Mary Wollstonecraft

Mary Wollstonecraft
1759-1797
Englavaf englaf suterotik isu trakopik isu ayikyevik

Englaf berpotik, Mary Wollstonecraft ( 27/04/1759 - 10/09/1797 ) va konak grabom watson gu gaara isker ise va gaara va ayikya is miltuca ke rokeem kretur. Ba titufira ke ayikyeva wetce tanealik zo kagruper.

Blirizva betara

Va taneafa runda oku meka gokerelé ! betara

Toleik ke peroy nazbeik ke Edward John Wollstonecraft is Elizabeth Dixon, Mary Wollstonecraft ba 27/04/1759 koe Spitalfields revava ke London koblir. Yasa tir igeltafa voxen gadikye gibituper nume va rawara adre star. Ton tizik Edward va kurenikya gilalier isen Mary fereon lasunendar.

Bak sardugal Mary golde toloya zolonapafa naca va int gruadon is selton tazukar, do Jane Arden vayase do ini is Fanny Blood torigin gu milyasik. Mary vanyer varapafi gu nuca, suteson pu Jane : « Tí manamaf luxe jinafa envara va rena is nuca : Va taneafa runda oku meka gokerelé !»

Fanny Blood betara

Ba sanlerdda, Mary Wollstonecraft va gadikeem bulur aze vanpir dositasikya koe Bath dene Sarah Dawson nyobrikya. Unesik tir figaf numen portafa bagalara anton toldon tiskir aze in den gadikya dimpir. Kadimi inafa awalkera den Blood yasa koirubar voxe gu sinafa agvavafa envara va kurera is ayikyafa yordara zo ilpuver.

Nope mejesisa bagala ke kurera ke gadikeem, Mary malyedara da kurera sotir gadikyerotif kizeks koristas va ayikya. Bak 1784 pomar da misepesa Eliza berya va kurenik is nazbeik jovler ise yater. Eliza selton di zo dimemuder ise lirkkiron di dulkur.

Arti tolda dene Blood yasa, Mary do Fanny mivvexon djuminker voxen dika bliba me noved. Toloya ayikya va bema belcon fenkud voxen Mary di kurer. Nope megalera ko Europa gan kurenye laselatanon zo divstar. Viele nazbera va inaf sok tuastirbar, pune Mary va bema jovler nume kevlapir voxen Fanny kadimion mulufter. Bata folva va Mary vanolapar.

Ayikyaf rokeem betara

Radimi awalkera ke Fanny, Mary Wollstonecraft vanpir vexasik koe Eirea ise wetce tavesik tove toloya jotikya ke yasa ebur. Arti tanda buvenon gan bagalara va suteropa djukoaskir. Va kalenglavaks is suterotaf malyopaks taneon skur ise va gruadikaf is suterotaf rijay ke London toz nobar.

Ta intaf suteks, Mary gu intaf ugalaks isu naceem isu ebafa bagala omavar. Thoughts on the Education of DaughtersTrakura icde gaara va rumeikya ) taneafa sanegayana neva va pirdara pu rumeik icde ayikyafa gaara atoer. Mary: A FictionMary : lana sorda ) taneaf berpot va nuca do Fanny malgruper. Original Stories from Real LifeRupacka male bliracka ) gu tavesa bagala omavar ise va gaara va jotikya kotirkar.

Inaf suteks adre tugaderopawed, tulon kan A Vindication of the Rights of MenKretuks va ayikaf rokeem ) trakopaxa suteyena ta vidgura pu Reflections on the Revolution in France ke Edmund Burke rojuse va gazaroti. Neva ke Wollstonecraft va sanerotieva volson morojur. Arti tolda, koe A Vindication of the Rights of WomanKretuks va ayikyaf rokeem ) trakopaxa re torigina gu tan taneaf ayikyevaf suteks, ta gaara va jotikya is dimtuvodara va ayikyafa yorda isu ravalduga alutar ise va azed ta vedeyafa gaara drager.

Gilbert Imlay betara

Bak 1792, dezun gan Francafa Artowara rojuna koe intyon suteks, Mary Wollstonecraft va Paris mallapir lize va gruadikafa anameda denfir. Banlize va Gilbert Imlay amerikaf fayik skedegar. Va Fanny nazbeya doon di konazbar. Wori wan suter nume bak 1794 va An Historical and Moral View of the French RevolutionLana izvafa is lidafa malyedara va Francafa Artowara ) sanegar.

Mary is Gilbert me yerumad voxe rojutuson va Mary bevulad kurenik. Kaiki dimpira ko Engla, bravatason va nazbeya gu febaf seltaf agvaveem ke intafe sare, Wollstonecraft va Imlay yolt wan faver. Soe Imlay tere bulur nume Mary tisi varafi ta rena lidam nuca is ape misesi va yona yatkafa twa stakser. Bak 1795 tolon lakser voxe kotviele zo giwar.

William Godwin betara

Mary Wollstonecraft va gruadafa is suterotafa blira ke London adre dimdenfir, ko rijay lize va William Godwin trakopik tulon nobar, is dere Mary Hays is Elizabeth Inchbald is Sarah Siddons.

Mary va Godwin toz skedegar nume ve nazber. Sin va kurera gorad. Bam pokeikeem ke Mary kosmar da ini va Gilbert Imlay me al yerumayar numen bilita va tena ke konaka paskalera nekir.

