Stutesik (suterot)
|
Stutesik ( englavon The Adventure of the Dancing Men ) tir berpotam ke Arthur Conan Doyle taneon sanegayan bak 1903 koe Standard Magazine virda az direilanon koe Dimpira ke Sherlock Holmes berpotamak. VildeksTozafa debalaHilton Cubitt W-ye tise pilkotik ke waba koe Ridling Thorpe koe Norfolk gola va Sherlock Holmes rozer kiren Elsie jotafa kurenikya konakedje tuguyar. Sin weti biwe tanoya tanda tid kureyen. Elsie tir amerikafe ; al askir da kurenye abdiplekuyur nume icde inaf darekeugal me di bibeyer. Cubitt va bat abdiplekuks al malaskir. Debala slackayar vieli Elsie va twa mal Tanarasokeem kazawayar, i va twa relatcepesa az ko tey mimayana. Banvielu rilitaf grincuks ton rumeafa kerdela koe pilkot ke Cubitt al awid. Va yon nustutes olkikamtum kaatoed. Bat zovdaks bulon awid : dile keve eluxaki mielon daykayani, dile sutedayan kan afolt keve kona rebava oku tuvel oku kadoma ke dilk. Kotviele kosmara va Elsie numayesir voxen ine va meka pebura pu kurenik dafur. MaeraHolmes erur da Cubitt va sagaf ksudaks va kota warzafa staksa ke « stutesik » di dear. Tuke ugol batkane kabelcan, va birgafa beksa ke bulaf gonyalatum lajupempar. Ironkafa gribeksayana staksa tugrenyapar ise va Holmes elogar. Kogrupasik ko waba ke Ridling Thorpe ampur lize va alto ke Cubitt aytayan kan viltara ist takra kosmar, is va inafakurenikya bakapayana ko taka. Kas batcoba tir gomilara az ksera ? Akoydason va lizukaf ardialaf kogrupasik, Holmes kalion kosmar da batcoba tir arafa. Konaka bazexa askid da va askoara ke bareaf korik uculegar, i ke korik ape tis askisik va beksayana staksa. Fonsatason va ucul, i Holmes va gribeksasa stinuca gire fu govidur. Beksopafa welimaRupa ke bat berpotam vas lana beksaropafa welima benaykar. Sherlock Holmes va beksa ke staksa mayesisa va kurenikya ke anelik lajupempar. Bata staksa tid dem enk dem amidafa leca ton korik tegulas va meem is nimateem is dile gis va niltam : « stutesik ».  Beksayana staksa ke Stutesik berpotam Vayason nobuca ke awira ke kot korikam kare nuva ke nobucafa drunara, Sherlock Holmes va sugdala ke batyon zovdayan lecatum lajuvangruper. Beksa ke bata beksaxa enwe tir opelafa. To abavafa ikabetara tir : kot korikam vas tanoy eltay vodar. Dulap ke bata beksarinda tir tixoluca : favenon vanmiae grincuyuna staksa keve kona rebava oku eluxaki, ina bevular mewina kire gu rumeikaf zovdaks zo rotorigir, tulon gu Watson selaropik taneon ! Bat grincuks enwe tid tumevestarinda va lobirgafa staksa. YunkexaKonaka yunkexa va berpotam, koe sanegasa virda bak 1903 : Dere rupel
Vuestexa
|
 Tana yunkexa ke taneaf piskuks va berpotam bak 1903 | ||||||||||||||||
.svg){kind=icon}