Liwayaf bor (suterot)

**Liwayaf bor**
	XANTO
	XANTO
Vergumvelt	The Adventure of the Cardboard Box
Sutesik	Arthur Conan Doyle
Ava	Englava
Suterotinda	Berpotam
Evla	1893
betara	teza

Liwayaf bor

Liwayaf bor ( englavon The Adventure of the Cardboard Box ) tir berpotam ke Arthur Conan Doyle taneon sanegayan bak 1893 koe Standard Magazine virda az direilanon koe Namio ke Sherlock Holmes berpotamak.

Vildeks

Tozafa bula

Lestrade kodisukesik va Sherlock Holmes ta maera va divulafa arienta uzerar. Susan Cushing diliodafa irubasikya ke Croydon utca va bor kan piute al kazawar, i va liwayaf bor kotraf gu eip lize toloya gabeyayana ayafa oblaka tid. Susan Cushing zo lemistepeyer ise me gildar datan va batcoba stakseyer isen tokdume.

Maera

Holmes va toloya oblaka dizvecker nume katcalar da bata tir ke ayikya voxen bana ke ayikye. Kalion vofar da ayikyafa oblaka vas tela ke Susan Cushing vektapar. Bibeson, zo givar da in va toloya berikya dikir : Sarah is Mary. Mary tir kurenik ke birikye yoltkirafe gu Jim Browner. Sarah luxeon tir kaelaf voxe do Susan koe Croydon kabdion bliyir. Holmes batkane vangruper da eruilt maneyen pu « S- Cushing » enwe tiyir pu Sarah Cushing vols Susan. Manesik va eruilt me nugrupenar da Sarah al grilizebliyir.

Ostik Holmes gan Susan zo givar da Sarah va Jim Browner kurenik ke Mary tizon su mijeyer. Voxen drunara ke Holmes razdar da eruilt gan birik zo epuyur. Kogrupasik batkane laner da to mil Jim Browner va bat eruilt pu Sarah maneyer, nume va Lestrade walzer enide Browner di zo soper.

Arti abic viel, Lestrade va Holmes gu tcedera va sopera numaz welidara ke Browner givar. Browner do Mary kalon bliyir vieli Sarah den sin kosokeyer. Azon Sarah abdugayar voxen Browner malvewayar. Sarah mewiveyer nume va Mary toz buiveyer da Jim Browner kurenik zo gomedirnuyur. Banvielu wison va tilarura ke Mary tove int, bantan toz giluliyir ise tiyir loeke tizaf. Sarah va lan Alec Fairbairn toz nobayar, i va mempesikye ginobase va oga ke Jim is Mary is Sarah is tiskipise do Mary. Viele Browner vofayar, pune benplekuyur da Fairbairn me di gin piyir, numen Sarah va oga dere buluyur. Kadimion Browner ta koyara vas vieltum kan tota gomallapiyir, voxen zvak sokiyir numen in abdion lodam sye dimdenlapiyir. Va riniz dem Mary mokipes do Fairnbairn gamdayar. Riyomegason, va sin radimelakiyir. Toloy fertik va impadimak tori New Brighton rundanyayad. Banlize gozatason moe bira va tiv beituyud. Browner va tiv silukon rundanyayar aze koe grocela vebiduyur. Riyomeson va sin aytayar. Kire laneyer da volkaluca gan Sarah taneon al zo nekiyir, pune va oblaka ke kottel djukugabeyayar aze pu Sarah stakseyer, divneditison va danexa ke inyona rotubgaca tove int.