Sphinx ke oprukxo (suterot)

**Sphinx ke oprukxo**
	XANTO
	XANTO
Vergumvelt	Le Sphinx des glaces
Sutesik	Jules Verne
Ava	Francava
Suterotinda	Berpot
Evla	1897
betara	teza

Sphinx ke oprukxo

Sphinx ke oprukxo tir tacukaf berpot ke Jules Verne sanegayan bak 1897, tis tana karba ke Yona zultafa koyara nevatum.

Bat grabom ton wana ke berpot ke tarizambe Edgar Allan Poe zo atoer, i ke Pwadeyena stuva ke Arthur Gordon Pym ke Nantucket sanegayan bak 1838. Solve krent ke Poe va tacukafa ik warlafa tena firvir, pune Jules Verne va ovopafa pebura va tena ke nega dafur.

Vildeks

Taneaf pak

Bak 1839 Jeorling amerikaf kawopik jonvieles koe Kerguelen ewaleem va vo tiso Connecticut galdolk djudimlapir. Va artlapira ke Halbrane wilttota va ewala impavantar. Va Len Guy redakik rungruper. Radimi taneafa vewara bantan tere naler da va in kal Tristan da Cunha ewala mepebuson fu vanstar. Mallapira ba 15^-e ke anyusteaksat ke 1839 sokir.

Viele sin moe tota tigid, redakik pu Jeorling pebur dume al boyarur : Jeorling wetce voik ke Connecticut va yasa ke Arthur Gordon Pym co rogruper, i ke koredik ke berpot ke Edgar Allan Poe dere tis voik ke mil galdolk. Redakik laner da bat berpot me tir gestaks, numen batcoba sedme Jeorling tir teca wazdexa va oviskuca ke redakik. Len Guy dace welidar da va lan tirac dem staksa iskeyena gan redakik ke Jane moe Kerguelen ewala al katrasir, i ke totuk divrozan koe neva ke Poe. Azon pebur da va giwanikeem ke Jane djugreler.

Ba abic viel abdi artlapira va Tristan da Cunha ewala, Halbrane tota va dantalesi opraki gamdar. Tanoya awalkoda moeon tigir. Len Guy redakik va Patterson ikaredakik ke Jane bam pilkomodar. Va kid gruyes va pilkoma is izva kevu ina zo trasir. Jeorling batvielu en toz folir, rupa tir ageltafa. William Guy redakik ke Jane enwe tir berikye ke Len Guy.

Halbrane tota va Tristan da Cunha ewala ba 6^-e ke lerdeaksat vankrir. Prilara do bowesik ke ewala va kruldera ke Jane is inaf drig gruyer. Ba 8^-e ke lerdeaksat tota van Falkland tursia vanlapir. Bak vawa, Jeorling va stuva moe Halbrane is pakera va giwara va drig ke Jane djuprodakir ise gan redakik zo malnaler.

Tota ba 26^-e ke saneaksat va Falkland tursia artlapir. Zavzagir edje ta totara ko arktikafa bira gotugadiar ise va bliga tori tolda gokototar ise va totasik don lan Hunt kseldur. Halbrane ba 27^-e ke saneaksat dimmallapir.

Katrasitison va tokafa bazexa iku remblisik, brinuga kev South Georgia ewala azu South Sandwich azu South Orkney greeltar.

Azon Halbrane va zivotc levgar edje Hunt ko lava estobar nume va Martin Holt birelik lubeyes ko bira lajugreler. Radimi bata zixa, linulara ke Hunt tudivulaweper.

Tota ba 19^-e ke santoleaksat drum opruk azon artlapir aze kal opriskafa bira lajuremlapir.

Tota ba 21^-e ke santoleaksat drum Bennet ewalama ( gestaxo ) vankriyina gan Jane bak inafa koyara artlapir. Drig va intaki miwayani gan Edgar Poe koe inaf berpot is azebki tiyisi ke Jane tota kosmar.

Brinuga va Tsalal ewala ba 24^-e ke santoleaksat artlapir.

