Azon inafa wabuja zo dimzilir enide va intyon suteks di tolksudar, i va suteks bam faveten kev int.[1] Lin Zhao ba 30/12/1981 gan siniafa rictaga zo dimrokar.[12][3] NamirabetaraBak 2004 Hu Jie siniaf elpatopik va Aneyara va gloga ke Lin Zhao valdigelpat skuyur, katrasitison va namira va bata gradilikya tuflovayana gan winugafa izva.[13]. Yan Zheng-Xue siniaf solsiik ba divflintara bak 2009 koe intafa kraba ke Beijing, va kudja darnafa gu Lin Zhao epuyur. Bata kudja is bana va Zhang Zhixin ara kosikya ke Arayafa Artowara klibuyuna bak 1975, koe matela ke kraba tigisa tite bedablo di zo divnediyid. Yan Zheng-Xue va bata toloya kudja pu kotla ke Beijing is kotla ke Sane djufirviyir voxe mbi malvewayar.[6] Bak 2009 Zhou Yongyang siniaf balumasik koe Beijing va gulaf balumaks kaatoes va taka ke Lin Zhao epur. Vuestexabetara
|
| |||||||||||||||||
.svg){kind=icon}