Smbataberd

Smbataberdarmenavon Սմբատաբերդ ) tir savsafa armenafa ralma tigisa vageiste Xayastana, valente Vayots Dzor winka wale Artabuynk wida isu Yeghegis koe witafa Yeghegis dota.

Debak

Sembataberd ralma tice guraf xed tigir, dem tuwavafa rojuxa moe baroy kril. Vansara va ralma anton tir rotisa mal lentef kril. Vegeduyune anambe va cuga dilfura remi izva tatceyer.

Izva

Kijarinda is vegeduse ckane ( ton satcon pwerte ke rebaveem vas 2-3 m- kum burgifa ilbodeyena elega ) noved da va rekola ke zabdura rotentut, trabe ke X-XI-eafa decemda. Refa ralma gazon gu Bagratuni Smbat Tiezerakal rotir zo vegeduyur.

Smbataberd tiyir tana losavsafa is lozolonafa ralma ke Vayots Dzor is Syunik gola. Abdi V-eafa decemda rotir kruldeyer. Kaikion sayakafo is rojuso zobexo ke Vasakian prostelay tiyir. Gazon gu Orbelian prostelay zo migexayar.

Xantaf yolt ke ralma me zo gruper. Ref yolt rotir vey pokefo tigixo ke naboxa ke Smbat Orbelian gazik koe Yeghegis wida. Ostik dimvilara va ralma gu mil Smbat zo yoftecker. Soe yolt vas Smbat sersik ke Syunik ke X-eafa decemda loeke ape tikir.

« Viele bak 922, dirganon gan Yusuf sersik ke Atrpakan, Neser sayakokilik va Syunik gola kodubieyer, pune Smbat sersik va Yeghegis korojuyur. Viele volnik va po kev int is intafa merotisuca sonkeyer, pune dimavlayar.
Banugale Smbat proyik tiyir vumeltaf is aulaf koe intafa Vayots Dzor winka. Givanon gu stekefa artlakira, pune va sokexo is varafa Vayots Dzor winka volmiv folkayeyer ise trumindayar. Azon va ervolia kev volnik stakseyer ise va berma is aboyikeem koe Yeghegis wida gan gazafa virutsa rojuyur. »

— Stepanos Orbelian. Izva ke Sissakan gola

Oye evla ke vilara va Tsaghats Kar tucpastaxe az inafa malvegedura bak 1221, voxis vilara va Yeghegis wida tici XI-eafa decemda, rolevaykat da ralma gan tolgeniso po ke turkaf Seljuk bak mila XI-eafa decemda dere zo nariyir. Wori lana bifa isu kira tiaved da ralma kali XIII-eafa decemda zo rojuyur nume gan mongolafa ervolia lodamu Seljuk rotir zo levrotiyir.

Kolna

Pimtara

Debak ke Smbataberd tiyir merovansan. Belca gan titsuyafa weluska ke Artabuni kuksa isu Yeghegis is zultayana gulikafa rebava vafa vas 2-3 m- zo rojuyur. Mila rebava radimion zo vegeduyud ise tid dem konak anamkaf rasek.

Kotaf xed zo anambeyer, askison va darkapa rokabelcasa va konak decemoy irubasik. Toloyi widaki balikeni pu ant sersik is yastikeem moe ticak ke xed tigiyid.

Ralma vas toloy pak ruldar : lentef pak isu geef lize va stabrega ke widaki is sayakaxe is vreda is lavak rowit. Lava kan levetawaf tawodaf yaxay ( abrotcaf vas mon 2 km- ) zo stayar, malnisa va klita tigisa poke Tsaghats Kar tucpastaxe.

Sedme lana vunda to oxam viele siputepes okol va bat yaxay koe sid tcaluteyer, pune volnafa ervolia va ralma lajulevrotiyir. Strabrega ke lavak is yaxay re wan krulded.

Vaxe dalafo lentefo kolanixo, toloyo aro vatalte debak isu varone tigid. Sues tuvelom isu rasek moe galzakorafa kepaita kum ilbodeyeni burgi tigiyid. Toloy sues tuvelom moe bria voke kelda stasa va ralma arte 1 km- roneon ware krulded. Bareaf arte 800 m- talte ralma moe krimpa ke meftava poke Vosting savsafa mialukugalafa wida tigir.

Tuveli

Koe kota sayakafa rojuxa kolanixo sotir zvak kir lodaxafi ki ke anambe. Jadion, kolanixo va vaneksara is miledje acagira va tolgenisik anton gonoveyer.

Merovansana tirka ke Sembataberd va kelor is brimga ordafa gu mialukugalafa ralma tumefavlayar. Tazuk ke dalafo kolanixo ke ralma tiyir trumindot ( migexakiraf abduplay ) lize migexa is arestafa kiria va tolgenisik tuviayad isen sayakik ke rasek va kota bora ke volnik obrason ropitcayad.

Ewavak

Vuestexa

  • (en) Holding, Nicholas (2006), Armenia with Nagorno Karabagh, 2nd ed.: Bradt Travel Guides Ltd, Guilford, Connecticut: The Globe Pequot Press Inc., ISBN 1-84162-163-3
  • (en) Kiesling, Brady (2005), Rediscovering Armenia: Guide, Yerevan, Armenia: Matit Graphic Design Studio
  • (en) Brady Kiesling, Rediscovering Armenia, bu 123

Smbataberd
Rebavega ke Smbataberd ralma
DEBALA
Debala Vayots Dzor winka, Yeghegis dota
Xayastana   Flag of Armenia.svg
Maneka OOjs UI icon mapPin-progressive.svg 39° 52′ 18" L-, 45° 20′ 17" R-
KIRA
Ord Armenafa ralma
Welmot km²
IZVA
Zabdura IX-X-eafa decemda
Jovlera XIII-eafa decemda
Ayafe sare Gazaxo ke Armena, Mialukugal
P Parthenon 2.svg  Tuveli icde Izvopa  P Parthenon 2.svg
Tigixo ke Smbataberd