Sanalubdaf redakik (suterot)

Sanalubdaf redakik Sanalubdaf redakik tir berpotam ke Jules Verne sanegayan bak 1878. In tir tana karba ke Yona zultafa koyara nevatum. Vildeks Dick Sand sanalubdaf tir bodorkik moe Pilgrim wilttota. Nope walta bal lana tcabanera va megol, Hull redakik is drig xonuked. Bam Dick Sand va totuk kodirgar, djupotuvawelason va koyasikeem. Nope tiura ke Negoro zatkik, tota va rotafa vawa narar : Sand is koyasikeem va Bolivia fodomud voxe enwe va Afrika artlapid, kev krimta ke Angola lize levetirikafa mordara va mordasik is patectolaf gazik tukular. Sand is dositik gan dofugik ke Negoro zo kostoled. Axofera va nuyuca di tir dem jontika posara. Bat berpot tir kotrafa rankera va levetiruca. Jules Verne pedrapar viele va mordasik is patecta ware ksubesa va levetiruca iku gindesa vajiker. Lan olkom tid tizapaf is forteyotaf. Verne va dilizesa coba opelon pimtayar, ganduson va mecoba. Dokon va vexala dem vestara va afrikafa tadava bilder, ektuson va tanoy varaf luz gu Livingstone kurmik is Stanley felusik. Koredik Actéon : ebeltikye giwayane gu bopelawera. Alvez : ebeltikye mordase va levetirik. Austin : ebeltikye giwayane gu bopelawera. Bat : ebeltikye, nazbeik ke guazaf Tom, giwayane gu bopelawera. Bénédict : bezopikye. Coimbra : nikye ke Alvez. Dingo : vakol giwayan gu bopelawera. Halima : jotafa levetirikya. Harris : mordasikye va levetirik. Hercule : ebeltikye giwayane gu bopelawera. Howik : ikaredakikye ke Pilgrim tota. Hull redakik : redakikye ke Pilgrim tota. Ibn Hamis : arabafe dolekikye va levetirik. Mgannga : afrikafe diwikye. Moina : afrikafa gazikya. Moini Loungga : gazikye ke Kazonndé. Nan : ebeltikafa zanisikya. Negoro : burmotasikye kePilgrim tota, mordasik va levetirik. Dick Sand : bodorkikye az redakik va Pilgrim tota. Tipo-Tipo : arabafe ebeltikye mordase va levetirik. Tom : losavsafe ebeltikye giwayane gu bopelawera. Samuel Vernon : francafe vestasikye. Jack Weldon : jotafe nazbeikye ke Weldon W-ye isu W-ya. James Weldon : kulafe amerikafe dorjesikye. Mrs Weldon : kurenikya ke James Weldon. Yunkexa Konaka yunkexa va berpotam, koe xantofa piskura, 1878 Dere rupel Jules Verne : Francavaf suterotik ( 1828-1905 ) (fr) Sanalubdaf redakik, dene Wikisource ( xantokrent ) Vuestexa

Sanalubdaf redakik XANTO Vergumvelt Un Capitaine de quinze ans Sutesik Jules Verne Ava Francava Suterotinda Berpot Evla 1878 betara teza   Tuveli icde Suteroteem  Moek ke xantof piskuks