Maji-Maji kevmadara, Tanzania va boniara exur (1905-1907) betara

Carl Peters, Mikono wa Damu

Nope Berlin laxa bak 1885, Germana va nendasikeba gu Tanganyika exoner, radimida va figafa acagira ke Makonde sane isu Mbunga al cener. Kilwa widavapa ke Swaxili kimtaxo warzon zo aorayar, kaiki yona vilasa dilfura ke Portugala bak yona darefa decemda.

Milinde koe Namibia, germanafa boniara va Tanganyika tizapon dilizer. Boniasik va acagis gazik aytad numen Carl Peters, i bonias bowesik gu Mikono wa Damu ( swaxiliavon, ayik dem forteyotaf nubeem ) zo duvur. Germana va grastupu pu ebeltikeem koaykar ise ta vegedura va vawa is midura va kilt tulevetirar, bene berga fereon korodason.

Mahenge meld, trutca ke Wilhelm Kuhnert

Divlizera ke Maji-Maji kevmadara

Danedira va germanafa viltaxa lente Nguni gejik bak 1897

Volvaleuca tujadiawer numen bak 1905, Kinjikitile Ngwale susik va lorafa birga va oga bulur aze, ruyeson da do yon ambik su goler, is erumbon va jupara va kevmadara, va katanara kev boniasikeem pu saneeem ke Tanganyika koldar, ise dakter da va baerdafa lava rojusa gu vilt al trasir. Maji-Maji va baerdafa lava kan lizukafa ava sugdalar. Kabakiraf is bumbeyes gu Maji-Maji, patectolik ke Tanganyika va kiltxo vilad ise va germanik dilfud.

Vintera ko kipi ke patecta moplewer isen bak anyusteaksat ke 1905 kunoy doaliesik va germanafo pemaxo dilfud voxe me lajucened. Bak saneaksat, Germana dulzavar, stakeson va Nguni sane yoteyese va tcumivera. Konak decemoy ayik isu rumeik zo xonukesid. Kinjikitile Ngwale zo soper aze vrayar. 75 000 afrikik bak doaliera xonuked. Germana va gaderopa va tawanteyara ksuber, numen aelakola is awalkera ke 150 000 tanzaniik di dilized. Maji-Maji kevmadasik arti tolda ke gradilafa tcumivera zo surted, aze boniara zo wanur.

Andik gralomeyen ke kevmadara : 1. Nkosi Mputa Gama ; 2. Magodi Mbano ; 3. Njorosa Mbano ; 4. Zimanimoto Gama ; 5. Fratera Gama ; 7. Mtekateka Tawete ; 11. Mputa Mkuzo Gama. Koe ewava dere tigid : Mtepa Hawayi Gama, Majiyakuhanga Komba, Mpambalioto Soko, Songea Mbano. Lo sin di zo vrayayad.

Songea Mbano, Nguni okilik is tan andik ke kevmadara

Naboxa ke Songea Mbano, koe Maji-Maji tcilaxo ke Songea

Maji-Maji kevmadara, beka rodjeyer, va aryon lyumara ta tunuyara koe gola nope intafa kabelcasa adala di koswavayar.

Vuestexa betara

AHHA African History Histoire Africaine internetxo : La révolte Maji Maji