Bak anyusteaksat ke 1797 Mary va toleafa ocya nazbar, i va Mary radimfitisi va joya ke gadikya is vanpitisi suterotik yolton gu Mary Shelley. Moi koblira tuyicayanon ve radekaravozer nume arti konak ilblipis viel ba 10/09/1797 mulufter.

Mary Wollstonecraft is radimiuca betara

Bak direfa tanda moi awalkera, William Godwin va blirizva ke kurenya sanegar, razdatason va inyon suteks isu gaderopafa trakura. Voxen nuskena blira ke Mary is skedegareem is laksereem va selt ke bane sare lemisted. Vartuca ke suterotik zo tuseitar numen inafa blira lodamu grabomeem zavzar grupena. Ini vanpir lana teza ke metisa rotarkanikya.

To toza ke witaf ayikyevaf lizor, sayudasik is suterotik dum Millicent Garrett Fawcett is Virginia Woolf is Emma Goldman va suteks is blira ke Mary Wollstonecraft kiormud. In gu gijotafa tanealikya ke ayikyeva re torigir.

Klita betara

→ Bat teliz tir pakaf kalkotavaks va teliz dene L'Histoire par les femmes internetxo

Stragela betara

  • (en) Edmund Burke, Burke, Paine, Godwin, and the Revolution Controversy, Cambridge, Cambridge University Press, 2002 (ISBN 0-521-28656-5).
  • (en) Mary Wollstonecraft, The Collected Letters of Mary Wollstonecraft, New York, Columbia University Press, 2003 (ISBN 0-231-13142-9).
  • (en) Mary Wollstonecraft, The Complete Works of Mary Wollstonecraft, Londres, William Pickering, 1989 (ISBN 0-8147-9225-1).
  • (en) Mary Wollstonecraft, The Vindications: The Rights of Men and The Rights of Woman, Toronto, Broadview Literary Texts, 1997 (ISBN 1-55111-088-1).
  • (en) Eleanor Flexner, Mary Wollstonecraft: A Biography, New York, Coward, McCann and Geoghegan, 1972 (ISBN 0-6981-0447-1).
  • (en) William Godwin, Memoirs of the Author of a Vindication of the Rights of Woman. 1798, Peterborough, Broadview Press Ltd., 2001 (ISBN 1-55111-259-0).
  • (en) Lyndall Gordon, Vindication: A Life of Mary Wollstonecraft, Great Britain, Virago, 2005 (ISBN 1-84408-141-9).
  • (en) Mary Hays, Annual Necrology, 1797–1798, « Memoirs of Mary Wollstonecraft », p. 411–460.
  • (en) Diane Jacobs, Her Own Woman: The Life of Mary Wollstonecraft, USA, Simon & Schuster, 2001 (ISBN 0-349-11461-7).
  • (en) William St Clair, The Godwins and the Shelleys: The biography of a family, New York, W. W. Norton and Co., 1989 (ISBN 0-8018-4233-6).
  • (en) Emily Sunstein, A Different Face: the Life of Mary Wollstonecraft, Boston, Little, Brown and Co., 1975 (ISBN 0-06-014201-4).
  • (en) Janet Todd, Mary Wollstonecraft: A Revolutionary Life, London, Weidenfeld and Nicholson, 2000 (ISBN 0-231-12184-9).
  • (en) Claire Tomalin, The Life and Death of Mary Wollstonecraft, New York, Penguin, 1992 (ISBN 0-14-016761-7).
  • (en) Ralph M. Wardle, Mary Wollstonecraft: A Critical Biography, Lincoln, University of Nebraska Press, 1951 (OCLC 361220)
The Dinner Party ( Ayikyafa jorestura ), sposafa ayikyevafa yambaxa ke Judy Chicago (1979)    The Dinner Party
   30 : Tigisa sposikya
 ( 3-e berk )
Mary Wollstonecraft

Mary Wollstonecraft

 Koblira  27/04/1759,
 Spitalfields, Britana
 Awalkera  10/09/1797,
 London, Britana
 Vedeyot  Britana
 Ava  Englava
 Suterind  Berpot, Trakopa
  Suterot 
  • Thoughts on the Education of Daughters, 1787 - Undeks
  • Mary : A Fiction, 1788 - Berpot
  • Original Stories from Real Life, 1788 - Rumeikafa neva
  • Of the Importance of Religious Opinions, 1788 - Kalenglavaks
  • The Female Reader, 1789 - Krentak
  • Young Grandison, 1790 - Kalenglavaks
  • Elements of Morality, 1790 - Kalenglavaks
  • A Vindication of the Rights of Men, 1790 - Trakopaxa
  • A Vindication of the Rights of Woman, 1792 - Trakopaxa
  • An Historical and Moral View of the French Revolution, 1794 - Undeks
  • Letters Written during a Short Residence in Sweden, Norway and Denmark, 1796 - Twak
  • The Cave of Fancy, 1798
  • Maria, or The Wrongs of Woman, 1798 - Berpot
  • Letters to Imlay, 1798 - Twak
  • Letters on the Management of Infants, 1798 - twak
  • Lessons, 1798
  • On Poetry and our Relish for the Beauties of Nature, 1798
  Tuveli icde Suteroteem 
Mary Shelley nazbeikya ke Mary Wollstonecraft is William Godwin