Priory bema (suterot)

**Priory bema**
	XANTO
	XANTO
Vergumvelt	The Adventure of the Priory School
Sutesik	Arthur Conan Doyle
Ava	Englava
Suterotinda	Berpotam
Evla	1904
betara	teza

Priory bema

Priory bema ( englavon The Adventure of the Priory School ) tir berpotam ke Arthur Conan Doyle taneon sanegayan bak 1904 koe Standard Magazine virda az direilanon koe Dimpira ke Sherlock Holmes berpotamak.

Vildeks

Tozafa bula

Thorneycroft Huxtable W^-ye gadesik va targafa bema valente Engla va kraba ke Holmes is Watson artlapir, gebeson is spueson. Koe intafa bema, Saltire O^-ye santoldafe sardikye is Heidegger tavesikye va Germanava bak mielcek weti barka al griawid. Ison Saltire O^-ye tir nazbeik ke Holdernesse dacik tis savsaf eldik. Ardialafa kogrupara juster numen Huxtable va Holmes al djukuruper, vox odiaxon kire kuranir da arienta me di zo lorer nume va vartuca ke eldik me di dasar.

Antafa daza gotuyuna gan kogrupara tid : Saltire O^-ye va kenibexo rem dilk bene eftela divlaniyir, is tiskiyison va divef vageeem. Va tolkrafol me dadidyir isen mekar kou fardudjaxo zo divbureyer. Heidegger tavesik rem dilk ke intafo kenibexo bene eftela luxeon dere co al divlaniyir, vox me abdiegayason larde vukuleem is klaim koe kenibexo zavzagiyid. Inaf tolkrafol koe fardudjaxo al griawir kire gan in ape zo divbureyer. Heidegger is Saltire O^-ye va sint me grupeyed isen metan va sin mallapis al wir. Numen vol grupet kase bat toloy korik eron mallapiyid oke zo kigdeyed.

Maera

Holmes is Watson do Huxtable ko Mackleton kogrupatason moe bulaxo mallapid. Banlize va Holdernesse is James Wilder suteptik kakeved. Bantan gu gorara ke Huxtable givasa va toloy megrupenik zo zuned. Soe dacik va Holmes ta kaaneyara va nazbeye iskecker. Ison Holmes al tavur da Saltire O^-ye va gadikya suvepeyer isen bantanya vagee Franca re blir kire do dacik kurenik mea gildur. Bak sielcek Holmes va kenibexo ke bema kodisuker voxe va mecoba warzafa kosmar. Tuke liwot ke vema, va zalor ke toloy griawisik rotunder. Antafa vawa kabduo bema tigir. Neken ardialik moe vawa mielcekon fieyer isen yoridik va artlakira ke selaropik keyer nume dun anamsuyur. Metan va toloy griawisik al wir. Holmes maltrakur da sin koo vayka vols vawa mallaniyid.

Diregazdon Holmes is Watson va vayka toz kodisuked. Valey conyutatum ke jaftolafa bora tisa dulapiskafa, va conyuta ke lavuga ke tolkrafol ke Heidegger kosmad. Radimelanison va bata conyuta, va mebliso alto ke tavesik tere kosmad, i va alto bakayarsan ben jo az preyutayano kadime mikaci. Wan kogrupad aze va warzafa vawa artlanid lize yorida gedina gan lan Reuben Hayes dem okolxe is glotcaxe keneon tigir. Hayes gri iremstasik va dacik nuvidjes. Toloy nik koe yorida estud numen bak estura Holmes vofar da jaftolaf conyutatum moe vayka sye co me tir : iksantura obar da sulem grusoreyed aze grutcepad ; numen to okol tiyid. Edje Holmes is Watson va okolxe az glotcaxe kogrupad, pune Hayes va sin kozwir aze vanyer zidepes. Sin mallanid aze moo vawa va James Wilder moe tolkrafol vanlakis va tubizafa yorida mewison gamdad. Antafa olkoba ke vegem zo koafir. Watson va bilam mu Holmes askir numen in reme ralpa rotitar, voxe va mecoba icde wiks kalir.

Direvielon Holmes is Watson va dcik denlakid. Holmes pu savsaf eldik dakter da va in reme ralpa do inafe nazbeikye daresielon al wir. Batdume buntur da in va inafa griawira al fosar. Dacik welidar da re gruper lize nazbeye tigir, voxe pu Holmes diver da me al kigder : enwe to James Wilder kan lipi koe lana twa ke gadikye, va sardye div kenibexo vanimpayar, i va lipi ruyesi da irem koe azeka keter aze kal vadulapafa gadikya malstatar. James Wilder va sardye enwe kigdeteson djumikseyer. Va batcoba askiyir kire enwe tickir memwedaf nazbeik ke dacik ise tove Saltire O^-ye konoletese va dacik dun lickur kire va kon pak remzawatar. Itura va dacik co noveyer da bafela co di zo ataleyer. Voxen sopura tenulejeyer kiren germanavaf tavesik va sardik yateyes div kenibexo wiyir aze kan tolkrafol ampuson onkayar. Stasik ke irem rembureyes va Saltire O^-ye tiyir Hayes aze va onkasik tizon runzason deokayar nume pisonayar. Vandilitison va arienta dacik tere katiyir da taruteteson va jiz James Wilder ko Australia di mallapiyir, isen da Hayes do rototceyer, isen da kurenikya mal Franca ta kaluca ke Saltire O^-ye di dimlapitir. Tici stuva Holmes va azilkeem kosmar, i va azilk ton jaftolafa inya faveyen gan okoltum ke irem stan gan Hayes remi kigdera.