Silja, i tcilafi bali ( suomiavon Nuorena nukkunut ) tir berpot ke Frans Eemil Sillanpää suomiaf suteroptik; sanegayan bak 1931. Gu inaf lokiewaf berpot zo torigir.
Rupa
Berpot ba awalkera ke listafa is yafa zanisikya tozuwer, i ke gadiskafa tolsantoldafa Silja Salmelus. Ina tir bocik ke intafa gama isen, nekev inafa morafa gropa, tena ke yasa va milyona kexaca dum dene tcumpaf prostelay kimbar.
Berpot tir dem toloy pak : bat gu Kuusta Salmelus gadikye ke Silja, i gu antaf konolesik va Salmelus trigafo veskxo zo ektur, is ban va blira ke miv Silja besar.
Rupa ba tena ke XIX-eafa decemda tozuwer ise koe istefa Suomia dilizer. Kustaa tir taniaf nazbeik ke Salmelus yasa, i ke yasa vas kulaf tawadayik digis va vesk dem yofraxo is jontik zanisik. I yik va gadikya drasur aze va Hilma zanisikya xantafa gu widelam ve renar. Bemuafe gu direkeuca ke vesk is boikene gan morafa gropa ke fertik ke nazbeye, lajoatason va atrisa rena ke toloy yik, gadikye ke Kustaa jupar da berikya mal widava va int deneon di inker, voxen batcoba giopafa. Piksese, ant koe baplaxe ke vesk ins di awalker. Ziavikya zo aloyar. Kustaa ise Hilma kured ise va Salmelus konoled. Azon va baroy nazbeik dikid, voxen ant Silja va ugaf gropeem loloon volkuvak ke tolonga di lapter, i ke tolonga volrodepofackasa va vesk. Bozadackena is kosafa gu eravaja ke Roivala krinanik djuvangis va Salmelus, Kustaa va abdigadaf taway tere zo ronodoler.
Yasa geon divsoker. Hilma tuaxayana gan awalkera ke toloy nazbeik is akola, koe warzafa mona poke uzda mulufter, iskeson va Silja antafa do gadikye. Kustaa is ina jeaweson is noon skedegad. Voxen Kustaa tere dere awalker, edje Silja koe uja arte konake decitmetre male mona tigir nume koton di tugadiskawer.
Nekev erodaf konoleks, Silja wetce zanisik dene konak vesk toz kobar. Va Oskar taneafe yikye kakever aze zo dustuler. Voxe dere lanmielon koe intafa mawa gan Ville vuwikye ke pilkotik zo ikrazagar. Edje suomiafa wideytafa geja vinustar, divvawatason va bifaja botcesa va tawaday, Silja va vesk bulur lize kobayar aze va tavesik digis va garia koe geeon Rantoo segur. Va renanik ke blira kakever, i va Armas jonvieles poke garia. Ton Silja skalteyena, koe baplaxe kadimi sirta tere ilagid. Direvielon, Armas nope galuca ke gadikya ko widava kwiton zo permudar nume va nouca ke renanamiksany pu Silja anton isker.
Ina ve akoleper nume zo torigir da fu mulufter. Tavesik ta kevropera doder, numen ina bexe tere griakoler.
Soe muvugal va tavesik ko Helsinki zo dimrozar numen Silja va warzafa kobara gotrasir. To dene memempes is kiewagijin vesk vanpir jaftolsusik.
Suomiavafa wideytafa geja ve vinustar, isen vesk koe tawavo stujeno gan Kerasusikeem tigir. Lansielon, toloy jotaf batakasusik ko vesk artlanid ise va pomara ta birgotafa kalanira va redjel erud. Silja va sin rem aalxo nyaper, voxen gan konak kerasusik dimlanison zo biber aze tuke anton kurenik ke sinaf okilik va arge divvawar. Va egara va fliotafa klibura ke tawayaf pilkotik dere tcoker.
Viele batakasusik va tawavo kostujed, pune gu dofuguca xuton gu pisonara va ban pilkotik zo buntur voxe va klibura nemon taruter viele tan toloy ayik nyapeyen koo aalxo walpir ise va ina kevrojur.
Silja zo givar da Armas astirbon al zo bakar nume ape fu awalker.
Voxen, toleatomon ina ve kotcakoler. Tolsantoldafa mulufter.
.svg){kind=icon}