Moavaf tculk tir stuvaf berpot ke Jules Verne sanegayan bak 1906, tis tana karba ke Yona zultafa koyara nevatum.
Bat berpot tir kaikiawalkeraf, vey nubasuteks ke Jules Verne, vox fabdupuyun gan Michel Verne nazbeik.
Vildeks
Rupa bak moavafa ipera dilizer ise va toloy francakanadafe kosayikye konoleyese va kaxaaks kene domega ke Klondike kuksa konakilar.
Orikaf berpot
Koe bat berpot Jules Verne ins tir rotatrakurevaf. Gu ayafa tuwava : dace tan gradilik va bata moavafa vozera me grupacagir, i va vozera « ixam nekiyisa va jontik kosik az ware nekitisa ». Voxis dere rotatrakurevaf gu tcedera ke mana askira : Ben is Summy mal sinafa brinuga moaviskon di dimlapitid radimida va tufa is xonuka al kactatad. Battan vanolayan gan moavafa vozera me di dimduntur nume va lana piruca di satoler. Koredik nope fent ik akola awalked oke nope likera ta koni moavaki xonuked. Godjik is tcabanesik is ikseltasik ik tozekik anton tid. Toloya ayikya koe berpot anton awid, i toloya alkikya kobasa dene ropexe ke Dawson City.
Koredik ke xantof berpot
Summy Skim : francakanadikye, 32-dafe, pilkotik is vodoraf tcabanesik.
Ben Raddle : kosyikye, 34-dafe, dritik.
Josias Lacoste : ziavikye. Stuvusik is ikseltasik, nope awalkera va kaxaaxo koe Klondike pu sin iskemar.
Snubbin Teg-ye : tegivsutesikye koe Montréal.
Healy redakikye : taneagadesik va Transportation and Trading Co englamerikafu sistu koe Dawson-City.
Bill Stell : kanadikye, dovoraf kametcasik, 50-daf.
Néluto : bewikye ke drig ke Bill Stell, stedasik ke Klondike mon 40-daf, gelkeon zanudas va stedasik mu myotusik ke Hudson Bay sistu.
Pilcox kurmikye : englakanadaf selaropik, mon 40-daf. Selaropik is tcobasik is selaxopik is talgopik koe Dawson-City.
William Broll : ikagadesikye ke Transportation and Trading Co. sistu.
James Walsh vonkikye : mon alub-sandafe, jadif ramisavik ke Yukon tawavo.
Lorique : gelusikye zanon gu Josias Lacoste az Ben Raddle. Francakanadik mon 40-daf.
Jacques Laurier : francafe ikseltasikye 42-dafe, kobliyise koe Nantes. Gan Summy Skin awalkeson zo katrasir nume levi awalkera va tirka ke Golden-Mount pu Ben Raddle razdar.
Harry Brown : englakanadafe ikseltasikye. Gesianik ke Jacques Laurier.
Krasak : volokafe amerindiikye ke Alaska mon 40-dafe. Milsogzik ke Hunter is Malone.
Stop : vakol ke Summy Skim.
Koredik loplekuyun gan Michel Verne
Jane Edgerton : 22-dafa ikseltasikya.
Edith Edgerton : 22-dafa kosayikya ke Jane.
Patrick Richardson : eireafe glotcasikye. Ctakik zanon gu Jane Edgerton.
.svg){kind=icon}