Koe Tsalal ewala, volto mek aal isu kuksa voldum pimtara ke neva tir, voxe kroguca is linduca. Pebutuson va mana mulafa korarura, Jeorling va sokiyis ruftacek bam gestar. Flek ke vakol ke Pym koeon zo katrasir.

Toleaf pak

Len Guy redakik zo erolar kire va remblisik al me trasir. Va dimlapira gorar abdida fentugalaf cadim fu artfir. Hunt zo basxatcaxar kire en tir Dirk Peters. Ba 26^-e ke santoleaksat, tarlera buzer : viltenik djukudimlapid. Jeorling va itaya vas tol-decoitoy dollar talolk fuxe kota laksiwakafa eka abdufitina abduplekur.

Trazevdapa elekana gan trampa pastawer nume va Halbrane tota ko rid levmadar. Yulteem zo tuvlardar. Nope bica, opra joawer ise tota koe tapayan lavok belxar. Ara trazevda va sin klantar nume tunuyar.

Bene dantalera ke trazevda, va lan siday tere vankrid. San-baroy tarlesik va tanafa zavzasa witka koilkad. Zavzagiyison moe siday, lerdoy ar moblisik va totuk kosmad, i va Paracuta witka lize William Guy is baroy birelik ke Jane tigid : katrasira ke toloye berikye. Ba 21^-e ke toleaksat, mallapira moe witka.

Illapison va Geef Nael, va fluvor tazukaf gu Sphinx kosmad. Kota yantafa muka tizon bam zo soltiolter. Artlanison tit fluvor, va alto ke Pym kosmad, i ke Pym benkruyun nope viltaxa gu lentor ke Sphinx ; Dirk Peters nope niga di awalker.

Ba 6^-e ke balemeaksat, amerikaf Tasman totuk va sin dimnarir.

Koredik

Jeorling : amerikafe kawopikye, pwadesik ke berpot. Tir opik voxe adre kosmar da berpot ke Poe tir ageltaca.
Len Guy : redakikye ke Halbrane tota. Tir snivafe. Berikye ke William Guy.
Hurliguerly : voikye ke Wight ewala, 44^-dafe, birelokilik ke Halbrane tota
Jem West : 32^-dafe, ikaredakikye ke Halbrane tota. Gipulvinsir.
Fenimore Atkins : yoridikye ke Kusaf limatc koe Port-Christmas koe Kerguelen ewaleem. Xantik ke mila gola ke Jeorling.
Betsey Atkins : kurenikya ke Fenimore Atkins, gadik ke sanoy nazbeik.
Martin Holt : italokilik koe Halbrane tota.
Hardie : ivinasikye.
Rogers : englafe birelikye.
Drap : englafe birelikye.
Francis : englafe birelikye.
Gratian : englafe birelikye.
Burry : englafe birelikye.
Stern : englafe birelikye.
Endicott : burmotasikye ke Halbrane tota, voik ke afrikafo krimtaxo, tis mon bar-sandaf.
Patterson : koredikye ke Edgar Poe, mon balem-sandafe, ikaredakik ke Jane tota.
William Guy : redakikye ke Jane tota, berik ke Len Guy.
Glass : darefe rizikye ke englafa kaburervolia, gazase va Tristan da Cunha ewala.
Hearne : amerikafe birikye kselduyune koe Falkland tursia. Onas okilik.
Hunt : tise 44^-dafe. Okon gu Dirk Peters.
Allen : birelikye ke Jane tota.
Parker : berikye ke Martin Holt ton Ned Holt sedme Verne. Gan moblisik ke Grampus tota di zo vumbeyer.
Trinkle : giwayane birelikye ke Jane tota.
Roberts : giwayane birelikye ke Jane tota.
Covin : giwayane birelikye ke Jane tota.
Forbes : birelikye ke Jane tota, xonukeyese radimi yatera mal Tsalal ewala.
Lexton : birelikye ke Jane tota, levgayase va mili bali.
Arthur Gordon Pym : dalaf koredik ke berpot ke Edgar Allan Poe. Koe berpot ke Jules Verne, inafo alto bentite Sphinx mefta zo katrasir.
Tigre : vakol ke Arthur Gordon Pym. Ve bresitolakoler.