Pascal kurmikye (suterot)
|
Pascal kurmikye tir berpot ke Émile Zola sanegayan bak 1893, i tol-saneafa is bocafa karba ke Rougon-Macquart yasa nevatum. VildeksDim PlassansTol-saneafa is bocafa karba ke Rougon-Macquart yasa lenopa ke Émile Zola, Pascal kurmikye sanegayan bak 1893, va izva ke bata yasa istayar. Pascal Rougon tir nazbeikye ke Pierre Rougon is Félicité Puech. Koe Plassans irubar, koe pilkot yoltkiraf gu La Souléïade ise mali loon barsanda icde veyafa bunga veyzilina dene intafa yasa kobaver. Inafa vayara vas kot bewik ke yasa tikir numen ine va vargi icde kot al tadler. Yasaal al zo exoner ise arte berpot tigir. Voxen Félicité gadikya tisa anyust-sandafa va batyoni rotplekusi vargi co djukoilkar, i va vargi rokifusi va nami ke yasa. Va Martine zanisikya ke Pascal, is Clotilde nutya jandena mali perda riwe lajubuiver enide di zo garveldar. Nope alkafa kotrakunuca ke Clotilde, va lorafa adala ke godela abduplekur. Lanmielon viele Pascal va enintera al ilnarir, pune Clotilde va tselka ke rastoka lajunarir lize Pascal va vargi palser. Ine va rastoka fenkur voxe gan ziavye ve zo onser. Pascal va refa vayara icde veyafa akola ke yasa pu nutya razdar. Kadimi bata bifa akolon ve akoler, laneson da gan mil rotok ke arak ke yasa zo vanolar. Clotilde va in abidason di roper, iskedason va alkafa tapedeva numaz kobuivenon da ziavye enwe tir kaatoesik va opa is abduaxa. Bata trumara tere di imwed numen Pascal va kultos ke ske mu jotafa nutya toz satoler. Kotkane lasunyokason va bata rotirafa veyilagira, va ina gu nafe selaropikye djukukokurer. Voxen Clotilde va firvira malvewar voxise va waldafa pestaka movur. Esafa jiadaraPascal va wana ke berpot burpon gu bata belikafa rena di ugalar neke va baliafe tenule ke bata skedegara dwir ise va vula ke griuziara gu Clotilde craker. Pascal tir kosaf gu kafara ke tegivsutesik nume zo rawar. Bata debala jupar da in va int gu Clotilde gogriuziar, xuvanon gan Félicité gadya dure trumasa va ewava divon warzena gan yasa. Clotilde ko Paris gomallapir lize va Maxime berye linese di roper. Milviele vofar da dovey Pascal nazber. In gu bat warzot zo givar : va yasaal tukotrar voxaze vas takramuluftera ve zertur. Félicité va debala impavantar ise va gojepeni vargi anteyar. Ant yasaal gan teyka zo umber. Koe Pascal kurmikye berpot, Zola va tapedeva ke alka gu ovesa is abdufisa opa kevur. Ba koblira ke nazbeik ke Clotilde is Pascal tenuwer, zolteson icde ilamuca ke bli dure xultusa : « Isen, koe zakodaf amlit, koe antiafi dili ke radekaxo, Clotilde pu pintik ware mouvas kicegayar, i pu pintik rontackon mamadas dum nilt kabes va bli. » Dere rupel
|
 Moek ke xantof piskuks ke 1893 | ||||||||||||||||
.svg){kind=icon}